خبر رساں ادارے ایسوسی ایٹڈ پریس کے مطابق سراج الدین حقانی کی طرف سے اتوار 11 جون کو دیر گئے جاری کیے جانے والے ایک آڈیو پیغام میں کابل میں 31 مئی کو ہونے والے خودکش ٹرک بم حملے کی مذمت کی گئی ہے۔ اس دھماکے میں کم از کم 150افراد ہلاک ہوئے تھے۔ اس حملے کے بعد دیگر کئی حملے ہوئے جن میں مرنے والوں کے جنازے پر حملہ اور پھر افغان صوبہ ہرات میں ایک مسجد کے قریب کیا جانے والے دہشت گردانہ حملہ بھی شامل ہیں۔
افغان سکیورٹی حکام نے کابل حملے کی ذمہ داری حقانی نیٹ ورک پر عائد کی تھی۔ تاہم سراج الدین حقانی نے یہ بات زور دے کر کہی ہے کہ طالبان نے ان میں سے کوئی بھی حملہ نہیں کیا۔ حقانی کا یہ بھی کہنا تھا کہ طالبان کسی ایسے حملے کا منصوبہ نہیں بناتے جس میں عام شہریوں کو نقصان پہنچتا ہو۔ ان تینوں حملوں میں سے کسی کی بھی ذمہ داری ابھی تک کسی نے قبول نہیں کی۔
افغان صدر اشرف غنی نے گزشتہ ہفتے کابل میں ہونے والے ٹرک بم حملے کے نتیجے میں 150 ہلاکتوں کی تصدیق کی تھی۔ امریکا کی طرف سے افغانستان میں طالبان کو شکست دینے کے لیے شروع کی جانے والی مہم کے آغاز سے اب تک کے 16 برسوں کا یہ خونریز ترین دہشت گردانہ حملہ تھا۔ اس حملے میں 300 سے زائد افراد زخمی بھی ہوئے۔
افغان حکام نے کابل حملے کی ذمہ داری حقانی نیٹ ورک اور پاکستان پر عائد کی تھی تاہم اسلام آباد حکومت نے ان الزامات کی تردید کی۔ دونوں ہمسایہ ممالک اکثر ایک دوسرے پر الزام عائد کرتے رہتے ہیں کہ وہ سرحد کے آر پار حملے کرنے والے عسکریت پسندوں کے خلاف کارروائی نہیں کر رہے۔ افغانستان میں حالیہ برسوں کے دوران داعش نے جگہ بنا لی ہے اور ملک میں کئی بڑے حملے کر چکی ہے۔
سراج الدین حقانی نے اپنے صوتی پیغام میں کہا کہ طالبان حالیہ دہشت گردانہ حملوں میں تو ملوث نہیں ہیں تاہم اس کے جنگجو اس وقت تک جنگ کرتے رہیں گے جب تک ’’غیر ملکی حملہ آور‘‘ افغانستان کو چھوڑ نہیں دیتے۔
افغان دارالحکومت کابل میں ہوئے تازہ کار بم حملے کے نتیجے میں چار سو سے زائد افراد ہلاک یا زخمی ہو گئے ہیں۔
تصویر: Reuters/O. Sobhaniافغان وزارت داخلہ کے ترجمان نجیب دانش نے بتایا ہے کہ یہ دھماکا مقامی وقت کے مطابق صبح ساڑھے آٹھ بجے ہوا۔
یہ حملہ زنباق اسکوائر کے نزدیک ہوا، جہاں قریب ہی حکومتی دفاتر کے علاوہ افغان صدر کا دفتر بھی ہے۔
اس ٹرک بم حملے کے نتیجے میں کم از کم اسّی افراد ہلاک جبکہ ساڑھے تین سو زخمی ہو گئے ہیں۔
دھماکے کے بعد جائے حادثہ سے اٹھنے والے دھوئیں کے بادلوں نے شہر کو اپنی لپیٹ میں لے لیا۔
افغان طالبان نے کابل میں ہونے والے تازہ بم حملے کی ذمہ داری قبول کرنے سے انکار کر دیا ہے۔
افغان صدر اشرف غنی نے اس حملے کی شدید الفاظ میں مذمت کی ہے۔ انہوں نے اسے ایک ’بزدلانہ کارروائی‘ قرار دیتے ہوئے کہا کہ اس طرح حکومت کے حوصلے پست نہیں ہوں گے۔
جرمن وزیر خارجہ زیگمار گابریئل نے تصدیق کر دی ہے کہ کابل میں ہوئے اس حملے کی وجہ سے وہاں واقع جرمن سفارتخانہ بھی متاثر ہوا ہے۔ انہوں نے کہا کہ اس واقعے میں عمارت کے باہر موجود افغان سکیورٹی گارڈ مارا گیا جبکہ عملے کے دیگر مقامی ارکان بھی زخمی ہوئے ہیں۔
دھماکے کی شدت کو دیکھتے ہوئے ملکی وزارت صحت نے خدشہ ظاہر ہے کہ ہلاکتوں کی تعداد میں مزید اضافہ ہو جائے گا۔
اس دھماکے کی وجہ سے تیس گاڑیاں بھی تباہ ہو گئیں جبکہ قریبی عمارتوں کو بھی نقصان پہنچا۔
طبی ذرائع کے مطابق اس بم حملے میں سینکڑوں افراد زخمی ہوئے، جن میں سے کئی کی حالت نازک ہے۔
فرانسیسی وزارت خارجہ نے بھی تصدیق کر دی ہے کہ اس دھماکے کے باعث کابل میں فرانس کے سفارتخانے کو بھی نقصان پہنچا ہے۔
پاکستان کی طرف سے بھی اس خونریز کارروائی پر کابل حکومت کے ساتھ اظہار افسوس کیا گیا ہے۔
