امریکی ریاست ٹیکساس میں ایک نرس کے ابیولا وائرس سے متاثر ہونے کے بعد پولیس نے اس کے گھر کی ناکہ بندی کر دی تھی۔ یہ مغربی افریقی ممالک سے باہر ایبولا کا دوسرا واقعہ تھا۔ ہسپانوی دارالحکومت میڈرڈ میں بھی ایک نرس ایبولا سے متاثرہ ایک مریض کے علاج کے دوران اس وائرس کا شکار ہو گئی تھی۔

گزشتہ برس گینی کے ایک گاؤں میلاندو میں پہلی مرتبہ ایبولا کی نشاندہی ہوئی تھی۔ چھ دسمبر 2013ء کو دو سالہ ایک بچہ ایبولا کا شکار ہوا، جس کے بارے میں کہا جاتا ہے کہ یہ اس وائرس سے ہونے والی پہلی ہلاکت تھی۔ بعد میں اس مرض نے بچے کی بہن، والدہ اور دادی کو بھی اپنی لپیٹ میں لے لیا تھا۔ مارچ 2014ء میں گینی کی حکومت نے عالمی ادارہ صحت کو ایبولا کے پھیلاؤ کے حوالے سے اطلاع دی تھی۔

اس موقع پر ایبولا گینی سے پڑوسی ملک لائبیریا تک پہنچ چکا تھا۔ ساتھ ہی سیرا لیون میں بھی کچھ افراد میں اس وائرس کی نشاندہی ہوئی تھی۔ لائبیریا کے دارالحکومت مونروویا میں نرسیں اور ہسپتال کا دیگر عملہ آج کل ہڑتال پر ہے، جس کی وجہ سے صورت حال کے مزید بگڑنے کا اندیشہ ہے۔ سینیگال اور نائجیریا میں اس دوران اس حوالے سے حالات کافی حد تک کنٹرول میں ہیں۔

ایبولا جسم میں موجود سیال، خون کی منتقلی یا بیمار افراد کے فُضلے یا قے وغیرہ سے کسی قسم کے رابطے کی وجہ سے پھیلتا ہے۔ اسی وجہ سے گھر میں رہنے والے افراد یا ڈاکٹر اور طبی عملے کو شدید خطرات لاحق ہوتے ہیں۔ جینیوا میں عالمی ادارہ صحت کے مطابق یہ تواتر کے ساتھ ڈس انفیکشن اور حفاظتی سوٹ کے پہننے سے خود کو محفوظ رکھا جا سکتا ہے۔ ابھی تک چار سو ڈاکٹر اور طبی عملے کے افراد ایبولا کا شکار ہو چکے ہیں۔

ابھی تک چار ہزار سے زائد افراد اور دو ہزار سے زائد لاشوں میں ایبولا کی نشاندہی ہو چکی ہے۔ عالمی ادارہ صحت کی سربراہ مارگریٹ چن نے منیلا میں ہونے والی ایک کانفرنس میں کہا تھا کہ ایبولا سے پوری دنیا کو خطرہ ہے۔ ایشیا میں ابھی تک ایبولا سے ملتی جلتی اقسام سامنے آئی ہیں، جو ہلاکت خیز نہیں ہیں۔

جرمنی میں اس دوران ایبولا سے متاثرہ افراد کا علاج کیا جا رہا ہے۔ یہ مریض مغربی افریقہ سے تعلق رکھنے والے اقوام متحدہ کے کارکن ہیں۔ ان کے علاج کے لیے فرینکفرٹ اور لائپزگ میں خصوصی انتظامات کیے گئے ہیں۔ صحت کے امور سے متعلق جرمن وزیر ہیرمان گرؤہے کے بقول جرمنی میں اس وائرس کے پھیلنے کے امکانات بہت ہی کم ہیں۔

افریقہ میں مختلف قسموں کی چمگادڑوں، خاص طور پر فلائنگ فوکس کہلانے والی چمگادڑ کے جسم میں مختلف طرح کے وائرس موجود ہوتے ہیں، جن میں ایبولا کا وائرس بھی شامل ہے۔ خود ان جانوروں کے لیے بے ضرر یہ وائرس انسانوں کے لیے مہلک ثابت ہو سکتے ہیں۔ افریقہ کے بہت سے ملکوں میں لوگ بڑے سائز کی چمگادڑ کو اُس کے گوشت کی وجہ سے شکار کرتے ہیں اور یوں یہ وائرس آسانی سے انسانوں تک پہنچ جاتا ہے۔

جریدے ’پی ایل او ایس نیگلیکٹڈ ٹراپیکل ڈیزیزز‘ میں محققین نے کہا ہے کہ چمگادڑوں کی کئی اَقسام کے اندر یا تو ایک طویل عرصے سے یہ وائرس موجود تھا اور وہ ابھی تک اتفاق سے انسانوں تک نہیں پہنچا تھا یا پھر اس وائرس کی حامل کوئی چمگادڑ وسطی افریقہ سے اُن علاقوں تک پہنچی ہے، جہاں اب ایبولا ایک وبا کی سی شکل اختیار کر چکا ہے۔

بعض دفعہ چمگادڑ مختلف طرح کے پھل کھاتے ہیں اور اُنہیں پوری طرح سے ہضم کرنے سے پہلے ہی باہر اُگل دیتے ہیں۔ جب ہرن اور دیگر جانور ان پھلوں کی نیچے گری ہوئی باقیات کو کھاتےہیں تو یہ وائرس اُنہیں بھی متاثر کرتا ہے اور وہ آگے یہ وائرس انسانوں تک پہنچا دیتے ہیں۔

افریقہ میں جنگلی جانوروں کو شکار کرنا اور اُن کا گوشت کھانا ایک معمول کی بات ہے۔ ’بُش مِیٹ‘ کے طور پر ان جانوروں کا گوشت بازاروں میں کھلے عام فروخت کیا جاتا ہے۔ محققین خبردار کر رہے ہیں کہ جنگلی جانوروں میں ایسے ایسے وائرس موجود ہوتے ہیں، جن کا انسان کو ابھی اندازہ تک بھی نہیں ہے۔

ان جانوروں کے گوشت کو کاٹنے اور تیار کرنے کے عمل میں بے پناہ خطرات موجود ہیں۔ ان جانوروں کے خون یا اُن کے جسم میں موجود دیگر لیس دار مادوں کے ساتھ رابطے میں آنے کی صورت میں انسان اس طرح کے وائرس کا آسانی سے شکار ہو سکتا ہے۔ یورپ میں بھی، جہاں چمگادڑوں میں محض چند ایک خطرناک وائرس ہی پائے گئے ہیں، ننگے ہاتھوں کے ساتھ انہیں چھُونے سے منع کیا جاتا ہے۔