مصنوعی ذہانت کے حامل کِلرز روبوٹس سائنس فکشن کا کوئی کردار دکھائی دیتے ہیں لیکن یہ ہتھیار انسانوں کے لیے ڈراؤنے خواب سے بھی زیادہ خوف ناک ثابت ہو سکتے ہیں۔ کِلرز روبوٹس کے نظریے کو بظاہر مشہور برطانوی سائنسدان اسٹیفن ہاکنگ اور ایپل ٹیکنالوجی کے شریک بانی اسٹیو ووزنیاک نے کسی حد تک پسند کیا ہے لیکن سائنسدانوں کی ایک بہت بڑی تعداد نے اقوامِ عالم کے حکمرانوں کے نام کھلا خط تحریر کر کے اِن کی تیاری اور پھر ممکنہ استعمال سے اجتناب کا مشورہ دیا ہے۔

ایک ہزار کے قریب سائنسدانوں اور ٹیکنالوجی چیفس کی جانب سے ایک کھلا خط عالمی لیڈروں کے نام Artificial Intelligence یا مصنوعی ذہانت کے موضوع پر شروع ہونے والی انٹرنیشنل کانفرنس کے آغاز پر جاری کیا گیا ہے۔ یہ کانفرنس ارجنٹائن کے دارالحکومت بیونس آئرس میں شروع ہوئی ہے۔ سائنسدانوں نے اپنے خط میں تحریر کیا کہ انسانوں کی بقا کے حوالے سے اہم سوال یہ ہے کہ آیا مصنوعی ذہانت کے حامل خود کار ہتھیاروں کی دوڑ شروع کی جائے یا آغاز سے قبل ہی اِس عمل کو ممنوع قرار دے دیا جائے۔ خط میں بیان کیا گیا کہ اگر بڑی عالمی طاقتیں ہلاکت خیز روبوٹس کی تیاری کے عمل کا آغاز کرتی ہیں تو یہ عالمی سطح پر اسلحے کی دوڑ کے ایک نئے عہد کے آغاز کے مترادف ہو گا۔

اپنے خط میں سائنسدانوں نے مصنوعی ذہانت کے حامل خود کار کِلرز روبوٹس کے تناظر میں ایک انتہائی ڈراؤنا منظر پیش کیا ہے کہ اگر یہ دہشت گردوں یا ڈکٹیٹرز یا جنگی سرداروں کے ہاتھ لگ جاتا ہے تو پھر نسل کُشی یا ہزاروں مخالفین کو نیست و نابود کرنے کا عمل سہل انداز میں ممکن ہو گا۔ سائنسدانوں نے حکومتوں کو مشورہ دیا ہے کہ مصنوعی ذہانت کے استعمال سے جنگوں کے دوران بھی سویلین آبادیوں کو تحفظ فراہم کیا جا سکتا ہے۔ مزید کہا گیا کہ ایسے ہتھیاروں کی دریافت اور ممکنہ استعمال سے جنگوں میں ہلاکتوں میں کمی بھی لائی جا سکتی ہے یا پھر تنازعات کو محدود کرتے ہوئے جنگی خطرے کم سے کم کرنا بھی ممکن ہو سکتا ہے۔ سائنسدانوں نے انسانی کنٹرول سے باہر جانے والے خود کار ہتھیاروں کے استعمال پر مکمل پابندی کی اپیل بھی کی ہے۔

کِلرز روبوٹس یا خود کار ہلاکت خیز مشینیں بغیر انسانوں کے اڑنے والے ڈرونز سے مختلف ہیں کیونکہ ڈرون کے پیچھے انسانی ہاتھ کارفرما ہوتے ہیں جبکہ کِلرز روبوٹس اپنی مصنوعی ذہانت سے فوری طور پر فیصلہ کر کے اُن پر عمل کرنے کی صلاحیت کے حامل ہوں گے۔ کِلرز روبوٹس کے نظریے کو شہرت مشہور اداکار ارنلڈ شواٹزنیگر کی فلم سیریز ’’ٹرمینیٹر‘‘ سے حاصل ہوئی تھی۔ اب یہ کِلنگ مشینیں سائنس فکشن سے حقیقت کا روپ دھارتی دکھائی دے رہی ہیں۔ اِن کی تیاری دہائیوں کی بات نہیں بلکہ چند برسوں میں ممکن ہے۔ اُن کے حقیقی خطرے کا احساس کرتے ہوئے ہی سائنسدانوں نے دنیا کے لیڈران کے نام یہ انتباہی کھلا خط جاری کیا ہے۔

پے پال ادارے کے شریک بانی اور ارب پتی ایلن مَسک نے دنیا بھر کے انسانوں سے بھی اپیل کی ہے کہ وہ کِلرز روبوٹس کے خلاف سائنسدانوں کے ہمراہ عالمی مہم کا حصہ بنیں۔ آسٹریلیا کی نیو ساؤتھ ویلز یونیورسٹی کے مصنوعی ذہانت کے پروفیسر ٹوبی والش کا خیال ہے کہ ہر ٹیکنالوجی کے مثبت اور منفی پہلو ہوتے ہیں۔ ارجنٹائن کے مصنوعی ذہانت کے ریسرچر ریکاردو روڈریگز کا خیال ہے کہ مصنوعی ذہانت کے حوالے سے تفکرات و خطرات کچھ زیادہ ہی بڑھا چڑھا کر بیان کیے گئے ہیں۔ برطانوی سائنسدان اسٹیفن ہاکنگ کا کہنا ہے کہ مصنوعی عقل کے حامل روبوٹس کے حوالے سے وہ پیشنگوئی کرتے ہیں کہ یہ انجام کار انسانی عقل کے مقابل آ جائیں گے۔

ہتھیاروں پر نگاہ رکھنے والے ماہرین کا خیال ہے کہ اگر مصنوعی ذہانت کے حامل کِلرز روبوٹس کی تیاری شروع کر دی جاتی ہے تو یہ جدید ہتھیار سازی کا تیسرا انقلابی عہد ہو گا۔ جدید ہتھیار سازی میں پہلا انقلاب بارود یا گَن پاؤڈر کے استعمال کو قرار دیا جاتا ہے اور دوسرا انقلاب جوہری ہتھیار کہلاتے ہیں۔