چیمپئنز لیگ: گارڈیولا پر امید ہیں
24 اپریل 2012![](https://static.dw.com/image/15804799_800.webp)
ہسپانوی کلب ایف سی بارسلونا کے کوچ پیپ گارڈیولا گزشتہ ہفتے چیمپئنز لیگ کے سیمی فائنل کے پہلے مرحلے میں چیلسی سے ہارنے اور پھر لا لیگا میں ریئل میڈرڈ سے دو ایک سے شکست کھانے کے بعد بھی پر امید ہیں کہ ان کی ٹیم آج منگل کے روز چیلسی کو شکست دے کر چیمپئنز لیگ کے فائنل تک رسائی حاصل کرنے میں کامیاب ہو جائے گی۔
یورپی کلب ٹیموں کے مؤقر ترین چیمپئنز لیگ ٹورنامنٹ کی دفائی چیمپئن بارسلونا کو پے در پے ناکامیوں کا سامنا کرنا پڑا ہے تاہم ان کے کوچ پر امید ہیں کہ بارسلونا فتوحات کا سلسلہ دوبارہ شروع کر سکتی ہے۔ ہسپانوی لیگ کے بارے میں گارڈیولا کہہ چکے ہیں کہ اس میں بارسلونا کی فتح کے امکانات معدوم ہو چکے ہیں۔ ہفتے کے روز میڈرڈ سے شکست کے بعد گزشتہ برس لا لیگا کی فاتح بارسلونا میڈرڈ سے سات پوائنٹس پیچھے چلی گئی ہے اور اب لیگ میں محض چار میچ ہی باقی ہیں۔ بارسلونا کے کوچ کے مطابق اب ان کی ٹیم کی تمام تر توجہ چیمپئنز لیگ کے سیمی فائنل پر ہی مرکوز ہے۔
گزشتہ بدھ کو لندن میں کھیلے گئے سیمی فائنل کے پہلے مرحلے میں چیلسی صفر کے مقابلے میں ایک گول سے فاتح رہی تھی تاہم اب اس کا مقابلہ بارسلونا کے ہوم گراؤنڈ پر ہے۔ چیلسی کے کوچ کا کہنا ہے کہ وہ منگل کے میچ میں صرف گزشتہ مرحلے کی فتح پر ہی انحصار نہیں کریں گے بلکہ ان کی کوشش ہو گی کہ ان کی ٹیم مزید گول کرے۔
پیپ گارڈیولا کا کہنا تھا، ’’مجھے اس طرح کی صورت حال کا سامنا کرنا پڑتا ہے اور میں اسے مایوسی کے ساتھ بھی جھیل سکتا ہوں یا پھر میں رجائیت کے ساتھ اس صورت حال کا مقابلہ کر سکتا ہوں۔ مجھے اپنے کھلاڑیوں پر اعتماد ہے۔ یہ اعتماد اچھے وقتوں میں بھی ہے اور برے وقتوں میں بھی۔‘‘
گارڈیولا کا کہنا تھا کہ ان کے کھلاڑی اس طرح کی صورت حال سے پہلے بھی نبرد آزما ہو چکے ہیں۔
چیلسی کے خلاف میچ سے قبل بارسلونا کے اسٹار کھلاڑی لیونیل میسی کی فٹنس کے بارے میں قیاس آرائیوں کی تردید کرتے ہوئے گارڈیولا نے کہا کہ میسی پیر کے روز ہونے والی ٹریننگ میں پیٹ کی خرابی کی وجہ سے حصہ نہیں لے سکے تاہم وہ منگل کو چیلسی کے خلاف ضرور کھیلیں گے۔
(ss/at (Reuters, AFP