چین میں بین الاقوامی تجارتی نمائش، پاکستان بھی شامل
29 اکتوبر 2018
چین کے کاروباری مرکز شنگھائی میں آئندہ ہفتے درآمدات کے حوالے سے منعقد ہونے والی ایک بڑی ایکسپو میں اٹھارہ ممالک کے سربراہان شرکت کریں گے۔ چینی حکام کے مطابق اس بین الاقوامی نمائش میں پاکستانی وزیر اعظم بھی شریک ہوں گے۔
اشتہار
چینی حکام کا کہنا ہے کہ اس نمائش کا آغاز پانچ نومبر کو ہو گا جو دس نومبر تک جاری رہے گی۔ درآمدات سے متعلق اس نمائش میں دیگر ممالک کے علاوہ روس اور پاکستان بھی شرکت کر رہے ہیں۔ تاہم بہت اہم نوعیت کا کوئی مغربی ملک اس تجارتی نمائش میں شامل نہیں ہو گا۔
بڑے پیمانے پر منعقدہ یہ نمائش ہزاروں غیر ملکی اور چینی کمپنیوں کے درمیان کاروبار کو فروغ دے گی۔ تاہم چین میں امریکی سفارت خانے کے ترجمان نے گزشتہ ہفتے کہا تھا کہ واشنگٹن حکومت اس نمائش میں کسی سینیئر اہلکار کو بھیجنے کا کوئی ارادہ نہیں رکھتی۔ چین نے اس بیان پر اپنے ردعمل کا اظہار کرتے ہوئے کہا ہے کہ یہ امریکی فیصلہ ’نا قابل فہم‘ ہے۔ چین اور امریکا کے مابین ان دنوں شدید تجارتی تنازعہ پایا جاتا ہے۔
چینی وزارت خارجہ نے بتایا کہ اس نمائش میں چیک جمہوریہ، کیوبا، ڈومینیکن ریپبلک، کینیا، لیتھوانیا، پاناما، سلواڈور، سوئٹزرلینڈ، کُکس آئی لینڈ، کروشیا، مصر، ہنگری، جارجیا، لاؤس، مالٹا،پاکستان، ویت نام اور روس کے رہنما شرکت کریں گے۔
ان میں چیک ریپبلک اور کینیا سمیت چند ممالک کے صدور اس تجارتی ایکسپو میں چین کے ساتھ اپنے ممالک کی تجارت بڑھانے کے لیے پہنچیں گے جبکہ روس اور پاکستان کے وزرائے اعظم اس نمائش میں شامل ہوں گے۔
اس سوال پر کہ بعض ممالک کے رہنماؤں کو خاص طور پر کیوں مدعو کیا گیا، چینی وزارت خارجہ کے ترجمان لُو کانگ کا کہنا تھا کہ مدعو کیے گئے تمام ہی ممالک اس تجارتی میلے میں حصہ لینے کے حوالے سے بڑے پُرجوش تھے تاہم نمائش میں کس ملک سے کون نمائندگی کرے گا، یہ اُس ملک اور چین کی باہمی دوستانہ مشاورت سے طے کیا گیا۔
لُو نے مزید کہا کہ چین کی طرف سے اتنے بڑے پیمانے پر تجارتی نمائش کا انعقاد اس عزم کو ظاہر کرتا ہے کہ بیجنگ حکومت اپنا تجارتی دائرہ کار مزید وسیع اور چین کی ترقی سے دیگر ممالک کو بھی مستفید کرنا چاہتی ہے۔
آئندہ ہفتے شنگھائی میں ہونے والی درآمدات سے متعلق اس نمائش کا اعلان چینی صدر شی جن پنگ نے سن دو ہزار سترہ میں کیا تھا۔ وہ اس تجارتی میلے کی افتتاحی تقریب سے خطاب بھی کریں گے۔
ص ح / م م / نیوز ایجنسی
سمندر پر دنیا کا سب سے طویل پُل کھول دیا گیا
چینی حکومت نے میکاؤ اور ہانگ کانگ کو اپنی سرزمین کے ساتھ ایک طویل کے پُل کے ذریعے جوڑ دیا ہے۔ ژوہائی شہر سے ایک سرنگ سے گزرتے ہوئے یہ پُل ہانگ کانگ تک دو طرفہ ٹریفک کے لیے کھول دیا گیا ہے۔
