برلینالے فلم فیسٹیول 2017ء میں شرکت کرنے والی اہم ترین شخصیات میں اس فیسٹیول کی جیوری کی رُکن میگی جیلن ہال بھی شامل ہیں۔ ریڈکارپٹ پر انہیں انتہائی پرجوش انداز میں خوش آمدید کہا گیا۔ فیسٹیول کی افتتاحی پریس کانفرنس کے دوران جیلن ہال کا کہنا تھا، ’’ایک بین الاقوامی میلے میں ایک امریکی ہونا انتہائی دلفریب ہے۔‘‘

فرانسیسی اداکارہ کلوٹلڈ کوئرو نے انتہائی دلکش سیاہ پشواز زیب تن کر رکھا تھا۔ ان کی آمد پر ہر شخص صرف انہی کی طرف متوجہ تھا۔

رواں برس کی سات رُکنی جیوری میں آئس لینڈ کے اداکار اولافوئر الیاسن، تیونس کی پروڈیوسر ڈورا بشوشا فوراٹی، جرمن اداکارہ ژولیا ژینٹش، امریکی اداکارہ میگی جیلن ہال، ڈچ ڈائریکٹر پال ویئرہوون (جیوری کے صدر)، چینی ڈائریکٹر وانگ چوانان اور میکسیکو سے تعلق رکھنے والے ڈائریکٹر ڈی اِیگو لُونا شامل ہیں۔ اس تصویر میں یہ ارکان بالترتیب بائیں سے دائیں موجود ہیں۔

جیوری کے صدر ڈائریکٹر پال ویئرہوون (روبو کوپ، بیسِک انسٹینکٹ) نے یہ بات تسلیم کی کہ گولڈن بیئر کے مقابلے کے شعبے میں شریک 18 فلموں میں سے بہت سی ایسی ہیں، جن کی کہانیاں سیاست سے متعلق ہیں۔ تاہم انہوں نے امید ظاہر کی کہ جیوری فلموں کے معیار کو پرکھے گی نہ کہ ان میں دیے گئے سیاسی پیغام کو۔

67ویں برلینالے فلم فیسٹیول کی افتتاحی تقریب کے شرکاء کو فلم ’جانگو‘ دکھائی گئی، جو اس کا بین الاقوامی پریمیئر تھا۔ یہ پیرس کے ایک جاز موسیقار کی زندگی پر بنائی گئی ہے جنہیں دوسری عالمی جنگ کے دوران نازیوں کے اقدامات کے باعث ملک چھوڑنا پڑا۔ یہ فلم گولڈن بیئر کے مقابلے میں شریک ہے اور اسے کافی توجہ مل رہی ہے۔

فلم جانگو کی کاسٹ میں شامل چھ اداکار اس فلم کے افتتاحی شو میں شامل ہوئے۔ ان میں بیلجیم سے تعلق رکھنے والی اداکارہ سیسیل ڈے فرانس (بائیں سے دوسری)، فرانسیسی ڈائریکٹر ایٹیئن کومار (بائیں سے تیسرے)، فرانسیسی اداکار ریدا کاتب (دائیں سے تیسرے) اور ہنگری سے تعلق رکھنے والی اداکارہ اور گلوکارہ بیاٹا پائیلا (دائیں سے دوسری) شامل ہیں۔

67 ویں برلینالے فلم فیسٹیول کی افتتاحی تقریبات کے 1600 سے زائد مہمانوں میں جرمنی کے کئی اہم شخصیات بھی شامل تھیں۔ ان میں کامیڈین آنکے اینگلیکے، فلم ڈائریکٹر آندریاس ڈریسن اور جرمنی کی قومی فٹبال ٹیم کے رکن جیروم بوآتنگ (تصویر میں دکھائے گئے) بھی شامل تھے۔

ریڈ کارپٹ پر آنے والوں میں ایسے نامور افراد بھی شامل تھے جنہوں نے کیمرے کے سامنے مگر مختلف انداز سے شہرت کمائی۔ اس تصویر میں یوٹیوب وی لاگ کرنے والے برطانوی کامیڈین مارکوس بٹلر اور جرمنی کی ’نیکسٹ ٹاپ ماڈل‘ کا مقابلہ جیتے والی اسٹیفانی گائیزنگر کو ایک ساتھ دیکھا جا سکتا ہے۔

برلینالے فلم فیسٹیول کی افتتاحی تقریب اور جانگو کی اسکریننگ میں کئی جرمن ایوارڈ یافتہ ڈائریکٹرز بھی شامل ہوئے۔ فولکر شلوئنڈورف کو یہاں اپنی بیوی انگلیکا کے ساتھ دیکھا جا سکتا ہے۔ اس کے علاوہ آندریاز ڈریسن اور وِم وینڈرز بھی اس تقریب میں شریک ہوئے۔

جرمنی کی گرین پارٹی کی رکن پارلیمان کلاؤڈیا روتھ ریڈکارپٹ پر ایک پیغام کے ساتھ جلوہ گر ہوئیں۔ قبل ازیں وہ اپنے دوست رچرڈ گیئر سے بھی ملیں، جنہوں نے جرمن چانسلر انگیلا میرکل سے ایک پرائیویٹ میٹنگ کے دوران تبت کے معاملے پر بات چیت کی۔

جرمنی کے معروف ترین فنکاروں میں سے ایک اور جرمن فلم اکیڈمی کی صدر ایرِس بیربن نے ریڈکارپٹ پر رُک کر اپنے ایک مداح کے ساتھ سیلفی بنوائی۔