کرسمس کے موقع پر معافی، جرمنی میں آٹھ سو سے زائد قیدی رہا
مقبول ملک ڈی پی اے
23 دسمبر 2017
جرمنی میں کرسمس کے مسیحی تہوار کے موقع پر سزا یافتہ افراد کے لیے معافی کی سالانہ روایت کے مطابق ملک کی مختلف جیلوں سے آٹھ سو سے زائد قیدیوں کو رہا کر دیا گیا۔ یہ رہائی متعلقہ صوبوں کے صوابدیدی فیصلوں کے تحت عمل میں آئی۔
جرمن صوبے ہیسے کی ایک جیل میں سجایا گیا کرسمس ٹریتصویر: picture-alliance/dpa/F. Rumpenhorst
اشتہار
وفاقی جرمن دارالحکومت برلن سے ہفتہ تئیس دسمبر کو ملنے والی نیوز ایجنسی ڈی پی اے کی رپورٹوں کے مطابق مسیحی دنیا میں کرسمس یا ولادت مسیح کا تہوار سب سے بڑا مذہبی تہوار ہوتا ہے اور اس موقع پر بہت سے مغربی ممالک میں قیدیوں کو انسانی ہمدردی کی بنیاد پر جیلوں سے قبل از وقت رہا کر دینے کی روایت پائی جاتی ہے تاکہ وہ یہ تہوار اپنے اہل خانہ کے ساتھ منا سکیں۔
جنوبی جرمن صوبے باویریا میں کرسمس سے قبل قیدیوں کی رہائی کی روایت پر عمل نہیں کیا جاتاتصویر: picture alliance / dpa
دنیا بھر میں 25 دسمبر کو منائے جانے والے کرسمس کے تہوار سے پہلے جرمنی میں دسمبر کے مہینے کے پہلے نصف حصے میں سزا یافتہ افراد کو قبل از وقت رہا کر دینے کی جو روایت پائی جاتی ہے، اس سے عام طور پر ایسے قیدیوں کو فائدہ پہنچتا ہے جن کی سزائے قید عنقریب پوری ہونے والی ہو۔
لیکن اس بارے میں قومی سطح پر فیصلہ وفاقی حکومت کی طرف سے نہیں بلکہ تمام سولہ صوبائی حکومتوں کی طرف سے انفرادی طور پر کیا جاتا ہے کیونکہ ہر وفاقی صوبے میں اس حوالے سے مختلف قوانین نافذ ہیں۔ اسی لیے ہر صوبہ اپنے ایسے فیصلے انفرادی طور پر اور صوبائی حکومت کی صوابدید کے مطابق ہی کرتا ہے۔
جرمن شہر سائٹ ہائن میں سزا یافتہ مجرموں کے لیے قائم ایک جیل کا بیرونی منظرتصویر: DW/K. Brady
سب سے زیادہ آبادی والے جرمن صوبے نارتھ رائن ویسٹ فیلیا کی وزارت انصاف کی طرف سے ڈسلڈورف میں بتایا گا کہ اس صوبے میں 631 ایسے قیدیوں کو رہا کر دیا گیا، جن کی سزائیں اگلے برس جنوری کے آخر میں پوری ہونے والی تھیں۔ ایسے افراد کی رہائی کے وقت ان کی طرف سے دوران قید اچھے انفرادی رویوں کو مدنظر رکھا گیا۔
اسی طرح وفاقی دارالحکومت اور شہری ریاست برلن میں یکم دسمبر کو 156 قیدیوں کو قبل از وقت رہا کر دیا گیا۔ جرمنی کے جنوب مغربی صوبے باڈن ورٹمبرگ میں حکومت کی طرف سے بتایا گیا کہ باقی ماندہ سزا معاف کر دیے جانے کے بعد اس صوبے میں بھی ’سینکڑوں افراد‘ کو رہا کر دیا گیا۔ اشٹٹ گارٹ میں صوبائی حکومت نے تاہم رہا کیے گئے قیدیوں کی حقیقی تعداد نہیں بتائی۔
یورپ کی خوبصورت ترین کرسمس مارکیٹیں
یورپ بھر میں رنگ برنگے اسٹالز پر مشتمل کرسمس مارکیٹوں کو عوام کے لیے کھول دیا گیا ہے۔ یورپ کی خوبصورت ترین کرسمس مارکیٹوں کا تصویری سفر کیجیے۔
تصویر: Stadt Nürnberg/B. Fuder
کولون، جرمنی
کولون کے مشہور زمانہ کیتھیڈرل کے سامنے لگنے والی اس کرسمس مارکیٹ میں ہر سال کم از کم چالیس لاکھ افراد شرکت کرتے ہیں۔ اس کا شمار جرمنی کی پسندیدہ ترین کرسمس مارکیٹوں میں ہوتا ہے۔ خریداری اور کھانے پینے کے اسٹالز کے علاوہ ایک سو سے زائد اسٹیج تقریبات کا انعقاد بھی کیا جاتا ہے۔
تصویر: imago
کراکوف، پولینڈ
