صوبہ سندھ کے دارالحکومت کراچی سے ملنے والی نیوز ایجنسی اے ایف پی کی رپورٹوں کے مطابق اس بم حملے میں سینئر پولیس افسر فاروق اعوان، جو کہ پولیس کے خصوصی تحقیقاتی یونٹ SIU کے سربراہ ہیں، کے قافلے کو نشانہ بنایا گیا۔ کراچی پولیس کے انسداد دہشت گردی یونٹ کے سربراہ راجہ عمر خطاب نے اے ایف پی کے بتایا کہ اس دھماکے میں استعمال ہونے والا بارودی مواد ایک گاڑی میں نصب کیا گیا تھا۔

صوبائی دارالحکومت میں پولیس کے سربراہ غلام قادر تھیبو کے بقول ابتدائی چھان بین سے یہ اشارے ملے ہیں کہ اس بم حملے میں ایک ایسی گاڑی استعمال کی گئی جس میں دھماکا خیز مواد نصب تھا تاہم انہوں نے واضح کیا کہ فی الحال یہ بات یقین سے نہیں کہی جا سکتی کہ یہ بم دھماکا ایک خود کش حملہ تھا۔

تھیبو کے مطابق پولیس کے سینئر سپرنٹنڈنٹ فاروق اعوان کراچی میں عسکریت پسندوں اور بڑے دہشت گردوں کے خلاف کارروائیوں کی نگرانی کرتے ہیں اور اس دھماکے میں انہیں معمولی چوٹیں آئیں۔ غلام قادر تھیبو نے بتایا کہ ان معمولی چوٹوں سے قطع نظر فاروق اعوان اس دھماکے میں مجموعی طور پر محفوظ رہے۔

کراچی کے جناح پوسٹ گریجویٹ میڈیکل سینٹر کی خاتون ترجمان سیمی جمالی نے صحافیوں کو بتایا کہ اس بم دھماکے میں دو ہلاکتوں کی تصدیق ہو چکی ہے جبکہ زخمیوں میں دو خواتین بھی شامل ہیں۔

اے ایف پی نے اپنی رپورٹوں میں لکھا ہے کہ ایس ایس پی فاروق اعوان 2001ء سے کراچی میں دہشت گرد گروپوں کے خلاف کارروائیوں میں اہم خدمات انجام دیتے رہے ہیں۔ امریکی صحافی ڈینئل پرل کے اغوا کاروں اور قاتلوں کو بھی کراچی سے 2002ء میں انہوں نے ہی گرفتار کیا تھا۔ اس کے علاوہ فاروق اعوان نے کراچی ہی میں اکرم لاہوری نامی اس سرکردہ سنی عسکریت پسند کو بھی گرفتار کیا تھا، جو شیعہ مذہبی اقلیت سے تعلق رکھنے والے متعدد شہریوں کے قتل میں ملوث تھا۔

اے ایف پی نے لکھا ہے کہ جمعرات اور جمعے کی درمیانی شب، رات گئے تک کسی بھی تنظیم یا گروپ نے پولیس قافلے پر کیے جانے والے اس بم دھماکے کی ذمے داری قبول نہیں کی تھی۔ تاہم کالعدم تنظیم تحریک طالبان پاکستان TTP، جس کے عسکریت پسندوں کے خلاف شمال مغربی پاکستان میں ملکی فوج کی طرف سے کارروائیاں کی جا رہی ہیں، ماضی میں کراچی میں کیے گئے کئی بم دھماکوں کی ذمے داری قبول کر چکی ہے۔ ان واقعات میں وہ حملہ بھی شامل ہے، جس میں کراچی پولیس کے ایک سینئر افسر چوہدری اسلم کو اس سال کے اوائل میں ہلاک کر دیا گیا تھا۔

اٹھارہ ملین کی آبادی والا شہر کراچی پاکستان کی اقتصادی شہ رگ کہلاتا ہے۔ پاکستان کی مجموعی قومی پیداوار یا جی ڈی پی میں اس شہر کا حصہ 42 فیصد بنتا ہے لیکن گزشتہ کئی برسوں سے اس بندرگاہی شہر کو فرقہ وارانہ، نسلی اور سیاسی خونریزی نے اپنی لپیٹ میں لے رکھا ہے۔