چین کے پبلک سکیورٹی ڈیپارٹمنٹ نے جمعرات کو اپنے مائیکرو بلاگ پر جاری کیے گئے ایک بیان میں گاؤ کی گرفتاری کی تصدیق کی ہے۔ بیان میں کہا گیا ہے کہ انہیں ریاستی راز غیر ملکی ذرائع کو فراہم کرنے پر حراست میں لیا گیا۔

انہیں جمعرات کو چین کے سرکاری ٹی وی ’چائنا سینٹرل ٹیلی وژن‘ پر پیش کیا گیا۔ خبر رساں ادارے اے ایف پی کے مطابق ٹیلی وژن پر انہیں اس طرح پیش کرنا حکام کی جانب سے بیجنگ حکومت کے معروف ناقدین کو سرعام رسوا کرنے کی تازہ مثال ہے۔ حکومت اس طریقے سے ان کے اعترافی بیانات نشر کرتی ہے۔

ٹی وی پر انہیں ایک برآمدے میں سے لے جاتے ہوئے دکھایا گیا، جس کے بعد دو باوردی پولیس اہلکاروں نے ان سے پوچھ گچھ کی۔ ان کا اعترافی بیان بھی نشر کیا گیا۔

گاؤ گزشتہ دو ہفتے سے لاپتہ تھیں۔ ان کے معاونین کو اس وقت تشویش ہوئی جب وہ ابدی امن کے چوک میں 1989ء میں ہونے والی خونریز کارروائی سے متعلق ایک اجتماع میں نہ پہنچیں۔

چین کے سرکاری خبر رساں ادارے سنہوا کے مطابق انہیں 24 اپریل کو حراست میں لیا گیا تھا۔ ان پر ایک انتہائی خفیہ دستاویز ایک غیرملکی ویب سائٹ کو بھیجنے کا شبہ تھا۔

سنہوا کے مطابق پولیس کو ان کے قبضے سے ٹھوس ثبوت ملے ہیں اور گاؤ نے اپنے کیے پر انتہائی ندامت کا اظہار کیا ہے۔ رپورٹ میں یہ بھی کہا گیا ہے کہ وہ قانون کے تحت دی جانے والی سزا قبول کرنے پر تیار ہیں۔ اے ایف پی کے مطابق سنہوا کی رپورٹ میں یہ نہیں بتایا گیا کہ گاؤ نے کونسی دستاویزات غیر ملکی ذرائع کے حوالے کیں۔

تاہم یہ معلومات افشا کرنے کا واقعہ گزشتہ برس کے اوائل کا ہے۔ ہانگ کانگ کے ایک میگزین نے یہ معلومات گزشتہ برس اگست میں شائع کی تھیں۔

اکنامکس ویکلی کی سابق ایڈیٹر اِن چیف گاؤ ایک معروف صحافی ہیں، جنہیں 2000ء میں انٹرنیشنل پریس انسٹی ٹیوٹ کی جانب سے پچاس ’ورلڈ پریس فریڈم ہیروز‘ کی فہرست میں شامل کیا گیا تھا۔

اے ایف پی کے مطابق گاؤ کی گرفتاری حکمران کمیونسٹ پارٹی کے ناقدین کو خاموش کرانے کا تازہ واقعہ ہے جو ایسے وقت پیش آیا ہے جب آئندہ ماہ تیانانمن اسکوائر کے کریک ڈاؤن کو پچیس برس مکمل ہونے کو ہیں۔

ان کے سیاسی تجزیوں کی پاداش میں ماضی میں بھی انہیں گرفتار کیا جا چکا ہے۔ ریاستی راز افشا کرنے کے ایسے ہی الزامات پر 1993ء میں انہیں چھ سال قید کی سزا ہوئی تھی۔