خبر رساں ادارے اے ایف پی نے کییف سے موصولہ رپورٹوں کے حوالے سے بتایا ہے کہ یوکرائن کی عبوری حکومت نے دعویٰ کیا ہے کہ ہفتے کے دن تقریباﹰ 80 روسی فوجیوں نے اس کے خود مختار علاقے کریمیا کے شمال میں واقع Strilkove نامی ایک یوکرائنی دیہات پر قبضہ کر لیا۔ یوکرائن نے اس دیہات سے روسی فوجیوں کے فوری انخلاء کا مطالبہ کرتے ہوئے اپنے اس عہد کا اظہار کیا ہے کہ اس حملے کا جواب دینے کے لیے تمام تر وسائل بروئے کار لائے جائیں گے۔

یوکرائنی وزارت خارجہ کے مطابق روسی افواج جب یوکرائن کے اس علاقے میں داخل ہوئیں تو چار گن شپ ہیلی کاپٹرز اور تین بکتر بند گاڑیوں کو ان کی مدد حاصل تھی۔ ادھر مقامی میڈیا نے ایک نامعلوم روسی فوجی اہلکار کے حوالے سے بتایا ہے کہ روسی فوجیوں نے یہ کارروائی گیس ڈسٹری بیوشن کے لیے بنائے گئے ایک اسٹیشن پر ممکنہ دہشت گردانہ حملوں کے تناظر میں کی۔ روس نواز کریمیا کی انتظامیہ نے بھی کہا ہے کہ یوکرائن کے قوم پرستوں کی طرف سے گیس ڈسٹری بیوشن اسٹیشن پر مبینہ حملوں کے بعد بطور دفاع روسی فوجیوں نے وہاں کا انتظام سنبھالا ہے۔

خیال رہے کہ یوکرائن میں صدر وکٹور یانوکووچ کے معزولی کے بعد بائیس مارچ کو روسی فوجیوں نے کریمیا پر قبضہ کر لیا تھا، کس کے بعد یوکرائن میں ایک بحرانی صورتحال پیدا ہو چکی ہے۔ دو ملین کی آبادی والے اس علاقے میں زیادہ تر روسی زبان بولی جاتی ہے اور وہاں کے عوام ماسکو کے ساتھ ہمدردی رکھتے ہیں۔ سن 1954 تک کریمیا روس کا ہی ایک حصہ تھا اور اس لیے وہاں روسی نسل کی آبادی بھی اکثریت میں ہے۔ اس بات کے قوی امکانات ہیں کہ آج اتوار کو ہونے والے مجوزہ ریفرنڈم میں روس کے ساتھ الحاق کی اجازت دے دی جائے گی۔

سلامتی کونسل کی طرف سے مذمت

اقوام متحدہ میں امریکی سفیر سمانتھا پاور نے جنوبی یوکرائن میں روسی افواج کی اس تازہ پیشقدمی کو ’اشتعال انگیز‘ قرار دیا ہے۔ ہفتے کے دن ہی اقوام متحدہ کی سلامتی کونسل میں کریمیا میں سولہ مارچ کو ہونے والے ریفرنڈم پر ایک مذمتی قرارداد بھی پیش کی گئی، جسے روس نے ویٹو کر دیا۔ اس ووٹنگ کے دوران چین نے اپنی رائے محفوظ رکھی لیکن پندرہ رکنی اس کونسل کے تیرہ ارکان نے اس قرارداد کی حمایت میں ووٹ دیا۔

اس قرارداد میں کریمیا کے ریفرنڈم کو غیر قانونی قرار دیتے ہوئے زور دیا گیا تھا کہ یوکرائن کی سرحدی سالمیت کا احترام کیا جائے۔ اس موقع پر سمانتھا پاور کا کہنا تھا کہ کریمیا میں فوج کشی کے معاملے پر روس سفارتی سطح پر تنہا ہو گیا ہے۔ انہوں نے یہ بھی کہا کہ کریمیا میں ریفرنڈم کے نتائج کی کوئی قانونی حیثیت نہیں ہو گی۔ یہ امر اہم ہے کہ امریکا اور روس اس بحران کے حل کے سفارتی حل پر ناکام دکھائی دے رہے ہیں۔

ادھر ہفتے کے روز ہی روسی دارالحکومت ماسکو میں تقریباﹰ پچاس ہزار افراد نے کریمیا میں کریملن کی پالیسیوں کے خلاف ایک بڑی احتجاجی ریلی میں شرکت کی۔ گزشتہ دو برسوں کے دوران روس میں یہ اپنی نوعیت کی سب سے بڑی حکومت مخالف ریلی قرار دی گئی ہے۔ تاہم ساتھ ہی قریباﹰ پندرہ ہزار روسی افراد نے ماسکو میں کریمیا میں ریفرنڈم کی حمایت میں بھی مظاہرہ کیا۔