پریوں کی کہانیاں، بیکری، دستکاری اور سرد موسم میں نوش کی جانے والی مصالحوں سے تیار کردہ ’گلو وائن‘ کے ساتھ یہاں میلے کا سما بندھ جاتا ہے۔ جرمنی کے مشرقی شہر ڈریسڈن میں سجنے والی ’اشٹریسل مارکیٹ‘ نامی کرسمس مارکیٹ روایتی اور لذیذ پکوانوں کے لیے بھی جانی جاتی ہے۔ سن 1434 سے سجنے والی یہ کرسمس مارکیٹ جرمنی کی قدیم ترین بازاروں میں سے ایک ہے۔

جرمنی کے جنوب مشرقی شہر نورمبرگ کی ’کرسٹ کنڈل مارکٹ‘ اپنی ایک خاص روایت کی وجہ سے مشہور ہے۔ وہاں ہر دو سال بعد اس مارکیٹ کا افتتاح ایک ایسا ایک کم عمر بچہ کرتا ہے، جسے ’کرسٹ کنڈ‘ یا ’کم عمر یسوح‘ کہا جاتا ہے۔ تاہم اس سال ایک بھارتی نژاد جرمن شہری کی بیٹی بینگنا منسی کا انتخاب کیا گیا۔ اس وجہ سے دائیں بازو کے انتہا پسند حلقوں کی جانب سے تنقید کی جا رہی ہے۔

ہر سال قریب چار ملین افراد کولون کے کرسمس بازار کا رخ کرتے ہیں۔ جرمنی کے معروف ترین لینڈ مارکس یا عمارات میں سے ایک کولون کیتھڈرل کے سامنے سجنے والے اس بازار میں پچیس میٹر طویل کرسمس درخت بھی لگایا جاتا ہے۔

ہیمبرگ کے تاریخی کرسمس بازار میں بہت سارے خزانے بھی موجود ہوتے ہیں، خاص طور پر کرسمس درخت کو ’گولڈن ایپل ‘ یعنی سنہری سیبوں کے ساتھ سجایا جاتا ہے۔ ہیمبرگ کے سٹی حال کے سامنے سجا ہوا یہ بازار دسمبر کی بارہ تاریخ تک کھلتا ہے۔

جرمن صوبے باویریا کے ایک چھوٹے سے قصبے ’روٹھنبرگ آب دیر ٹاؤبر‘ کی انوکھی کرسمس مارکیٹ کو ’رائٹرلیس مارکیٹ‘ کہا جاتا ہے۔ اس کا آغاز جرمنی کی ایک افسانوی شخصیت، رائٹرل سے ہوا، جس کو خوش قسمتی کی علامت سمجھا جاتا ہے۔ قرون وسطیٰ دور کی روایات کی یاد دلاتی اس مارکیٹ میں سارا سال کرسمس درخت کی سجاوٹ کا سامان نظر آتے ہیں۔

’لڈوگس برگ باروک کرسمس مارکیٹ‘ میں 180 سے زائد اسٹالز کا خاص انداز میں بندوبست کیا جاتا ہے۔ کرسمس کے سیزن کے دوران شہر کی سڑکوں اور مشہور باروک لڈوگس برگ محل کے باغات قابل دید ہوتے ہیں۔ خاص طور پر روشنی کے سنہری فرشتے، جو اسٹالز کے اوپر رات میں جگمگاتے ہیں۔

جنوبی جرمن علاقے بلیک فاریسٹ میں واقع گینگن باخ کی ’ایڈونٹ کرسمس مارکیٹ‘ میں چوبیس دروازے سجائے جاتے ہیں۔ تیس نومبر سے چوبیس دسمبر تک کرسمس مارکیٹ کے وسط میں ٹاؤن ہال کی عمارت ایک ’ایڈونٹ کیلنڈر‘ میں تبدیل ہوجاتی ہے۔ اس عمارت کی ہر روز ایک کھڑکی کھولی جاتی ہے، جس میں ایک عالمی شہرت یافتہ فن پارہ پیش کیا جاتا ہے۔

