اتنے بلند اور دشوار گزار پہاڑوں تک کرینیں اور تعمیراتی ساز و سامان لے کر جانا ایک خاص طرح کا چیلنج تھا۔ چینیوں نے یہ کارنامہ کر دکھایا اور دو سال کے اندر اندر یہ دیو ہیکل پُل تعمیر کر ڈالا۔ چینی نیوز ایجنسی سنہوا کے مطابق اس پُل کی تعمیر پر 218 ملین یورو کے برابر لاگت آئی ہے۔

چِنگ شُوئی پُل 1130 میٹر لمبا ہے اور فضا میں معلق ہے۔ زمین کی سطح سے یہ پُل 406 میٹر بلند ہے، جرمنی کی کسی بھی عمارت سے زیادہ بلند۔ سان فرانسسکو کا گولڈن گیٹ برِج شاید دنیا کا مشہور ترین پُل ہے لیکن وہ بھی زمین سے محض 227 میٹر بلند ہے۔ البتہ گولڈن گیٹ پُل 1280 میٹر لمبا ہے اور یوں لمبائی میں اِس چینی پُل سے 150 میٹر زیادہ طویل ہے۔

چینی زبان میں چِنگ شُوئی کا مطلب ہے، ’شفاف پانی‘۔ یہ دریا جنوب مغربی چینی صوبے گُوئی جُو کے پہاڑوں سے نکلتا ہے اور پندرہ صووں سے ہو کر گزرتا ہے۔ اس تصویر میں صوبے ہونان میں ’بیان چَینگ‘ کے مقام پر دریائے چِنگ شُوئی میں خواتین کپڑے دھو رہی ہیں۔

یہ دیو ہیکل پُل صوبے گُوئی جُو میں بنایا گیا ہے، جہاں قدم قدم پر پہاڑ ہیں۔ ایک قدیم روایت کے مطابق یہ وہ جگہ ہے، ’جہاں کسی جگہ بھی تین فیٹ ہموار زمین نہیں ملے گی، جہاں تین دن ایسے نہیں ملیں گے، جن میں بارش نہ ہو اور جہاں کوئی ایسا شخص نہیں ملے گا، جس کے پاس تین یوآن ہوں‘۔ اس صوبے کو ’فراموش کردہ‘ صوبہ کہا جاتا ہے۔ یہ پُل اس صوبے کو تیزی سے ترقی کرتے چینی علاقوں تک آسان رسائی دے گا۔

آیا چِنگ شُوئی پُل چین کے اس غریب ترین صوبے کی ترقی میں معاون ثابت ہو سکے گا، یہ بات تو آنے والا وقت ہی بتائے گا۔ گُوئی جُو کے کار ڈرائیوروں کو البتہ ابھی سے بہت آسانی ہو جائے گی۔ اس پُل کے باعث صوبائی دارالحکومت گُوئی ژانگ اور ایک اور بڑے شہر وَینگ آن کے درمیان فاصلہ 161 سے کم ہو کر محض 37 کلومیٹر رہ جائے گا، بشرطیکہ ڈرائیوروں کو بلندی سے خوف نہ آتا ہو۔

یہ نیا معلق پُل انسان کے ہوش گم کر دیتا ہے اور انسان چکرا کر رہ جاتا ہے۔ اس کے باوجود یہ دنیا کا بلند ترین پُل نہیں ہے۔ یہ ریکارڈ ایک اور پُل کے پاس ہے، وہ بھی چین ہی کا ایک پُل ہے۔ 2009ء میں چینی صوبے ہوبائی کے باڈونگ نامی علاقے میں سیڈُوہے نامی پُل کا افتتاح ہوا تھا، جو سطحِ زمین سے 496 میٹر بلند ہے اور 1300 میٹر طویل ہے۔