چیمپیئنز لیگ کے فائنل میں بائرن میونخ کی شکست
20 مئی 2012![](https://static.dw.com/image/15963631_800.webp)
دونوں ٹیمیں اس مقابلے کے لیے ہفتے کی شب میونخ کے آلایانس ایرینا میں اتریں۔ یہ ایک سخت مقابلہ تھا اور کھیل کے آخری دس منٹ تک کوئی بھی ٹیم گول نہیں کر پائی تھی۔
تاہم نوّے منٹ کا کھیل ختم ہونے پر دونوں ٹیموں نے ایک ایک گول اسکور کر لیا۔ میچ کا پہلا گول کھیل کے 83ویں منٹ میں میونخ کے تھوماس میولر نے کیا۔ چیلسی کے دیدیئر دروگبا نے کھیل کے اٹھاسی ویں منٹ میں گول کر کے کھیل ایک ایک سے برابر کر دیا۔
اس طرح میچ اضافی وقت تک جاری رہا۔ اس دوران بھی کوئی گول نہ ہو سکا اور میچ کا فیصلہ پینیلٹیز پر ہوا۔ چار مرتبہ چیمپیئن شپ کا تاج حاصل کرنے والے کلب بائرن میونخ کے لیے پینلٹی شُوٹ آؤٹ پر شکست کا یہ پہلا موقع تھا۔
حالانکہ اس کے لیے پینلٹی کِکس کا آغاز اچھا رہا تھا۔ اس کے کپتان فیلیپ لاہم نے پہلی کک پر گول اسکور کر لیا تھا جبکہ اس کے گول کیپر نویئر نے چیلسی کی پہلی کک ضائع کر دی تھی۔ تاہم اس کے بعد وہ چیلسی کے کھلاڑیوں کی بقیہ چار ککس روکنے میں ناکام رہے جبکہ میونخ نے اپنی آخری دو ککس ضائع کر دیں۔ اس کی جانب سے Ivica Olic اور نائب کپتان باسٹیان شوائن شٹائیگر نے ایک ایک پینلٹی ضائع کی، جس کی وجہ سے یہ میچ ان کی ٹیم کے ہاتھ سے نکل گیا۔
چیلسی کی جانب سے فیصلہ کُن پینلٹی کِک دیدیئر دروگبا نے لگائی۔ انہوں نے میونخ کے گول کیپر مانوئیل نویئر کو چکما دیتے ہوئے یہ گول کیا۔ اکتیس سالہ اس کھلاڑی کے یہ ممکنہ طور پر آخری میچ ہو سکتا ہے کیونکہ چیلسی کے ساتھ ان کا معاہدہ آئندہ ماہ ختم ہو رہا ہے۔
اس شکست کے ساتھ بائرن کی ٹیم کو چیمپیئنز لیگ کے گزشتہ تین میں سے دو فائنلز میں شکست کا سامنا رہا ہے۔ اس سے قبل 2010ء میں یہ ٹیم اٹلی کے کلب انٹر میلان سے چیمپئنز لیگ کے فائنل میں شکست کھا گئی تھی۔
گزشتہ ایک ہفتے میں کسی فائنل مقابلے میں بائرن میونخ کی یہ دوسری ہار ہے۔ اس سے پہلے جرمن چیمپیئن شپ بنڈس لیگا کے فائنل میں اسے ڈورٹمنڈ سے دو کے مقابلے میں پانچ گول سے شکست ہوئی تھی۔ 1995/96ء کے بعد یہ پہلا موقع ہے کہ بائرن کی ٹیم کو یکے بعد دیگرے دو فائنل میچز میں شکست ہوئی ہے۔
ng/hk (AFP, AP)