کریمیا کی پارلیمان نے گزشتہ روز کے ریفرنڈم کے نتائج کی روشنی میں یوکرائن سے آزادی کا اعلان کرتے ہوئے روس کا حصہ بننے کے لیے باقاعدہ درخواست کر دی ہے۔ کریمیا کی پارلیمان کی طرف سے منظور کیے جانے والے بیان کے مطابق، ’’جمہوریہ کریمیا، اقوام متحدہ اور دنیا کے تمام ممالک سے درخواست کرتا ہے کہ اسے ایک آزاد ریاست کے طور پر تسلیم کیا جائے۔‘‘ کریمیا کی پارلیمان کی طرف سے یہ بھی کہا گیا ہے کہ جزیرہ نما کریمیا میں موجود یوکرائن کے تمام ریاستی اثاثوں کو قومیا لیا جائے گا۔

کریمیا کی پارلیمان کے سربراہ ولادیمیر کونسٹانٹیوف نے کریمیا کے علاقے میں موجود یوکرائنی فورسز سے کہا ہے کہ وہ یا تو مقامی حکام سے وفاداری کا حلف اٹھا لیں یا پھر علاقہ چھوڑ دیں۔ پارلیمان کی طرف سے روسی کرنسی روبل کو ملک کی دوسری سرکاری کرنسی کا درجہ دے دیا گیا ہے۔ یوکرائنی کرنسی خرنویا یکم جنوری 2016ء تک رائج رہے گی۔

کریمیا کو ملک کا حصہ بنانے کے لیے روس میں خصوصی قانون سازی

یوکرائن کے علاقے کریمیا میں متنازعہ ریفرنڈم کے بعد روس نے کہا ہے کہ اس جزیرہ نما کے وفاقِ روس کے ساتھ باقاعدہ الحاق کی منظوری بہت جلد دے دی جائے گی۔ اس مقصد کے لیے روسی پارلیمان کے ایوان زیریں دُوما میں قانون سازی کی جائے گی۔ خبر رساں ادارے روئٹرز کے مطابق دُوما کے نائب اسپیکر سیرگئی نیویروف نے بتایا کہ روسی نسل کی آبادی کی اکثریت والے اس خطے کے روس کے ساتھ الحاق کے لیے پارلیمان میں مسودہء قانون کی منظوری ’بہت ہی جلد‘ دے دی جائے گی۔ دوسری طرف روسی پارلیمان کے ایوان زیریں کے ایک نمائندے کے مطابق روسی صدر ولادیمیر پوٹن کل منگل 18 مارچ کو پارلیمان کے دونوں ایوانوں کے مشترکہ اجلاس سے کریمیا کے معاملے پر خطاب کر رہے ہیں۔

امریکا اور یورپی یونین کی جانب سے پابندیاں

کریمیا کے حوالے سے روسی کردار کو مدنظر رکھتے ہوئے امریکا نے سات روسی اہلکاروں کے خلاف پابندیاں عائد کرنے کا اعلان کیا ہے۔ وائٹ ہاؤس کی جانب سے جاری بیان کے مطابق جن افراد کے خلاف پابندیاں عائد کی گئی ہیں ان میں روسی صدر ولادیمیر پوٹن کے ایک مشیر کے علاوہ یوکرائن کے سابق صدر وکٹر یانوکووچ بھی شامل ہیں۔

یورپی یونین نے بھی آج پیر کے روز روس اور یوکرائن کی 21 شخصیات کے خلاف سفری پابندیاں عائد کرنے کے ساتھ ساتھ ان کے اثاثے منجمد کرنے کا اعلان کیا ہے۔ پابندیوں کا یہ فیصلہ برسلز میں جاری یورپی یونین کے وزرائے خارجہ کے اجلاس میں کیا گیا۔ 28 رکنی یورپی یونین کے وزرائے خارجہ نے اتوار کو کریمیا میں ہونے والے ریفرنڈم کے ردعمل میں انتہائی سرعت کے ساتھ ان پابندیوں پر اتفاق رائے ظاہر کیا۔ بتایا گیا ہے کہ ان 21 شخصیات کے خلاف پابندیوں کے ساتھ ساتھ اس سلسلے میں مزید اقدامات اگلے چند روز میں کیے جائیں گے۔