یہ کرسمس مارکیٹ پولستانی شہر کراکوف کے پرانے حصے (اولڈ سٹی) میں لگائی جاتی ہے۔ اگر کسی کا دل وہاں کے رومانوی ماحول سے گرم نہیں ہوتا تو وہ پولش ووڈکا سے مدد لیتا ہے۔ اس مارکیٹ میں کرسمس کی کہانی 1937ء سے چھوٹے چھوٹے مجسموں کے ذریعے بیان کی جاتی ہے۔
تصویر: picture-alliance/dpa/J. Dabrowski
ویانا، آسٹریا
یہ کرسمس مارکیٹ ویانا کے تاریخی کلیسا کے ارد گرد سجتی ہے۔ چھیالیس میٹر طویل اسٹیج پر کرسمس کہانی مجسموں اور لکڑی کے بنے چھوٹے چھوٹے گھروں کے ذریعے بیان کی جاتی ہے۔ یہاں دستکاری کے اعلیٰ نمونے دیکھنے کو ملتے ہیں۔
تصویر: picture-alliance/dpa
بازل، سوئٹزرلینڈ
بازل کی کرسمس مارکیٹ سوئٹزرلینڈ کی سب سے بڑی کرسمس مارکیٹ ہوتی ہے۔ اس کے علاوہ روشنیوں کی مدد سے سجائی جانے والی یورپ کی طویل ترین سڑک بھی اسی مارکیٹ کا حصہ بنتی ہے۔
تصویر: Basel Tourismus
سٹراسبرگ، فرانس
رواں برس اس یورپی شہر کی کرسمس مارکیٹ 446 ویں مرتبہ سجائی گئی ہے۔ اسے فرانس کی قدیم ترین کرسمس مارکیٹ قرار دیا جاتا ہے۔ سٹراسبرگ کے تاریخی گرجا گھر کے اردگرد لکڑی سے بنے اسٹالز لگائے جاتے ہیں لیکن بھیڑ کی وجہ سے یہ اسٹال شہر کے دیگر حصوں تک پھیل جاتے ہیں۔
تصویر: Sebastan Hengy
بروگے، بلیجیم
جب بروگے کو کرسمس کی روشنیوں سے سجایا جاتا ہے تو ایسے لگتا ہے جیسے آپ قرون وسطیٰ میں واپس چلے گئے ہوں۔ کرسمس مارکیٹ کے ارد گرد پرانی طرز کی بگھیاں کھڑی ہوتی ہیں، جن میں بیٹھ کر شہر کی سیر کی جا سکتی ہے۔
تصویر: picture-alliance/dpa/F.P.Tschauner
میڈرڈ، اسپین
میڈرڈ کی کرسمس مارکیٹ ’پلازہ میئر‘ کے مقام پر سجتی ہے اور یورپ کی دیگر مارکیٹوں کے برعکس یہ چھ جنوری کو اپنے جوبن پر ہوتی ہے۔ ہر سال ہزاروں سیاح یہ عوامی تہوار دیکھنے کے لیے آتے ہیں اور اس موقع پر ہونے والی پریڈ ٹیلی وژن پر لائیو دکھائی جاتی ہے۔
تصویر: picture-alliance/dpa/H.C. Hidalgo
لندن، برطانیہ
کہا جاتا ہے کہ جرمن کرسمس مارکیٹ کی نقل دیکھنی ہو تو لندن کی کرسمس مارکیٹ کو دیکھا جائے اور لندن کے ہائیڈ پارک میں ’وِنٹر وَنڈر لینڈ‘ اس کا بہترین ثبوت ہے۔ اس مارکیٹ میں وہ تمام لوازمات موجود ہوتے ہیں، جو جرمنی میں کرسمس مارکیٹوں کا حصہ ہیں۔
تصویر: picture-alliance/dpa/Kerimokten
گوتھن برگ، سویڈن
گوتھن برگ کی مارکیٹ سویڈن کی سب سے بڑی کرسمس مارکیٹ ہے اور اسے ’جادوئی‘ بھی سمجھا جاتا ہے۔ اس کرسمس مارکیٹ کو سجانے کے لیے پچاس لاکھ روشنیوں کا استعمال کیا جاتا ہے۔
تصویر: Gören Assner
نیورمبرگ، جرمنی
نیورمبرگ کی کرسمس مارکیٹ کا شمار دنیا کی قدیم ترین کرسمس مارکیٹوں میں ہوتا ہے۔ تاریخی شواہد کے مطابق یہ مارکیٹ چار صدیوں سے بھی زائد عرصہ قبل 1610ء میں بھی لگائی جاتی تھی۔
تصویر: Stadt Nürnberg/Ch. Dierenbach
10 تصاویر1 | 10
اس کے برعکس جنوبی جرمن صوبہ باویریا ملک میں کرسمس کے موقع پر قیدیوں کی رہائی کی اس سالانہ روایت میں حصہ نہیں لیتا۔ باویریا میں عشروں سے مسیحی قدامت پسندوں کی جماعت کرسچین سوشل یونین اقتدار میں چلی آ رہی ہے۔
میونخ میں صوبائی حکومت کے مطابق ایسے قیدیوں کو قبل از وقت رہا کردینا، جن کی سزائیں کرسمس کے قریب قریب پوری ہو رہی ہوں، نہ صرف ’ناقابل وضاحت‘ ہے بلکہ اسے ممکنہ طور پر ’کچھ قیدیوں کے لیے ترجیحی اور امتیازی بنیادوں پر غیر آئینی رعایت‘ کے طور پر بھی دیکھا جا سکتا ہے۔