اطلاعات کے مطابق کوہاٹ  سے تقریبا ً28 کلومیٹر جنوب میں لاچی ٹول پلازہ کے قریب مسلح افراد نے بدھ کو علی الصبح ایک پولیس چیک پوسٹ پر حملہ کر دیا، جس کے نتیجے میں تین پولیس اہلکار اور ایک عام شہری ہلاک ہو گیا۔

ذرائع کے مطابق حملے کے بعد کچھ دیر تک فائرنگ کا تبادلہ ہوا اور حملہ آور فرار ہونے پر مجبور ہوگئے۔ بعد ازاں پولیس نے علاقے میں سرچ آپریشن شروع کر دیا ہے۔ انہوں نے بتایا کہ حملہ آوروں کی تعداد دس سے زائد تھی۔

 رواں ہفتے ہونے والا یہ تیسرا بڑا حملہ ہے، جس میں پولیس اہلکاروں کی جان گئی ہے۔

پیر کے روز، ضلع باجوڑ کی تحصیل ماموند میں پولیو کے قطرے پلانے والے کارکنوں کی حفاظت کے لیے تعینات کم از کم پانچ پولیس اہلکار سڑک کنارے نصب بم دھماکہ ہوجانے سے ہلاک ہوگئے تھے۔

پاکستان: خود کش حملے میں سکیورٹی فورسز کے متعدد اہلکار ہلاک

یہ پولیس اہلکار ایک گاڑی میں انسداد پولیو مہم کے دوران سکیورٹی کی ڈیوٹی سر انجام دینے کے لیے جا رہے تھے کہ انہیں نشانہ بنایا گیا تھا۔ اس حملے میں 20 اہلکار زخمی بھی ہوئے تھے۔ بعد میں ان میں سے دو دیگر بھی جانبر نہ ہوسکے اور مرنے والوں کی تعداد بڑھ کر سات ہوگئی ہے۔

ضلع بنوں میں بھی عسکریت پسندوں کا حملہ

مشتبہ عسکریت پسندوں نے منگل کے روز شمال مغربی پاکستان کے بنوں ضلعے میں پولیو کے قطرے پلانے والے کارکنوں کی حفاظت پر مامور دو سکیورٹی اہلکاروں کو گولی مار کر ہلاک کر دیا۔

بنوں کے پولیس سربراہ الطاف خان نے بتایا کہ اس حملے میں دو پولیس اہلکار زخمی بھی ہوگئے۔

 بنوں میں ہونے والے اس دہشت گردانہ حملے کی ذمہ داری کسی نے ابھی قبول نہیں کی ہے۔

افغان طالبان سے مذاکرات کے لیے مولانا فضل الرحمان کابل میں

خبر رساں ادارے اے ایف پی کے مطابق ماموند حملے کے بعد ٹی ٹی پی نے ایک بیان میں اس کی ذمہ داری قبول کرنے کا دعویٰ کیا تھا۔

سرکاری اعداد و شمار کے مطابق خیبر پختونخوا میں گزشتہ سال دہشت گردی کے مجموعی طورپر 1050واقعات رونما ہوئے۔

خیبر پختونخوا میں دہشت گردی میں ایک پھر اضافہ

ضلع باجوڑ کی تحصیل ماموند افغانستان کی سرحد سے 14 کلومیٹر کے فاصلے پر واقع ہے اور حالیہ مہینوں میں ملک میں ہونے والے عسکریت پسندوں کے حملوں کے بعد پاکستانی حکام یہ کہتے آئے ہیں کہ ان کے تانے بانے افغانستان کی سرزمین پر سرگرم کالعدم تحریک طالبان پاکستان (ٹی ٹی پی) سے ملتے ہیں۔ طالبان حکومت تاہم ان الزامات کی تردید کرتی ہے۔

ج ا/ ص ز (نیوز ایجنسیاں)