پاکستانی ذرائع ابلاغ اور سوشل میڈیا پر پاکستان کی سیاسی جماعت پی ٹی آئی کے سربراہ عمران خان کی تیسری مبینہ شادی کی خبریں اب بھی لوگوں میں توجہ کا مرکز بنی ہوئی ہے۔
تصویر: Reuters/C. Firouz
اشتہار
پاکستانی ذرائع ابلاغ کی ان خبروں کے بعد کہ عمران خان تیسری شادی کر چکے ہیں، سوشل میڈیا کی ویب سائٹس پر ایک نہ تھمنے والا قیاس آرائیوں کا سلسلہ شروع ہو گیا ہے۔ اس وقت بھی پاکستان میں ٹوئٹر پر سب سے زیادہ ٹرینڈ کرتا ہوا موضوع بشریٰ مانیکا ہے جو کہ عمران خان کی مبینہ طور پر تیسری بیوی کا نام بتایا جارہا ہے۔ شادی کی ان خبروں میں کتنی صداقت ہے , اس بارے میں پاکستان تحریک انصاف کے آفیشل پیج پر ایک پیغام جاری کیا گیا ہے، جس میں اس بات کی تصدیق کی جا چکی ہے کہ بشری مانیکا نامی خاتون کو تحریک انصاف کے چیئرمین کی جانب سے شادی کا پیغام بھیجا گیا ہے، جس پر ابھی اس خاتون کی جانب سے کوئی حتمی جواب نہیں مل سکا ہے تاہم جیسے ہی جواب موصول ہو گا، عمران خان اس بارے میں مناسب طریقے سے اعلان کریں گے۔
عوام کی انتہائی دلچسپی کا باعث بنی ان خبروں کےحوالے سے صحافی عائشہ احد ملک کہتی ہیں کہ عمران خان نے شادی کر لی ہے یا صرف رشتہ بھیجا ہے ، اس معاملے کو اچھالنا نہیں چاہئے۔
ملک کے ایک اور سنئیر صحافی حامد میر اپنی ایک ٹوئیٹ میں پوچھتے ہیں کہ کیا واقعی عمران خان کی مبینہ شادی ان کا ذاتی معاملہ ہے؟
سینئیر صحافی آفتاب اقبال بھی ایک ٹوئٹر پیغام میں اس بات پر افسوس کا اظہار کر رہے ہیں کہ غیر ذمہ دار صحافت اور چند بیوقوف سوشل میڈیا صارفین ایک نہایت افسوسناک دن کی وجہ بنے ہیں۔
یاد رہے کہ تحریک انصاف کے چیئرمین عمران خان کی مبینہ طور پر بشریٰ مانیکا نامی خاتون سے تیسری شادی ہوجانے کی خبر سب سے پہلے اس برس چھ جنوری کو سامنے آئی جس کے بعد ملکی میڈیا اور سماجی رابطوں کی ویب سائٹس پر اس معاملے کو بڑے پیمانے پر کوریج دی جا رہی ہے۔
کپتان زندگی کے میدان میں ایک بار پھر تنہا
پاکستان تحریک انصاف کے سربراہ عمران خان اور ان کی اہلیہ ریحام خان میں طلاق ہو گئی ہے۔ اس طلاق کے بارے میں مقامی ذرائع ابلاغ میں کئی مہینوں سے چہ میگوئیاں ہو رہی تھیں۔
تصویر: DW
صرف دس ماہ
عمران خان اور ریحام خان رواں برس آٹھ جنوری کو رشتہ ازدواجی سے منسلک ہوئے تھے۔ اس طرح یہ دنوں تقریباً دس ماہ ہی شادی کے بندھن میں بندھے رہے۔ عمران خان نے جمائما خان سے پہلی شادی کے اختتام کے بعد تقریباً گیارہ برس بعد شادی کی تھی۔
تصویر: Facebook/Imran Khan Official
ریحام خان کی بھی دوسری شادی تھی
