کرسمس بریک کے بعد بائرن میونخ کا شاندار آغاز
20 جنوری 2013![](https://static.dw.com/image/16535512_800.webp)
اس میچ میں جیت سے بائرن نے بنڈس لیگا کے پوائنٹس ٹیبل پر اپنی مستحکم پوزیشن کو برقرار رکھا۔ کرسمس سے قبل رواں سیزن کا وقفہ شروع ہوا تو یہ ٹیم 42 پوائنٹس کے ساتھ سرفہرست تھی۔ دوسرے نمبر کی ٹیم بائر لیور کوزن 33 پوائنٹس کے ساتھ اس سے کافی پیچھے تھی۔
ہفتے کے دیگر مقابلوں میں لیور کوزن نے فرینکفرٹ کو ایک کے مقابلے میں تین گول سے شکست دی۔ وولفس برگ نے اشٹٹ گارٹ کو دو صفر سے مات دی۔ ڈورٹمنڈ نے بریمن کو پانچ صفر سے پچھاڑا۔
ہوفن ہائیم اور مؤنشن گلاڈ باخ کا میچ صفر صفر سے برابر رہا۔ مائنز اور فرائی برگ کا میچ بھی بے نتیجہ رہا۔ اس میچ میں بھی کوئی ٹیم گول نہ کر پائی۔
بنڈس لیگا کا اٹھارہواں میچ ڈے جمعے سے شروع ہوا۔ پہلے روز کا واحد میچ شالکے اور ہینوور کے درمیان ہوا، جو شالکے نے چارکے مقابلے میں پانچ گول سے جیت لیا۔
اتوار کو اس میچ ڈے کے دو آخری میچ کھیلے جائیں گے۔ پہلا میچ نیوریمبرگ اور ہیمبرگ کے درمیان ہوگا۔ دوسرے میچ میں ڈسلڈورف کا سامنا آؤگسبرگ سے ہو گا۔
پوائنٹس ٹیبل
رواں میچ ڈے کے اس مرحلے تک ٹیموں کی پوزیشنوں میں کوئی خاص فرق نہیں پڑا۔ تاہم دو ٹیموں نے میچ جیت کر اپنی پوزیشنیں بہتر بنائی ہیں، جن میں شالکے اور وولفس برگ شامل ہیں۔ وولفس برگ کی ٹیم اس ہفتے کی جیت کی بدولت تیرہویں نمبر پر پہنچ گئی ہے، جس کے نتیجے میں ڈسلڈورف اور نیوریمبرگ کی ٹیمیں بالترتیب چودھویں اور پندرھویں نمبر پر چلی گئی ہیں۔
اس طرح شالکے جمعے کے میچ میں جیت کے ذریعے پانچویں نمبر پر پہنچ گئی، جس کی وجہ سے فرائی برگ اور مائنز کی ٹیمیں بالترتیب چھٹے اور ساتویں نمبروں پر آ گئیں۔ ہفتے کو ان دونوں میں کسی ایک ٹیم کے پاس موقع تھا کہ میچ جیت کر پوائنٹس ٹیبل پر شالکے کو مات دے دے۔ تاہم ان دونوں ٹیموں کے درمیان ہونے والا میچ بے نتیجہ رہنے کی وجہ سے شالکے کو پانچویں پوزیشن بدستور حاصل ہے۔
اس وقت بائرن میونخ 45 پوائنٹس کے ساتھ سرفہرست ہے جب کہ بائر لیورکوزن 36 پوائنٹس کے ساتھ دوسرے نمبر پر ہے۔ تینتیس پوائنٹس کے ساتھ ڈورٹمنڈ تیسرے نمبر پر ہے۔
رپورٹ: ندیم گِل
ادارت: شامل شمس