جنوب مشرقی ایشیائی ملکوں کو گزشتہ چند ماہ سے کووڈ وبا کی نئی لہر کا سامنا ہے۔ اس علاقے کے ممالک لاؤس اور ویتنام شدید متاثر ہیں۔ سن 2020 میں یہ دونوں ممالک وبا کی شدت سے بچ گئے تھے لیکن اب انہیں بڑھتے انفیکشن کی شدت کا مقابلہ ہے۔ اس ریجن میں سب سے زیادہ متاثر ملک انڈونیشیا ہے۔

آبادی کے لحاظ سے سب سے بڑے مسلمان ملک مین کووڈ سے ہونے والی ہلاکتوں کی تعداد تہتر ہزار سے تجاوز کرچُکی ہے۔ وبا کی شروع ہونے کے بعد اٹھائیس لاکھ افراد کو انفیکشن ہو چکا ہے۔ اس وقت اس ملک میں انفیکشن کی شرح بھارت اور برازیل سے زیادہ ہے۔ شہریوں کو آکسیجن سیلنڈرز اور ہسپتالوں میں بیڈز کی کمیابی کا سامنا ہے۔

انڈونیشی نظام صحت اور ہسپتالوں کو کووڈ مریضوں کی غیر معمولی تعداد کا سامنا ہے۔ دو سوستر ملین کی آبادی والے ملک کو مئی میں روزوں کے اختتام اور عید کے موقع پر لاکھوں افراد کے سفر اختیار کرنے کے بعد کورونا انفیکشن کی شدت کا سامنا ہے۔ اس انفیکشن کی لہر میں ڈیلٹا کی افزائش بہت زیادہ ہوئی۔

سن 2020 میں ویتنامی حکام نے کورونا وائرس کو محدود کرنے میں کامیابی حاصل کی تھی لیکن اب وائرس کی ڈیلٹا ویریئنٹ کی افزائش نے صورت حال بدل دی ہے۔ اس ویریئنٹ سے انفیکشن کی شرح بڑھ چکی ہے۔ ویتنامی حکومت نے سارے جنوبی علاقے میں دو ہفتوں کا لاک ڈاؤن لگا رکھا ہے۔ دوسری جانب انفیکشن میں مسلسل اضافہ ہوتا جا رہا ہے۔

تھائی مظاہرین وزیر اعظم پرائیتھ چن اوچا کے مستعفی ہونے کا مطالبہ کر رہے ہیں کیونکہ وہ کووڈ انیس وبا کو کنٹرول کرنے کے مناسب انتظامات کرنے میں ناکام رہے ہیں۔ مختلف شہروں میں مظاہرے جاری ہیں۔ ہسپتالوں پر مریضوں کی بڑھتی تعداد سے دباؤ بھی بڑھ چکا ہے۔ اس ملک میں اپریل کے بعد انفیکشن بڑھنے کے ساتھ ہلاکتیں بھی بڑھی ہیں۔

کورونا وبا سے تھائی سیاحتی صنعت شدید متاثر ہوئی ہے۔ بنکاک اور دیگر صوبوں میں کووڈ انیس کی افزائش جاری ہے اور حکام اس کو قابو کرنے کی کوشش میں ہیں۔ حکومت مقبول سیاحتی جزیرے پھوکٹ کو دوبارہ کھولنے کی کوشش میں ہے تا کہ ملکی اقتصادیات کو سنبھالا مل سکے۔

تھائی حکومت ویکسین حاصل کرنے میں سست رہی ہے۔ اس ملک میں اہم ملازمین کو رواں برس فروری میں ویکسین لگانی شروع کی گئی۔ جون سے بڑے پیمانے پر ویکسین لگانے کی مہم شروع ہوئی۔ اس میں ایسٹرا زینیکا اور چینی سائنو ویک ویکسینز شامل تھیں۔ ویکسین لگانے کا سلسلہ سست اور ناقص قرار دیا گیا ہے۔

ملائیشیا کو کووڈ لاک ڈاؤن کی مشکل کا سامنا ہے۔ لوگ مدد کے منفرد طریقے اپنا رہے ہیں۔ ان میں ایک گھر پر سفید جھنڈا لہرا رہا ہے کہ یعنی اس گھر والوں کو مدد درکار ہے۔ سفید جھنڈا لہرانے کو سوشل میڈیا پر بھی تشہیر ملی ہے۔ کووڈ انفیکشن کو کنٹرول کرنے کے لیے ملائیشیا میں یکم جون سے سخت لاک ڈاؤن کا نفاذ ہو چکا ہے۔

میانمار میں فوجی بغاوت نے عوام کی ہیلتھ کیئر پالیسی کو درہم برہم کر دیا ہے۔ کئی ڈاکٹروں نے اپوزیشن کی حمایت میں ہسپتالوں میں نوکری جاری رکھنے سے انکار کر دیا ہے۔ اقوام متحدہ متنبہ کر چکی ہے کہ یہ ملک وائرس پھیلانے والا سب سے تیز رفتار ملک بن سکتا ہے۔ میانمار میں انفیکشن کی شرح زیادہ اور ویکسین لگانے کی رفتار بہت سست ہے۔

جنوبی مشرقی ایشیائی ممالک کی طرح فلپائن کو بھی ویکسین کی محدود فراہمی کا سامنا ہے۔ صحت کے ماہرین کا خیال ہے کہ اس ملک میں شاید سب سے آخر میں کورونا وائرس کے خلاف مدافعتی دوا پہنچے گی۔ ویکسینیشن بہت سست ہے اور اس رفتار سے اگلے دو سالوں میں پچھتر فیصد آبادی کو ویکسین لگانے کا امکان ہے۔