جنوب مغربی چینی صوبی یُنان میں زلزلہ جمعے کی شام دس بجے کے قریب آیا اور اس کی ریکٹر اسکیل پر شدت 6.1 ریکارڈ کی گئی۔ اس زلزلے سے سیاحوں کے لیے مشہور ڈالی شہر بھی لرز کر رہ گیا۔ چنگ ہائی صوبے میں زلزلہ ہفتہ بائیس مئی کی علی الصبح آیا۔ وہاں اب تک کم از کم تین افراد کے ہلاک ہونے کی تصدیق کی گئی ہے۔

تائیوان میں زلزلہ، ہلاکتوں کی تعداد اٹھائیس ہو گئی

یُنان کے شہر ڈالی میں زلزلہ

ڈالی میں جمعہ اکیس مئی کی شام زلزلے کے زوردار جھٹکے محسوس کیے گئے۔ امریکی جیولوجیکل سروے کے مطابق ابتدائی زلزلے کے بعد دو آفٹر شاکس نے بھی لوگوں میں مزید خوف و ہراس پیدا کیا اور شہر کی عمارتیں ہل کر رہ گئیں۔ اس شہر کی قریبی پہاڑیوں میں تین افراد کے مرنے اور ستائیس افراد کے زخمی ہونے کی تصدیق مقامی اہلکاروں کے ساتھ ساتھ چینی سرکاری میڈیا نے بھی کر دی ہے۔

چنگ ہائی میں زلزلہ

ہفتہ بائیس مئی کی علی الصبح شمال مغربی صوبے چنگ ہائی میں زیادہ شدت کا زلزلہ آیا۔ ریکٹر اسکیل پر اس کی شدت 7.4 ریکارڈ کی گئی۔ اس زلزلے کا مرکز گنجان آباد صوبے کی مادیو کاؤنٹی میں دس کلومیٹر زیرزمین تھا۔ یہ امر اہم ہے کہ یُنان کا صوبہ گیوفون زلزلے والی پٹی پر واقع ہے۔ ان دونوں صوبوں میں پہلے بھی کئی مرتبہ زلزلے آئے ہیں۔

چین میں زلزلہ، ہلاکتوں کی تعداد تقریباﹰ تین سو ستّر

چنگ ہائی میں ابتدائی زلزلے کے بعد کم شدت کے دو آفٹر شاکس بھی آئے۔ ابھی تک اس زلزلے سے کسی جانی و مالی نقصان کی تفصیل سامنے نہیں آئی ہے۔ امریکی جیولوجیکل سروے کے مطابق یُنان اور چنگ ہائی زلزلوں میں کوئی ربط نہیں تھا۔ ان کے مراکز بھی مختلف مقامات پر تھے۔

سن 2010 میں چنگ ہائی میں آنے والے شدید زلزلے سے تین ہزار افراد ہلاک ہو گئے تھے۔ یُنان صوبے میں سن 2014 میں آنے والے زوردار زلزلے میں ہزاروں افراد زخمی اور ایک لاکھ کو بے گھری کا سامنا کرنا پڑا تھا۔

 ع ح، ا ا (دی پی اے، اے ایف پی)