سری لنکن ٹیم نے ٹاس جیت کر پہلے کھیلتے ہوئے بھارتی ٹیم کو 275 رنز کا ٹارگٹ دیا ہے۔ کرکٹ کے ماہرین کا خیال ہے کہ یہ اچھا فائٹنگ اسکور ہے۔ بظاہر اب وکٹ اتنی تیز نہیں ہے جتنی کہ صبح کے وقت تھی اور اگر یہ بھارتی اننگز میں بھی ایسی رہی تو سری لنکن بالروں کو مشکلات کا سامنا ہو سکتا ہے۔ بھارت کی بیٹنگ لائن بہت مضبوط تصور کی جاتی ہے۔

وانکھیڈے اسٹیڈیم کی پچ پر شروع میں سری لنکن کھلاڑیوں کو رنز بنانے میں دشواری کا سامنا رہا۔ پہلے دس اوورز میں صرف 31رنز بنے۔ فائنل میچ میں ورلڈ کپ کے کامیاب ترین اوپننگ کھلاڑی بڑا امپکیٹ چھوڑنے میں ناکام رہے۔ تھارنگا اور دلشان بڑا اسکور نہیں کر سکے۔ تھارنگا نے 2 اور دلشان نے 33 رنز بنائے۔ سری لنکا کے تجربے کار بیٹسمینوں کمار سنگاکارا اور مہیلا جے وردھنے نے تیسری وکٹ کی شراکت میں اپنی ٹیم کو سہارادیا۔ دونوں کھلاڑیوں نے احتیاط سے اسکور کو آگے بڑھایا۔

سنگاکارا اور جے وردھنے کے درمیان تیسری وکٹ کی شراکت میں 62 رنز بنے۔ سنگاکارا 48 رنز بنا سکے۔ جے وردھنے اور سماراویرا کے درمیان 57 رنز کی شراکت قائم ہوئی۔ سماراویرا اور کپوگدیرا کی وکٹیں فوراً گرنے سے سری لنکن اننگز کو خاصا دھچکا پہنچا۔ چھٹی وکٹ کی شراکت میں جے وردھنے اور کلوسیکرا نے 66 رنز کا اضافہ کیا۔ جے وردھنے نے 84 گیندوں پر سینچری مکمل کی۔ وہ ناٹ آؤٹ رہے۔ انہوں نے 103 رنز بنائے۔ آخری پانچ اوورز میں سری لنکن کھلاڑیوں نے 63 اسکور کا اضافہ کیا۔بھارتی ٹیم نے فائنل میچ کے دوران انتہائی سست رفتاری سے پچاس اوورز مکمل کیے۔

بھارتی ٹیم کے بالروں نےعمدہ اور کنٹرول بالنگ کا مظاہرہ کیا۔ ظہیر خان کے علاوہ ہربھجن سنگھ کی بالنگ بہت جاندار تھی۔ ظہیر خان کے پہلے تین اوورز میڈن رہے لیکن آخری پانچ اوورز میں سری لنکا کے بلے بازوں نے اان کی بہت ’دھنائی‘ کی۔

بظاہر یہ پہلا میچ تھا جس میں یووراج سنگھ کی بالنگ کوسری لنکن بیٹسمینوں نے میرٹ پر کھیلنے کی کوشش ضرور کی۔ وہ کوئی بڑا اثر نہیں پیدا کرسکے مگر پھر بھی دو کھلاڑیوں کو آؤٹ کرنے میں کامیابی ہوئے۔ انہوں نے سنگاکارا کی گولڈن وکٹ حاصل کرنے کے علاوہ سماراویرا کو ایل بی ڈبلیو آؤٹ کیا۔

بھارتی ٹیم نے 275 رنز کے تعاقب میں وریندر سہواگ کی پہلی وکٹ 1 کے مجموعی سکور پر جبکہ 31 کے مجموعی سکور پر سچن تندولکر کی وکٹ گنوا دی ہے۔

رپورٹ: عابد حسین

ادارت: شادی خان سیف