کنٹرول لائن کے قریب بھارتی فوجی مرکز پر حملہ، 17 فوجی ہلاک
18 ستمبر 2016![](https://static.dw.com/image/19474959_800.webp)
بھارتی فوج کے ترجمان کرنل ایس ڈی گوسوامی نے بتایا کہ حملہ آوروں نے لائن آف کنٹرول عبور کر کے پہلے سرحد پر موجود فوجیوں پر فائرنگ کی۔ ان کے مطابق جس وقت یہ حملہ کیا گیا، اُس وقت زیادہ تر فوجی سوئے ہوئے تھے۔ حملے کے بعد باغیوں اور فوجیوں میں کافی دیر تک فائرنگ کا تبادلہ جاری رہا۔ بتایا گیا ہے کہ مشتبہ علیحدگی پسند باغیوں کی جانب سے کیے جانے والے اس حملے میں کم از کم سترہ فوج ہلاک ہوئے۔
یہ حملہ اڑی سیکٹر پر پیدل فوج کے مرکز پر کیا گیا۔ اڑی کا علاقہ لائن آف کنٹرول کے قریب ہے اور ضلع بارہ مولا کا حصہ ہے۔ حملے کا مقام سری نگر سے تقریباً ایک سو کلومیٹر مغرب میں واقع ہے۔ یہاں بھارتی فوج کے بارہویں انفنٹری بریگیڈ کا ہیڈکوارٹر ہے اور کئی سو فوجی سرحدی حفاظت کے لیے رکھے گئے ہیں۔
اِس بیس پر زخمی ہونے والے فوجیوں کو فوری طور پر ہیلی کاپٹر کے ذریعے ریاستی صدر مقام سری نگر منتقل کر دیا گیا ہے۔ نئی دہلی میں بھارتی وزیر دفاع نے زخمی فوجیوں کی تعداد پینتیس بتائی ہے۔
بھارتی وزارتِ داخلہ کے ایک سینیئر اہلکار کے مطابق یہ عسکریت پسندوں کا حملہ دکھائی نہیں دیتا بلکہ سرحد پار سے کی گئی فوجی کارروائی ہے۔ اس حملے کے تناظر میں بھارت کے وزیر داخلہ راج ناتھ سنگھ نے فون پر ریاستی انتظامیہ سے صورت حال بارے معلومات حاصل کرنے کے علاوہ روس اور امریکا کے اپنے دورے منسوخ کر دیے ہیں۔ وزیر داخلہ نے یہ بھی بتایا کہ حملے کے علاقے میں فوری طور پر متعین فوج کو الرٹ کر دیا گیا ہے۔
پہلے پولیس کی جانب سے دو فوجیوں کی ہلاکت کا بتایا گیا تھا۔ پولیس کے مطابق حملہ آور پاکستان کی جانب سے داخل ہوئے تھے۔ دو طرفہ فائرنگ میں چار حملہ آوروں کو ہلاک کرنے کا بھی بتایا ہے۔ فوج کے ترجمان کے مطابق حملہ آوروں نے اپنی ہلاکت تک فائرنگ کا سلسلہ جاری رکھا۔ عینی شاہدین کے مطابق فوجی مرکز کے اندر سے دھوئیں کے گہرے سیاہ بادل دور سے بھی اٹھتے ہوئے دیکھے گئے۔
بھارتی وزیر اعظم نریندر مودی نے اُڑی کے فوجی اڈے پر حملے کی کڑے الفاظ میں مذمت کی ہے۔ اپنے ٹویٹر پیغام میں انہوں نے کہا کہ بھارتی کشمیر کے فوجی اڈے پر حملہ دہشت گردی کی ایک بزدلانہ کاررائی ہے۔ ان کے بقول وہ قوم کو یقین دلاتے ہیں کہ اُڑی کی فوجی چھاؤنی پر حملے اور ان سترہ فوجیوں کی ہلاکت میں ملوث افراد سزا سے بچ نہیں سکیں گے۔ مودی نے تمام ملوث افراد کو کیفر دار تک پہنچانے کا عزم بھی ظاہر کیا۔