کاسترو کی صحت میں بہتری کے آثار
24 اگست 2009![](https://static.dw.com/image/4595265_800.webp)
اتوار کے روز کیوبا کے سرکاری ٹی وی پر نشر کی جانے والی اس ویڈیو میں سابق کیوبن صدر پڑوسی سوشلسٹ ملک وینزویلا سے آئے طلبہ کے ایک وفد سے ملاقات کرتے دکھائی دیئے۔ تین گھنٹے تک جاری رہنے والی اس ملاقات میں فیدل کاسترو نے ماحولیاتی تبدیلی اور اِس کے انسانی زندگی پر اثرات کے حوالے سے تشویش کا اظہار کیا۔
انہوں نے طلبہ کو بتایا کہ ماحولیاتی تبدیلی کے اثرات کے اہمیت کا اندازہ اس بات سے لگایا جاسکتا ہے کہ یہ مسئلہ اب امریکی محکمہء دفاع کی توجہ کا بھی مرکز بن گیا ہے، کیونکہ آب و ہوا میں تیزی سے آتی تبدیلی سے امریکہ کی سلامتی کو بھی خطرہ لاحق ہے۔
اس ویڈیو میں فیدل کاسترو گزشتہ سالوں کی نسبت کافی صحت مند دکھائی دیئے۔ گزشتہ سال جولائی میں ایک سرجری کے بعد سے وہ عوام کے سامنے نہیں آئے تھے۔ اس ویڈیو کے علاوہ کیوبا کے ایک اخبار میں ان کی ایک تصویر بھی شائع کی گئی ہے، جس میں وہ ایکواڈور کے صدر رافائیل کورّیا کے ساتھ مسکراتے ہوئے دکھائی دے رہے ہیں۔
کیوبا کے 83 سالہ سابق صدر کاسترو نےگزشتہ سال فروری کے مہینے میں صحت کی خرابی کے باعث صدارت کے عہدے دستبردار ہوگئے تھے، جس کے بعد انہوں نے اپنے بھائی اور کیوبن انقلاب میں ان کے ہمنوا راؤل کاسترو کو صدارت کے لئے نامزد کیا تھا۔
رپورٹ: انعام حسن
ادارت: عدنان اسحاق