کابل ہوٹل حملے میں غیرملکی خفیہ سروس ملوث تھی، افغان صدارتی دفتر
24 مارچ 2014![](https://static.dw.com/image/17511761_800.webp)
افغان صدارتی دفتر کی جانب سے یہ بیان ملکی خفیہ ایجنسی کی جانب سے مہیا کردہ معلومات کی بنیاد پر سامنے آیا ہے۔ اس بیان میں کہا گیا ہے کہ جمعے کے روز کابل میں سیرینا ہوٹل پر ہونے والے حملے سے متعلق ملکی خفیہ ایجنسی نے کابل حکومت کے سلامتی امور کے اعلیٰ عہدیداروں کو بریفنگ دی۔ بیان میں کہا گیا ہے کہ ملکی خفیہ ایجنسی کے مطابق یہ حملہ ایک غیرملکی خفیہ سروس نے براہ راست کیا۔
اس بیان میں یہ نہیں کہا گیا ہے کہ اس حملے میں کون سے ملک کی خفیہ سروس ملوث تھی، تاہم افغان حکومت متواتر اسلام آباد حکومت پر ایسے الزامات عائد کرتی رہتی ہے کہ وہ اپنے ملک سے عسکریت پسندوں کو افغانستان میں حملوں کے لیے بھیجتی ہے۔ فی الحال افغان صدارتی دفتر کے اس بیان پر اسلام آباد حکومت کی جانب سے کوئی ردعمل ظاہر نہیں کیا گیا ہے۔
بیان کے مطابق اس حملے میں نہ تو حقانی گروپ ملوث تھا اور نہ ہی طالبان، بلکہ اس حملے سے متعلق یہ دونوں گروپ مکمل بے خبر تھے۔
افغان نیشنل سکیورٹی کونسل کو یہ بھی بتایا گیا کہ اس حملے سے کچھ روز قبل ایک پاکستانی سفارت کار کو سیرینا ہوٹل کے اندر فلم بندی کرتے ہوئے بھی دیکھا گیا۔ واضح رہے کہ گزشتہ جمعے کو چار مسلح حملہ آوروں نے کس طرح اپنے جوتوں میں چھوٹے ہتھیار چھپا رکھے تھے، جنہیں انہوں نے اس حملے میں استعمال کیا اور ہوٹل کی سکیورٹی یہ ہتھیار انہیں ہوٹل کے اندر لے جانے سے نہ روک پائی۔ ان افراد نے ہوٹل کے اندر پہنچنے پر ریسٹورنٹ میں عام افراد کو پوائنٹ بلینک رینج سے فائرنگ کا نشانہ بنایا۔ خیال رہے کہ فائرنگ کی وجہ سے ریسٹورنٹ میں بھگدڑ مچ گئی، جس کی وجہ سے خبر رسان ادارے اے ایف پی کا ایک مقامی رپورٹر سردار خان بھی ہلاک ہو گیا، جبکہ ان کا نومولود بیٹا اس وقت تشویشناک صورتحال میں ہسپتال میں ہے۔ اس کے علاوہ ہلاک ہونے والوں میں دو بچوں کے ساتھ ساتھ دو کینیڈین اور ایک امریکی شہری بھی شامل تھے۔