اکتالیس سالہ ریحام خان کی پہلی شادی سے ایک بیٹا اور دو بیٹیاں ہیں جو برطانیہ میں مقیم ہیں۔ ریحام خان کی چند سال قبل اپنے پہلے شوہر ماہر نفسیات اعجاز رحمان سے علیحدگی ہو ئی تھی۔
تصویر: picture-alliance/AP Photo/B.K. Bangash
عمران خان کی ٹویٹ
عمران خان نے اپنے ٹویٹر پیغام میں لکھا ہے کہ وہ ریحام خان کی بہت عزت کرتے ہیں اور یہ ان کے اور ریحام کے ساتھ ساتھ دونوں کے اہل خانہ کے لیے بہت تکلیف دہ وقت ہے۔ انہوں نے طلاق کے معاملے پر رقم کے لین دین سے متعلق خبروں کی سختی سے تردید کی۔ ’’برائے مہربانی اس معاملے پر کسی بھی قسم کی قیاس آرائی نہ کی جائے۔‘‘
تصویر: DW/S. Rahim
ریحام خان کہاں ہیں؟
ذرائع نے بتایا ہے کہ ریحام خان اس وقت برمنگھم میں موجود ہیں۔ ریحام خان نے اپنے ٹویٹر پیغام میں لکھا: ’’ہم نے اپنے راستے الگ کرنے کا فیصلہ کرتے ہوئے طلاق کے لیے رجوع کر لیا ہے۔‘‘
تصویر: Facebook/Imran Khan Official
جمائما خان سے پہلی شادی
عمران خان نے 1995ء میں برطانوی بزنس مین جیمز گولڈ اسمتھ کی بیٹی جمائما گولڈ اسمتھ سے کی تھی۔ تاہم نوے کی دہائی کے وسط میں اپنی سیاسی اننگز کا آغاز کرنے والے عمران خان کی یہ شادی نو برس قائم رہنے کے بعد ء2004 میں ٹوٹ گئی تھی۔ پہلی شادی میں سے عمران خان کے دو بیٹے ہیں جو اس وقت لندن میں اپنی والدہ کے ساتھ قیام پذیر ہیں۔
تصویر: picture-alliance/AP
دوسری شادی کا فیصلہ
عمران خان کا کہنا تھا کہ دوسری شادی کا معاملہ اولاد کی وجہ سے حساس ہوتا ہے۔ انہوں نے 10سال تک بچوں کی وجہ سے شادی کا سوچا بھی نہیں، لیکن اب وہ اپنے بچوں کو اعتماد میں لے چکے ہیں۔
تصویر: picture-alliance/AP Photo/K. M. Chaudary
ریحام خان کی صحافتی سرگرمیاں
ریحام خان کا تعلق پاکستان کے صوبے خیبر پختوانخواہ کے دارالحکومت پشاور سے ہے۔ وہ بین الاقوامی نشریاتی ادارے بی بی سی کے علاوہ مختلف پاکستانی چینلز کے ساتھ بھی کام کر چکی ہیں۔ کہتے ہیں کہ عمران خان کے ساتھ ایک انٹرویو کے بعد ہی دونوں ایک دوسرے کے قریب آئے تھے۔
تصویر: Getty Images/AFP/A. Ali
طلاق کی افواہیں
عمران اور ریحام خان کے مابین علیحدگی کے حوالے سے گزشتہ کئی ماہ سے مقامی سطح پر افواہیں گردش کر رہی تھیں۔ ذرائع نے بتایا ہے کہ ریحام خان کی جانب سے پاکستان تحریک انصاف کے معاملات میں مداخلت طلاق کی ایک بڑی وجہ بنی۔
تصویر: DW/F. Khan
پی ٹی آئی کی جانب سے تصدیق
پاکستان تحریک انصاف کے ترجمان نعیم الحق نے تصدیق کرتے ہوئے بتایا کہ طلاق کا فیصلہ عمران خان اور ریحام خان کی باہمی رضامندی سے آج جمعے کو ہی کیا گیا ہے۔