افغان دارالحکومت میں ایک حکومتی کمپاؤنڈ پر حملے کے نتیجے میں کم ازکم 43 افراد مارے گئے ہیں۔ کرسمس کے موقع پر کیے گئے اس حملے کو رواں سال کے دوران کابل میں ہونی والی خونریز ترین کارروائیوں میں سے ایک قرار دیا جا رہا ہے۔
تصویر: picture-alliance/AP Photo/R. Gul
اشتہار
خبر رساں ادارے اے ایف پی نے افغان حکام کے حوالے سے منگل کے دن بتایا کہ کئی گھنٹے تک جاری رہنے والی اس خونریز کارروائی کے نتیجے میں کم از کم تینتالیس افراد ہلاک جبکہ پچیس زخمی ہو گئے۔ کسی بھی گروہ نے ابھی تک اس حملے کی ذمہ داری قبول نہیں کی۔
افغان وزارت دفاع کے ایک اعلیٰ اہلکار نے بتایا کہ چوبیس دسمبر کو دوپہر کے وقت جنگجوؤں نے اچانک حملہ کر دیا تھا۔ بتایا گیا ہے کہ پہلے مرکزی دروازے پر ایک خود کش حملہ کیا گیا اور پھر عسکریت پسند فائرنگ کرتے ہوئے عمارت میں داخل ہو گئے۔
اس حملے کے شروع ہونے کے بعد سینکڑوں افراد حکومتی کمپاؤنڈ میں محصور ہو گئے تاہم اضافی سکیورٹی فورسز نے فوری کارروائی کرتے ہوئے اس حملے کو ناکام بنا دیا۔ عینی شاہدین کے مطابق جنگجوؤں اور سکیورٹی فورسز کے مابین شدید لڑائی ہوئی اور اس دوران کئی دھماکے بھی سنے گئے۔
افغان حکام نے بتایا ہے کہ سیکورٹی فورسز کی جوابی کارروائی کے نتیجے میں خود کش حملہ آور کے علاوہ پانچ عسکریت پسند بھی ہلاک ہوئے۔ اس حملے کے بعد اس عمارت سے ساڑھے تین سو افراد کو محفوظ طریقے سے نکال لیا گیا۔ حکام کے مطابق ہلاک شدگان میں سے زیادہ تر شہری ہیں۔
طالبان کے ترجمان ذبیح اللہ مجاہد نے ایک بیان میں کہا ہے کہ اس حملے میں طالبان ملوث نہیں تھے۔ مجاہد کے مطابق اس حملے کا ’طالبان سے کوئی تعلق نہیں‘۔ اس حملے کو سن دو ہزار اٹھارہ کے دوران کابل میں ہونے والی خونریز ترین کارروائیوں میں سے ایک قرار دیا جا رہا ہے۔ اس سے قبل ملکی دارالحکومت میں کسی ایک حملے میں اس سال زیادہ سے زیادہ پچپن افراد مارے گئے تھے۔ یہ حملہ گزشتہ ماہ ایک مذہبی تقریب کے دوران کیا گیا تھا۔
افغان صدر اشرف غنی نے اس تازہ حملے کی مذمت کرتے ہوئے کہا ہے کہ میدان جنگ میں اپنی شکست کو چھپانے کی خاطر یہ جنگجو اب شہری اہداف کو نشانہ بنا رہے ہیں۔ افغان چیف ایگزیکٹیو عبداللہ عبداللہ نے اس حملے کی ذمہ داری طالبان پر عائد کرتے ہوئے کہا ہے کہ شدت پسندی کے خاتمے کے لیے حکومتی عزم متزلزل نہیں ہو گا، ’’ہمارے لوگوں کے خلاف ہر حملہ، ہمارے عزم کو مضبوط کرے گا کہ ان (جنگجوؤں) کا خاتمہ کر دیا جائے۔‘‘
دوسری طرف فریاب اور ننگرہار صوبوں میں ہونے والی پرتشدد کارروائیوں کے نتیجے میں بھی بارہ سکیورٹی اہلکار مارے گئے ہیں۔ حکام کے مطابق طالبان کے ان حملوں کی وجہ سے چار سکیورٹی اہلکار فریاب میں اور آٹھ ننگرہار میں ہلاک ہوئے۔ ان پرتشدد کارروائیوں کی وجہ سے ایک درجن سے زائد سکیورٹی اہلکار زخمی بھی ہوئے۔