تصویر: picture-alliance/AP Photo/Kin Cheung
چینی ساحلی علاقوں کو جوڑتا پل
یہ پُل مشرقی چین کے شانڈونگ صوبے کی خلیج جیاژُو کے اوپر سے گزرتا ہے۔ اس پل کے ساتھ مشرقی بندرگاہی شہر شنگڈاؤ کو بھی ایک اضافی سڑک کے ساتھ منسلک کیا گیا ہے۔
تصویر: dapd
تعمیراتی حسن کا شاہکار
ژوہائی میکاؤ ہانگ کانگ برج کو جدید تعمیراتی حسن شاہکار قرار دیا گیا ہے۔ اس تصویر میں یہ پل ہانگ میں داخل ہو رہا ہے۔
تصویر: Reuters/A. Song
ژوہائی میکاؤ ہانگ کانگ برج
ژوہائی میکاؤ ہانگ کانگ برج پچپن کلومیٹر طویل ہے۔ بحری جہازوں کے گزرنے کے لیے اس پُل کو دریائے پرل کے ڈیلٹا کے قریب زیر سمندر سرنگ سے بھی منسلک کیا گیا۔
تصویر: picture-alliance/AP Photo/Kin Cheung
اربوں ڈالر کی لاگت
پجاس سے زائد کلومیٹر اس طویل پل کو بیس بلین امریکی ڈالر کی لاگت سے تقریباً دس برسوں میں مکمل کیا گیا۔ اس عرصے میں کئی مرتبہ پل کی تعمیر کا سلسلہ کچھ وقت کے لیے منقطع بھی ہوا۔
تصویر: Getty Images/Guang Niu
کنسٹرکشن انجینیئرنگ
ژوہائی میکاؤ ہانگ کانگ برج کو کنسٹرکشن انجینیئرنگ کے جدید دورکا ایک عظیم شاہکار بھی قرار دیا گیا۔ اس کی تعمیر کے دوران سمندری ٹریفک کو معطل نہیں کیا گیا تھا۔
تصویر: AFP/Getty Images/A. Wallace
چین سے ہانگ کا سفر تیس منٹ میں
ہانگ کانگ کے ساحلی علاقے لان تاؤ کی پہاڑی سے پل کا ایک منظر۔ پل چین کی مرکزی سرزمین سے ہانگ کانگ کو منسلک کرنے کے لیے تعمیر کیا گیا۔
تصویر: AFP/Getty Images/A. Wallace
ریلوے لنک کے بعد سڑک کا راستہ
اس پل کا افتتاح چین اور ہانگ کانگ کے درمیان ریلوے لنک کے قائم ہونے کے تقریباً ایک ماہ بعد کیا گیا ہے۔ ہانگ کانگ کے لیے چینی ریلوے کا ٹریک ایک اور راستے پر بچھایا گیا ہے۔
تصویر: Getty Images/China Photos
اقتصادی سرگرمیوں میں اضافے کا یقینی امکان
خیال ہے کہ اس پل کی تعمیر سے میکاؤ، ہانگ کانگ اور ژوہائی میں اقتصادی سرگرمیوں کو تقویت حاصل ہو گی۔ ژوہائی کے کاروباری و تجارتی حلقے اقتصادی سرگرمیوں میں اضافہ دیکھتے ہیں۔
تصویر: AFP/Getty Images/P. Fong
ساحل سمندر سے پُل کا نظارہ
جنوبی چینی صوبے گوانگ ڈونگ میں ساحل پر کھڑے لوگ پل کا نظارہ کر رہے ہیں۔ بہت سارے ساحلی مقام پر چینی شہری ذوق و شوق سے پل دیکھنے جاتے ہیں۔
تصویر: picture alliance/AP Photo/A. Wong
چینی صدر نے پل کا افتتاح کیا
چین کے صدر شی جنگ پنگ نے ژوہائی میکاؤ ہانگ کانگ برج کا افتتاح 23 اکتوبر کو کیا۔ اس تقریب میں میکاؤ اور ہانگ کانگ کے انتظامی سربراہان بھی موجود تھے۔