برطانوی اخبار فنانشیل ٹائمز نے بدھ کو اپنی ایک رپورٹ میں لکھا ہے کہ چین کے وزیر دفاع ڈونگ جون کو بدعنوانی کے الزام میں تحقیقات کے دائرے میں لیا گیا ہے۔

اگر اس خبر کی تصدیق ہو جاتی ہے تو ڈونگ اس وزارت پر براجمان یا اس منصب پر فائز رہنے والے مسلسل ایسے تیسرے چینی وزیر دفاع ہوں گے، جن کے خلاف مبینہ بدعنوانی کی تحقیقات کی جائیں گی۔

چینی وزیر دفاع کو مبینہ طور پر بدعنوانی کی تحقیقات کا سامنا

فنانشیل ٹائمز کے مطابق یہ تفتیش فوج میں بدعنوانی کی وسیع تر تحقیقات کا حصہ ہے۔

پچھلے ہفتے، ڈونگ نے تائیوان پر امریکی اقدامات کا حوالہ دیتے ہوئے، لاؤس میں وزرائے دفاع کی میٹنگ کے دوران امریکی وزیر دفاع لائیڈ آسٹن سے ملنے سے انکار کر دیا تھا۔

تحقیقات کی زد میں آنے والے تیسرے وزیر دفاع

چین کی فوج نے گزشتہ سال سے بدعنوانی کے خلاف بڑے پیمانے پر کارروائیاں شروع کی ہوئی ہیں۔

ڈونگ بحریہ کے سابق کمانڈر ہیں۔ دسمبر میں لی شانگفو کو وزیر دفاع کے عہدے اچانک ہٹائے جانے کے بعد انہیں اس منصب پر فائز کیا گیا تھا۔ شانگفو سات ماہ تک چین کے وزیر دفاع رہے تھے۔

چین کی سرکاری میڈیا کے مطابق، لی پر رشوت ستانی میں ملوث ہونے کے الزام تھا، بعدازاں انہیں کمیونسٹ پارٹی سے بھی نکال دیا گیا ہے۔ اس کے بعد سے وہ عوام میں نظر نہیں آئے۔

بیجنگ نے گزشتہ سال کے دوران اپنی مسلح افواج میں بدعنوانی کے خلاف کریک ڈاؤن کو مزید سخت کیا ہے۔

خبر رساں ادارے بلومبرگ نے اس سال امریکی حکام کا حوالہ دیتے ہوئے ایک رپورٹ میں کہا کہ یہ پیش رفت ان خدشات کے پیش نظر شروع کی گئی ہے کہ بدعنوانی مستقبل میں چین کی جنگ لڑنے کی صلاحیت کو متاثر کر سکتی ہے۔

ج ا ⁄  ص ز (روئٹرز، اے ایف پی)