کرسمس سیزن کے دوران روشٹاک شہر کا مرکز شمالی جرمنی کی سب سے بڑی کرسمس مارکیٹ میں تبدیل ہو جاتا ہے۔ تین کلومیٹر طویل اس کرسمس بازار میں 250 اسٹالز اور متعدد جھولے لگائے گئے۔ بحیرہ بالٹک کے ساحل کے قریب سجے کرسمس بازار میں آپ کو مختلف ممالک سے ہر طرح کی خصوصیات اور دستکاری ملیں گی۔

باویریا کے جنگلات کے وسط میں واقع ’شوائن ہُٹ ‘ اور ’بیٹمان سیگے ‘ گاؤں میں ایک جادوئی کرسمس مارکیٹ سجائی جاتی ہے۔ اس بازار میں لوگ خیموں کے سامنے آگ لگا کر بیٹھ کے کہانیاں سناتے ہیں، اور ہر طرح کی دستکاری خریدتے ہیں۔ اس کے علاوہ حاضرین ’چڑیلوں والی شراب‘ پی سکتے ہیں۔

دراخن برگ کاسل میں سجی کرسمس مارکیٹ آپ کو 19ویں صدی کے دور میں واپس لے جاتی ہے۔ یہاں ’چارلس ڈِکنس‘ کی مشہور کرسمس کہانی کے کرداروں کو حقیقی شکل دی جاتی ہے۔ یہ کاسل کرسمس سے چار ہفتے قبل کھلتی ہے، جس میں پچاس سے زائد نمائش کنندگان مختلف مصنوعات فروخت کرتے ہیں۔

وینزویلا میں کرسمس کی عبادت میں شرکت کے لیے ایک انوکھی روایت پائی جاتی ہے۔ چوبیس دسمبر کی رات میں یسوع مسیح کی ولادت کا جشن مناتے ہوئے مختلف عمر کے لوگ رولر اسکیٹنگ کرتے گرجا گھر کو روانہ ہوتے ہیں۔ یہ روایت سن 1960 سے مقبول ہونا شروع ہوئی تھی۔ اس رات رولر اسکیٹ کرنے والوں کی سلامتی کے لیے سڑکوں پر ٹریفک بند کر دی جاتی ہے۔

کرسمس کی کہانی بیت الحم میں چمکنے والے ستارے کے بغیر مکمل نہیں ہوتی۔ فلپائن میں ستاروں کو شوخ رنگوں سے مزین کیا جاتا ہے۔ انہیں بنا کر لالٹینوں کے باہر لگایا جاتا ہے۔ لالٹین کو روشن کرنے پر ان کے رنگ نکھر جاتے ہیں۔ شوخ رنگوں کے ستاروں والی لالٹینوں کو گھروں کے باہر دروازوں پر لٹکا دیا جاتا ہے۔ یہ ستارے بانس اور جاپانی کاغذ کے بنے ہوتے ہیں۔

یوکرائن میں کرسمس کے حوالے سے ایک انوکھی روایت ہے۔ یوکرائنی لوگ کرسمس ٹری کی سجاوٹ میں شوخ رنگوں سے اسپائیڈر بنا کر کرسمس ٹری پر لگاتے ہیں۔ کہتے ہیں کہ ایک غریب ماں اور اس کے بیٹے کے پاس کرسمس ٹری کی سجاوٹ کو کچھ نہیں تھا تو وہ اداس ہو کر سو جاتے ہیں۔ ایک مکڑے کو ان پر ترس آتا ہے اور وہ خود کو سجا کر کرسمس ٹری پر بیٹھ جاتا ہے۔ اس روایت کا تسلسل آج بھی یوکرائن میں ہے۔

جاپان میں ایک فیصد سے بھی کم کیتھولک مسیحی بستے ہیں۔ یہ کرسمس کے موقع پر ٹرکی پکانے کے بجائے کے ایف سی کھانے کو پسند کرتے ہیں۔ اس دن کی مناسبت سے کے ایف سی کی جانب سے خصوصی ڈیل بھی متعارف کرائی جاتی ہیں۔ ’کنٹیکی برائے کرسمس‘ کا نعرہ سن 1974 میں عام کیا گیا تھا اور اب اسے کھانا کیتھولک گھروں کی روایت بن گئی ہے۔

