چیک ری پبلک میں دو مسافر ٹرینیں ٹکرانے کا یہ واقعہ آج بدھ چار اگست کو مقامی وقت کے مطابق صبح آٹھ کے قریب پیش آیا۔ مقامی حکام کے مطابق یہ ٹرینیں میلاویس نامی گاؤں میں ٹکرائیں۔

چیک جمہوریہ کی پولیس کی طرف سے اپنے ٹوئیٹر اکاؤنٹ پر اس واقعے سے متعلق اطلاع دیتے ہوئے لکھا گیا ہے، ''ہم اس بات کی تصدیق کر سکتے ہیں کہ دو افراد ہلاک ہوئے ہیں۔ درجنوں دیگر افراد کے زخمی ہونے کی بھی اطلاع ملی ہے۔ ہم مسافروں کو وہاں نے نکالنے میں مدد کر رہے ہیں۔‘‘

چیک جمہوریہ کے ٹرانسپورٹ منسٹر کاریل ہاولیچیک نے اپنے ٹوئیٹر پر اس بات کی تصدیق کی کہ ٹکرانے والی ٹرینوں میں سے ایک Ex 351 ٹرین تھی، جو چیک ریلوے کی ویب سائٹ کے مطابق میونخ سے پراگ کے درمیان سفر کرنے والی تیز رفتار ٹرین ہے۔

ہاولیچیک حادثے کے مقام کی طرف روانہ ہو گئے ہیں۔ اس موقع پر ان کا کہنا تھا کہ Ex 351 نے سگنل کا خیال نہ رکھا اور ایک علاقائی ٹرین میں جا ٹکرائی۔‘‘ چیک وزیر ریلوے کے مطابق ''صورتحال نازک ہے‘‘

چیک ریلوے کے مطابق ایک تیز رفتار بین الاقوامی ٹرین، جو ملک کے مغربی شہر پلیزنیے کو جرمن شہر میونخ سے ملاتی ہے، وہ ایک علاقائی مسافر ٹرین سے ٹکرائی۔

چیک جمہوریہ کی سی ٹی کے نیوز ایجنسی نے امدادی کارکنوں کے حوالے سے بتایا ہے کہ اس واقعے میں 50 کے قریب مسافر زخمی ہوئے ہیں۔

گزشتہ برس یکم جولائی کو بھی چیک ری پبلک میں دو مسافر ٹرینیں ٹکرائی تھیں، جس کے نتیجے میں تین افراد ہلاک ہوئے تھے جبکہ درجنوں دیگر زخمی ہوئے تھے۔

ا ب ا/ع ب (اے پی، روئٹرز، اے ایف پی)