ایمپیوٹیشن کی وجہ سے نہ صرف اس مریض کو تکلیف دہ صورتحال سے گزرنا پڑتا ہے بلکہ اسکے اہل خانہ کو شدید مالی مشکلات کا شکار ہونا پڑتا ہے اور اس سے علاج فراہم کرنے والے اداروں پر بھی بوجھ بڑھ جاتا ہے۔

آسٹریلیا میں ہونے والی تحقیق میں یہ انکشاف ہوا ہے کہ کولیسٹرول پر قابوپانے کے لئے استعمال ہونے والی ایک دوا شوگر کے مریضوں میں جسمانی اعضاء کو انفیکشن کی وجہ سے کاٹنے کے امکانات میں کمی کا باعث بنتی ہے۔ فینوفائبریٹ نامی اینٹی کولسیٹرول دوائی کے استعمال سے جسمانی اعضاء کے کٹنے کے امکانات میں 36 فیصد تک کمی واقع ہوجاتی ہے۔ آسٹریلیا میں پانچ سال پر محیط اس تحقیق میں زیابیطس کے 9795 مریضوں کو شامل کیا گیا۔ ان میں سے 4895 مریضوں کو فینوفائبریٹ نامی یہ دوائی دی گئی جبکہ باقی مریضوں کو ان کے علم میں لائے بغیر جو دوائی دی جاتی رہی وہ دراصل بے اثر تھی۔ لہذا وہ مریض یہی سمجھتے رہے کہ انہیں بھی ایک ہی جیسی دوائی دی جارہی ہے۔

پانچ سال تک جاری رہنے والی اس تحقیق کے اختتام تک انفیکشن کی وجہ سے 115 مریضوں کے جسم کے نچلے حصے کے مختلف اعضا کاٹنے کی نوبت آئی۔ اور اہم بات یہ تھی کہ فینوفائبریٹ لینے والے مریضوں کی تعداد میں اس طرح کے واقعات نہ لینے والوں کی نسبت 36 فیصد کم تھے۔ یونیورسٹی آف سڈنی کے نیشنل ہیلتھ اینڈ میڈیکل ریسرچ کونسل کلینیکل ٹرائلز سنٹر میں ہونے والی اس تحقیق کے سربراہ اینتھونی کِیچ اس کمی کی وجہ فینوفائبریٹ کو قرار دیتے ہیں۔ ان کے مطابق اس تحقیق کے نتائج ایمپیوٹیشن یعنی اعضاء کٹنے سے بچانے کے لئے استعمال ہونے والے موجودہ طریقہ علاج میں بڑی تبدیلی کا پیش خیمہ ثابت ہوسکتے ہیں۔