کابل میں خود کُش بم حملہ: کم از کم چھ ہلاکتیں
2 اپریل 2014![](https://static.dw.com/image/16995437_800.webp)
خبر رساں ایجنسی روئٹرز کے مطابق آج بُدھ کو وزرات داخلہ کی عمارت کے سامنے خود کُش بم حملہ آور نے خود کو دھماکے سے اڑا لیا۔ وزارت کی طرف سے سامنے آنے والے فوری بیان کے مطابق، ’’فوجی وردی میں ملبوس حملہ آور نے وزارت داخلہ کے مرکزی دروازے کے سامنے آکر خود کو دھماکے سے اڑا لیا۔‘‘ وزارت کے ترجمان نے مزید کہا، ’’حملہ آور نے چند پولیس اہلکاروں کو دیکھتے ہی خود کو دھماکا خیز مواد سے اڑالیا۔ اُس کے لیے خود کُش جیکٹ کے ساتھ وزارت کی عمارت میں داخل ہونا ممکن نہیں تھا۔‘‘
یہ بم دھماکہ ایک ایسے وقت میں ہوا جب 5 اپریل کے مجوزہ صدارتی انتخابات سے پہلے آج بُدھ دو اپریل کو افغانستان میں انتخابی مہم کے آخری دن کی سرگرمیاں جاری تھیں۔ اس بار کے صدارتی الیکشن کو افغانستان کی تاریخ کا پہلا جمہوری انتقال اقتدار تصور کیا جا رہا ہے۔
دریں اثناء طالبان نے ایک ای میل میں اس کارروائی کی ذمہ داری قبول کرتے ہوئے کہا ہے، ٫٫خود کُش بم حملہ آور نے وزارت داخلہ کی عمارت کے اندر سکیورٹی کے تین مراحل طے کرنے کے بعد خود کو دھماکے سے اڑا لیا۔‘‘
طالبان نے انتخابی مہم کو سبوتاژ کرنے کے لیے اپنی کارروائیوں میں تیزی پیدا کر دی ہے۔ ان کے حملوں کا ہدف اس وقت الیکشن کا انتظام کرنے والے اور غیر ملکی ہیں تاہم پانچ اپریل کے صدارتی الیکشن کی سرگرمیاں اور انتخابی مہم اس بار بڑی حد تک بغیر کسی خلل کے جاری رہیں۔
قبل ازیں گزشتہ ہفتے کے روز افغان طالبان کی طرف سے کابل میں الیکشن کمیشن کی مرکزی عمارت پر بھاری اسلحے کے ساتھ حملہ کیا گیا تھا۔ افغان حکام کے مطابق چار گھنٹے تک جاری رہنے والی اُس لڑائی کے بعد افغان سکیورٹی فورسز نے پانچ حملہ آوروں کو ہلاک کر دیا تھا۔ سکیورٹی خدشات کے باعث ملحقہ ایئر پورٹ کو بھی بند کر دیا گیا تھا۔ افغان پولیس کے مطابق ہفتے کے روز کابل میں ہونے والے حملوں میں گرینیڈز اور بھاری مشین گنوں کا بھی استعمال کیا گیا تھا۔ طالبان کے ترجمان ذبیح اللہ مجاہد نے اس حملے کی ذمہ داری قبول کرتے ہوئے کہا تھا کہ ان کے ایک خودکش اور مسلح حملہ آوروں نے الیکشن کمیشن کی عمارت پر اس وقت دھاوا بولا جب الیکشن مبصرین، جن میں غیر ملکی بھی شامل تھے، اور افغان الیکشن کا عملہ ایک میٹینگ جاری رکھے ہوئے تھے۔