ع ب / م م / خبر رساں ادارے
افغانستان کے بڑے جنگی سردار
کئی سابق جنگی سردار اب ملکی سیاست میں بھی فعال ہیں یا ہو رہے ہیں۔ ایک نظر ڈالتے ہیں ایسے ہی کچھ اہم افغان جنگی سرداروں پر، جن میں سے چند اب اس دنیا میں نہیں رہے اور کچھ تاحال ملک میں اپنا اثر و رسوخ برقرار رکھے ہوئے ہیں۔
ملا داد اللہ
انیس سو اسی کی دہائی میں سوویت فورسز کے خلاف لڑائی میں ملا داد اللہ کی ایک ٹانگ ضائع ہو گئی تھی۔ مجاہدین کے اس کمانڈر کو طالبان کی حکومت میں وزیر تعمیرات مقرر کیا گیا تھا۔ خیال کیا جاتا ہے کہ وہ ملا محمد عمر کا قریبی ساتھی تھا۔ داد اللہ سن دو ہزار سات میں امریکی اور برطانوی فورسز کی ایک کارروائی میں مارا گیا تھا۔
تصویر: AP
عبدالرشید دوستم
افغانستان کے نائب صدر عبدالرشید دوستم افغان جنگ کے دوران ایک ازبک ملیشیا کے کمانڈر تھے، جنہوں نے اسی کی دہائی میں نہ صرف مجاہدین کے خلاف لڑائی میں حصہ لیا اور نوے کے عشرے میں طالبان کے خلاف لڑائی میں بھی بلکہ انہیں طالبان قیدیوں کے قتل عام کا ذمہ دار بھی قرار دیا جاتا ہے۔ سن دو ہزار تین میں انہوں نے خانہ جنگی کے دوران کی گئی اپنی کارروائیوں پر معافی بھی مانگ لی تھی۔
تصویر: picture-alliance/AA/M. Kaynak
محمد قسيم فہیم
مارشل فہیم کے نام سے مشہور اس جنگی سردار نے احمد شاہ مسعود کے نائب کے طور پر بھی خدمات سر انجام دیں۔ سن 2001 میں مسعود کی ہلاکت کے بعد انہوں نے شمالی اتحاد کی کمان سنبھال لی اور طالبان کے خلاف لڑائی جاری رکھی۔ وہ اپنے جنگجوؤں کی مدد سے کابل فتح کرنے میں کامیاب ہوئے اور بعد ازاں وزیر دفاع بھی بنائے گئے۔ وہ دو مرتبہ افغانستان کے نائب صدر بھی منتخب کیے گئے۔ ان کا انتقال سن دو ہزار چودہ میں ہوا۔
تصویر: picture-alliance/AP Photo
گلبدین حکمت یار
افغان جنگ کے دوران مجاہدین کے اس رہنما کو امریکا، سعودی عرب اور پاکستان کی طرف سے مالی معاونت فراہم کی گئی تھی۔ تاہم اپنے حریف گروپوں کے خلاف پرتشدد کارروائیوں کے باعث حکمت یار متنازعہ ہو گئے۔ تب انہوں نے اپنی پوزیشن مستحکم کرنے کی خاطر یہ کارروائیاں سر انجام دی تھیں۔ حزب اسلامی کے رہنما گلبدین حکمت یار کو امریکا نے دہشت گرد بھی قرار دیا تھا۔ اب وہ ایک مرتبہ پھر افغان سیاست میں قدم رکھ چکے ہیں۔
تصویر: picture-alliance/AP Photo/K. Jebreili
محمد اسماعیل خان
