خبر رساں ادارے روئٹرز کے مطابق منگل کو حملہ آوروں نے کابل کے مغربی علاقے دارالامان میں پہلے تو اشرف غنی کے گھر کے قریب انڈیپینڈینٹ الیکشن کمیشن (آئی ای سی) کے دفتر میں دھماکے کیے۔ پولیس نے علاقے کو گھیرے میں لے لیا جس کے بعد فائرنگ کا سلسلہ دیر تک جاری رہا۔

وزارتِ داخلہ کے مطابق پہلے دو دھماکے ہوئے، جن کے بعد فائرنگ کا سلسلہ شروع ہو گیا۔ خبر رساں ادارے اے ایف پی کے مطابق وزارتِ داخلہ کا کہنا ہے کہ اس حملے میں دو شہری زخمی ہوئے ہیں۔

طالبان نے اس حملے کی ذمہ داری قبول کر لی ہے۔ طالبان نے کہا کہ ان کے خود کُش حملہ آور عمارت میں داخل ہوئے اور انہوں نے خود کو دھماکوں سے اڑا دیا۔

اشرف غنی ورلڈ بینک کے سابق ملازم ہے۔ اس حملے کے وقت وہ گھر پر نہیں تھے۔ ابتداء میں پولیس نے دعویٰ کیا تھا کہ اشرف غنی کے گھر پر حملہ ہوا ہے۔ تاہم بعد ازاں غنی کی انتخابی مہم کے ایک معاون نے بتایا کہ حملہ ایک قریبی عمارت پر ہوا تھا جس میں صوبائی الیکشن آفس قائم ہے۔

اس معاون کا کہنا تھا: ’’یہ حملہ اشرف غنی کے گھر کے قریب الیکشن کمیشن کے دفتر پر ہوا۔ غنی کا گھر بھی اس حملے کی زد میں آیا۔ وہ گھر پر نہیں تھے لیکن ان کے اہل خانہ گھر پر ہی تھے۔‘‘

اشرف غنی نے اس حملے کے بعد سماجی رابطے کی ویب سائٹ ٹوئٹر پر ایک بیان میں کہا: ’’ابھی گردیز (کابل کے جنوبی علاقے) کی ریلی میں پہنچا ہے، جہاں ہزاروں لوگ جمع ہے۔‘‘

خیال رہے کہ افغانستان میں پانچ اپریل کو صدارتی انتخابات ہونے والے ہیں۔ اس تناظر میں دارالحکومت کابل میں سکیورٹی ہائی الرٹ پر ہے۔ افغان طالبان نے انتخابی عمل کو سبوتاژ کرنے کی دھمکی دے رکھی ہے۔

طالبان شدت پسندوں نے رواں ماہ ہی صدارتی انتخابات کو نشانہ بنانے کی دھمکی دی تھی۔ انہوں نے اپنے ارکان پر زور دیا تھا کہ پانچ اپریل کے انتخابات سے پہلے وہ انتخابی عملے، ووٹروں اور سکیورٹی فورسز کو نشانہ بنائیں۔

کابل میں تعینات اقوام متحدہ کے نمائندہ خصوصی ژان کیوبس نے بھی پیر کو ایک بیان میں کہا تھا کہ افغانستان میں انتخابات کی وجہ سے پرتشدد کارروائیوں میں اضافہ ہو رہا ہے۔ انہوں نے نیویارک میں اقوام متحدہ کی سلامتی کونسل سے خطاب کے موقع پر کہا تھا: ’’ان انتخابات پر سکیورٹی کی صورتِ حال کا بہت زیادہ اثر ہو گا۔‘‘

منگل کو ہی مشرقی صوبے کنڑ میں تین خود کُش حملہ آور کابل بینک کی ایک شاخ میں داخل ہو گئے۔ پولیس کے مطابق اس حملے میں کم از کم تین سکیورٹی اہلکار ہلاک اور بینک کے دو ملازمین زخمی ہوئے۔