رواں برس مارچ کے مہینے میں منصب صدارت سنبھالنے کے بعد چینی صدر کا جنوب مشرقی ایشیائی خطے کا یہ پہلا دورہ ہے۔ جنوب مشرقی ایشیائی دورے کے دوران چینی صدر انڈونیشیا کا دورہ مکمل کرنے کے بعد ملائیشیا پہنچیں گے۔

ملائیشیائی دورے کے بعد شی جِن پنگ انڈونیشیا کے سیاحتی جزیرے بالی میں منعقدہ ایشیا پیسفک اکنامک فورم کے سربراہی اجلاس میں شریک ہوں گے۔ ایشیا پیسفک اکنامک فورم آج سے بالی میں شروع ہو گیا ہے۔ اس اجلاس میں سربراہان کے سیشن سات اکتوبر سے شروع ہو رہے ہیں۔

انڈونیشیا میں چینی صدر میزبان ملک کے صدر سُوسیلو بامبانگ یدھویونو کے ساتھ باہمی معاملات پر گفتگو بھی کریں گے۔ ایسے قوی اشارے سامنے آئے ہیں کہ چینی صدر کے دورے کے دوران چین اور انڈونیشیا 20 ارب ڈالر کے معاہدوں پر دستخط کریں گے۔ ان معاہدوں کا مقصد بنیادی ڈھانچے کی تعمیر وترقی کے علاوہ ٹیکنالوجی اور سیاحت کے شعبوں میں مزید تعاون پیدا کرنا ہے۔

اسی دورے کے دوران انڈونیشیا کے دارالحکومت جکارتہ میں مونو ریل کی تعمیر کے معاہدے کو بھی حتمی شکل دی جا سکتی ہے۔ مونو ریل کی تعمیر کا مقصد جکارتہ شہر میں انتہائی زیادہ ٹریفک کے بوجھ میں کمی واقع کرنے کے علاوہ مسافروں اور ملازمین کو ٹریفک مسائل سے چھٹکارا دلانا ہے۔

چین نے گزشتہ کچھ سالوں کے دوران انڈونیشیا کے کئی شعبوں میں سرمایہ کاری کر رکھی ہے۔ اس میں خاص طور پر کان کنی کو اہمیت حاصل ہے۔ انڈونیشیا اور چین کے درمیان باہمی تجارت کا حجم مسلسل بڑھ رہا ہے۔ سن 2005 میں اس تجارت کا حجم 16.5 ارب ڈالر تھا، جو اب سن 2012 کے دوران 66.2 ارب ڈالر کے قریب پہنچ گیا ہے۔ چینی صدر نے جکارتہ پہنچنے سے قبل کہا تھا کہ وہ مزید تعاون کے راستے تلاش کرنے کی کوشش کریں گے۔

مشرقِ بعید میں چین کو فلپائن، ویت نام اور جاپان کے ساتھ سمندری معاملات پر تنازعات کا سامنا ہے۔ انڈونیشیا اور چین کے درمیان ایسا کوئی تنازعہ موجود نہیں ہے۔ چینی صدر شی جِن پنگ نے کہا ہے کہ وہ جنوب مشرقی ایشیائی تنظیم آسیان کے دس اراکین کے ساتھ علاقے میں امن و سلامتی اور استحکام کے معاملات پر دوطرفہ بنیادوں پر بات چیت کے لیے تیار ہے اور اس میں بحیرہ جنوبی چین کا مسئلہ بھی شامل ہے۔