محمد اسماعیل خان اب افغان سیاست میں اہم مقام رکھتے ہیں۔ انہوں نے صوبے ہرات پر قبضے کی خاطر تیرہ برس تک جدوجہد کی۔ بعد ازاں وہ اس صوبے کے گورنر بھی بنے۔ تاہم سن 1995 میں جب ملا عمر نے ہرات پر حملہ کیا تو اسماعیل کو فرار ہونا پڑا۔ تب وہ شمالی اتحاد سے جا ملے۔ سیاسی پارٹی جماعت اسلامی کے اہم رکن اسماعیل خان موجودہ حکومت میں وزیر برائے پانی اور توانائی کے طور پر فرائض سر انجام دے رہے ہیں۔
تصویر: AP
محمد محقق
محمد محقق نے بھی اسّی کی دہائی میں مجاہدین کے ساتھ مل کر سوویت فورسز کے خلاف لڑائی میں حصہ لیا۔ سن 1989 میں افغانستان سے غیر ملکی فوجیوں کے انخلا کے بعد انہیں شمالی افغانستان میں حزب اسلامی وحدت پارٹی کا سربراہ مقرر کر دیا گیا۔ ہزارہ نسل سے تعلق رکھنے والے محقق اس وقت بھی ملکی پارلیمان کے رکن ہیں۔ وہ ماضی میں ملک کے نائب صدر بھی منتخب کیے گئے تھے۔
تصویر: DW
احمد شاہ مسعود
شیر پنجشیر کے نام سے مشہور احمد شاہ مسعود افغان جنگ میں انتہائی اہم رہنما تصور کیے جاتے تھے۔ انہوں نے طالبان کی پیشقدمی کو روکنے کی خاطر شمالی اتحاد نامی گروہ قائم کیا تھا۔ انہیں سن انیس سو بانوے میں افغانستان کا وزیر دفاع بنایا گیا تھا۔ انہیں نائن الیون کے حملوں سے دو دن قبل ہلاک کر دیا گیا تھا۔ تاجک نسل سے تعلق رکھنے والے مسعود کو ایک اہم افغان سیاسی رہنما سمجھا جاتا تھا۔
تصویر: AP
ملا محمد عمر
افغان جنگ میں مجاہدین کے شانہ بشانہ لڑنے والے ملا عمر طالبان کے روحانی رہنما تصور کیا جاتے تھے۔ وہ سن 1996تا 2001 افغانستان کے غیر اعلانیہ سربراہ مملکت رہے۔ تب انہوں کئی اہم افغان جنگی سرداروں کو شکست سے دوچار کرتے ہوئے ’اسلامی امارات افغانستان‘ کی بنیاد رکھی تھی۔ سن دو ہزار ایک میں امریکی اتحادی فورسز کے حملے کے بعد ملا عمر روپوش ہو گئے۔ 2015 میں عام کیا گیا کہ وہ 2013 میں ہی انتقال کر گئے تھے۔
تصویر: picture-alliance/dpa
گل آغا شیرزئی
مجاہدین سے تعلق رکھنے والے سابق جنگی سردار شیرزئی نے نجیب اللہ کی حکومت کا تختہ الٹنے میں اہم کردار ادا کیا تھا۔ وہ دو مرتبہ قندھار جبکہ ایک مرتبہ ننگرہار صوبے کے گورنر کے عہدے پر فائز رہے۔ طالبان نے جب سن انیس سو چورانوے میں قندھار پر قبضہ کیا تو وہ روپوش ہو گئے۔ سن دو ہزار ایک میں انہوں نے امریکی اتحادی فورسز کے تعاون سے اس صوبے پر دوبارہ قبضہ کر لیا۔
تصویر: picture-alliance/dpa
عبدالرب رسول سیاف
سیاف ایک مذہبی رہنما تھے، جنہوں نے افغان جنگ میں مجاہدین کا ساتھ دیا۔ اس لڑائی میں وہ اسامہ بن لادن کے قریبی ساتھیوں میں شامل ہو گئے تھے۔ کہا جاتا ہے کہ سیاف نے پہلی مرتبہ بن لادن کو افغانستان آنے کی دعوت دی تھی۔ افغان جنگ کے بعد بھی سیاف نے اپنے عسکری تربیتی کیمپ قائم رکھے۔ انہی کے نام سے فلپائن میں ’ابو سیاف‘ نامی گروہ فعال ہے۔ افغان صدر حامد کرزئی نے انہیں اپنی حکومت میں شامل کر لیا تھا۔