میکسیکو کے شہراوکسانا سٹی میں مولیاں برسوں سے کرسمس تہوار کا حصہ ہیں۔ کرسمس سے قبل تیئیس اور چوبیس دسمبر کی درمیانی رات مولیوں کی رات کہلاتی ہے۔ مقامی مصور روزمرہ کی زندگی کے معمولات کی تصاویر مولیوں پر بناتے ہیں۔ ان رنگ برنگی مولیوں کو کرسمس مارکیٹ میں فروخت کے لیے رکھا جاتا ہے۔ ان پر مسیحی روایات بھی بنائی جاتی ہیں۔ اوکسانا سٹی کے شہری ان مولیوں کو ذوق و شق سے خریدتے ہیں۔

ہسپانوی علاقے کاتولونیا میں کرسمس پر ایک کریکٹر ’ایل کاگانیر‘ یا ’دا پُوپر‘ گھروں کے کونے میں رکھا جاتا ہے۔ یہ کسان جیسا دکھائی دیتا ہے۔ اس کو مقامی کاتالان سرخ ٹوپی پہنائی جاتی ہے۔ اس کی پینٹ نیچے ہوتی ہے اور انداز میں ایسے بیٹھا دکھائی دیتا ہے جیسے پاخانہ کر رہا ہو۔ اس کریکٹر کو کرسمس پر رکھنے کی روایت کسانوں کی کاشتکاری میں وسعت لی جاتی ہے اور انسانی فضلے کو بہترین قدرتی کھاد سمجھا جاتا ہے۔

آسٹریا میں کرسمس پر تحائف سینٹ نِک لاتے ہیں اور ان کا معاون کرامپس ہوتا ہے۔ عام طور پر کرامپس کا تہوار پانچ دسمبر کو منایا جاتا ہے۔ یہ سینٹ نکولاس کے دن کی تقریبات سے قبل منایا جاتا ہے۔ یومِ کرامپس کی تقریب میں بارہ سنگھے کے سر کو جلتے کوئلے کے قریب رکھا جاتا ہے۔ یہ بچوں کا ایک پسندیدہ تہوار خیال کیا جاتا ہے۔

چین میں کرسمس کوئی روایاتی ثقافتی تقریبات کا حصہ نہیں ہے لیکن اس دن کی مناسبت سے ایک قدیمی روایت ہے۔ کرسمس کے آغاز کی شام کو چین میں ’امن کی شام‘ کہا جاتا ہے۔ اس کو مینڈرین زبان میں ’پِنگایائی‘ کہا جاتا ہے۔ دوسری جانب سیب کو پنگاؤ کہتے ہیں۔ ان الفاظ کی صوتی قربت کی باعث کرسمس کو ان الفاظ کے ملاپ سے ’پنگ انگواو‘ کہا جاتا ہے۔ اس کے معنی ہوئے امن کے سیب۔

ہر سال چوبیس دسمبر تین بجے سہ پہر سویڈن میں مسیحی خاندان بیٹھ کر والٹ ڈزنی کی سن 1958 میں تیار کردہ ’ڈونلڈ ڈَک اور اس کے دوستو‌ں کی جانب سے کرسمس کی مبارک باد‘ کا دلچسپ پروگرام دیکھتے ہیں۔ گزشتہ برس سویڈن کے قریب پینتالیس لاکھ افراد نے ایک گھنٹے دورانیے کی یہ فلم دیکھی تھی۔ یہ ملک کی نصف آبادی تھی۔ والٹ ڈزنی کا یہ پروگرام سویڈن کے مقبول ٹیلی وژن پر نشر کیا جاتا ہے۔

دنیا بھر میں بیشتر مسیحی آبادی کرسمس پچیس دسمبر کو مناتے ہیں۔ افریقی ملک ایتھوپیا میں آرتھوڈکس کرسچین کمیونٹی سات جنوری کو کرسمس مناتی ہے۔ یہ امر اہم ہے کہ مشرقی یورپی ممالک بلغاریہ اور رومانیہ میں بھی کرسمس سات جنوری ہی کو منایا جاتا ہے۔ یہ جولین کیلینڈر کے مطابق ہے۔ سات جنوری کو کرسمس منانے والی مسیحی آبادی تین سو ملین کے قریب ہیں۔