یہ مطالبہ ڈیموکریٹ پارٹی کے سینئر اور بااثر رہنما ایمی بیرا اور ری پبلیکن پارٹی کے لیڈر جارج ہولڈنگ پر مشتمل امریکی وفد نے دہلی میں بھارت کے اعلی حکام سے ملاقات کے دوران کیا۔

بھارتی نژاد ایمی بیرا امریکی کانگریس کی ہاوس کمیٹی آن ایشیا اینڈ ایشیا پیسفک کے چیئرمین ہیں۔ ایمی بیرا کا پورا نام امریش بابو لال ہے۔ ان کے والد بابو لال وزیر اعظم نریندر مودی کی آبائی ریاست گجرات میں راج کوٹ کے رہنے والے تھے اور 1958میں امریکہ چلے گئے تھے۔ ایمی بیرا اور ہولڈنگ دونوں کانگریس میں انڈیا کاکس کے مشترک چیئرمین بھی ہیں۔

بھارتی خارجہ سیکرٹری ہرش شیرنگلا سمیت دیگر حکام کے ساتھ ملاقات کے بعد ایمی بیرا نے میڈیا سے بات چیت کرتے ہوئے کہا، ”یہ ہم سب کے مفاد میں ہے کہ کشمیر میں معمول کے مطابق حالات بحال ہوں، وہاں سیاسی رہنما ابھی بھی حراست میں ہیں اور ہم اس بات سے فکر مند ہیں۔" امریکی رکن کانگریس نے مزید کہا، ’’بھارت سرکار سے کہا ہے کہ وہ امریکی کانگریس کے ایک وفد کو کشمیر لے کر جائے تاکہ اراکین خود وہاں کی صورت حال کا مشاہدہ کرسکیں اور جائزہ لے سکیں۔"

ری پبلیکن رکن کانگریس ہولڈنگ کا کہنا تھا ”ہمارے پاس کشمیر کے حوالے سے کئی سوالات ہیں۔ میرا یہ ٹھوس یقین ہے کہ کشمیر میں اقتصادی ترقی میں اضافہ کرنے سے ہی کامیابی ملے گی اور یہ اسی وقت ہوپائے گا جب وہاں ایک مستحکم سیاسی نظم قائم ہو، جو سرمایہ کاروں کوراغب کرسکے۔"

بھارتی وزارت خارجہ نے بھی ٹوئیٹ کرکے ایمی بیرا اور جارج ہولڈنگ کی خارجہ سکریٹری ہرش شیرنگلا سے ملاقات کی اطلاع دیتے ہوئے کہا ہے کہ ”باہمی تعلقات کو مستحکم کرنے اور علاقائی ترقی کے سلسلے میں بات چیت ہوئی۔" بھارتی وزارت خارجہ نے تاہم مزید کوئی تفصیل نہیں دی۔

امریکی صدر ٹرمپ کے دورے سے قبل امریکی اراکین کانگریس کے ان بیانات کو کافی اہم قرار دیا گیا ہے۔ یہ امر بھی قابل ذکر ہے کہ امریکی صدر ٹرمپ ماضی میں بھارت اور پاکستان کے درمیان مسئلہ کشمیر کے حل کے حوالے سے ثالثی کا رول ادا کرنے کی پیش کش کرچکے ہیں تاہم بھارت نے اس پیش کش کو مسترد کردیا تھا۔

امریکی کانگریس کے وفد نے مودی حکومت کی طرف سے منظور کردہ شہریت ترمیمی قانون پر بھی تشویش کا اظہار کیا۔ ان کا کہنا تھا کہ بھارت کو اقلیتوں کو تحفظ فراہم کرنا چاہئے اور ملک کے سیکولر ڈھانچے کو کمزور نہیں کرنا چاہئے۔ ایمی بیرا نے کہا، ”ہم نہیں چاہتے کہ بھارت اپنا سیکولر کردار کھو دے، یہی وہ خوبی ہے جو اسے خطے میں دیگر ممالک سے اسے ممتاز کرتی ہے۔ یہی وہ بات ہے جو اسے امریکہ کا اتنا قابل قدر پارٹنر بناتی ہے۔ ہم یہ نہیں چاہیں گے کہ بھارت اپنے اس وقار سے محروم ہو جائے‘‘