سِلیکون وَیلی کے سٹار ایلون مَسک نے، جواسپیس ایکس اور ٹیسلا موٹرز کے بانی ہیں، گزشتہ سال موسمِ گرما میں خبردار کرتے ہوئے کہا تھا کہ ’مصنوعی ذہانت‘ کی صورت میں انسان نے اپنی بقا کے لیے سب سے بڑے خطرے کو جنم دیا ہے۔ اسٹیفن ہاکنگ بھی تشویش کا اظہار کرتے ہوئے کہہ چکے ہیں کہ ’مصنوعی ذہانت‘ ممکنہ طور پر وہ سب سے بڑی غلطی ہے، جو انسان سے سرزد ہوئی ہے۔

لیکن کیا ایسا نہیں ہے کہ ’مصنوعی ذہانت‘ کے حامل روبوٹ مستقبل میں انسان کو مدد اور تعاون فراہم کریں گے، جیسا کہ ہالی وُڈ کی تازہ سائنس فکشن فلم ’چَیپی‘ میں دکھایا گیا ہے؟ اس فلم کے مطابق اس روبوٹ کو اس طرح سے پروگرام کیا جاتا ہے کہ وہ سوچ بھی سکتا ہے اور محسوس بھی کر سکتا ہے۔ یہ روبوٹ پولیس کے ایک جارح روبوٹ یونٹ پر قابو پانے میں انسانوں کی مدد کرتا ہے۔

حالیہ کچھ عرصے پر ایک نظر ڈالنے سے پتہ چلتا ہے کہ ابھی ’مصنوعی ذہانت‘ کے معاملے میں بہت کچھ گڑبڑ بھی ہو سکتی ہے مثلاً 2011ء کے موسمِ گرما میں امریکی فوج کے فالکن ایچ ٹی وی ٹو نامی ڈرون کی آزمائشی پرواز کوئی مثالی منصوبہ ثابت نہ ہوا۔ بغیر پائلٹ کے چلنے والا اور آواز سے زیادہ رفتار کا حامل یہ ہوائی جہاز اپنی پرواز شروع کرنے کے صرف نو منٹ بعد ہی سمندر میں غرق ہو گیا تھا۔

اس موضوع پر تمام تر تازہ بحث مباحثے کے باوجود حقیقت یہ ہے کہ فوجی نظاموں میں ’مصنوعی ذہانت‘ کوئی نئی بات نہیں ہے۔ گزشتہ تقریباً بیس برسوں سے ’مصنوعی ذہانت‘ کے حامل اجزاء ہی کی بدولت بہت سے فوجی نظام بہتر طور پر کام کر رہے ہیں۔ اس کی ایک مثال یورو فائٹر ہے۔

وقت کے ساتھ ساتھ ’ذہین‘ مشینیں زیادہ سے زیادہ غیر معمولی ہوتی جا رہی ہیں گو روزمرہ زندگی سے ابھی وہ اتنی مطابقت نہیں رکھتی ہیں۔ چار ٹانگوں والا روبوٹ ’بِگ ڈاگ‘ اپنے ساتھ وزن لے کر ناہموار زمین پر چڑھ اتر سکتا ہے اور برف پر چل سکتا ہے۔ دریں اثناء گوگل نے یہ روبوٹ تیار کرنے والی کمپنی بوسٹن ڈائنیمِکس خرید لی ہے۔

یقینی بات یہ ہے کہ ’مصنوعی ذہانت‘ کے حامل نظاموں میں ہونے والی تیز رفتار ترقی کے سبب اس بحث کی ضرورت بہرحال موجود ہے۔ ’مصنوعی ذہانت‘ کے غلط استعمال کو روکنے کے لیے پیشگی کوششوں کی ضرورت ہے اور ’مصنوعی ذہانت‘ کو ذمے داری کے ساتھ پروگرام کرنے کے سلسلے میں کبھی نہ کبھی تو بنیادی اخلاقی اصول، سیاسی ضابطے اور معیارات طے کرنا ہی ہوں گے۔

آج کل کے انسان نما روبوٹس میں شاید یہ سب سے زیادہ لاجواب ہے، روبوائے۔ اس کی جِلد ہموار ہے اور پٹھے اور نسیں بھی ہیں، جنہیں دیکھ کر یہ بالکل کسی انسان کی طرح لگتا ہے۔ روبوائے مصافحہ کر سکتا ہے، بول بھی سکتا ہے اور کبھی کبھی اپنے احساسات اور جذبات کا اظہار بھی کر جاتا ہے۔

انسان نما روبوٹس کی ایک اور اچھی مثال ہے، جسٹن، جسے جرمن انسٹیٹیوٹ فار ایرو اسپیس (DLR) نے تخلیق کیا ہے۔ یہ ننھا روبوٹ بنیادی طور پر اُس روبوٹ بازو کا ایک حصہ ہے، جس نے بین الاقوامی خلائی اسٹیشن آئی ایس ایس پر پانچ سال گزارے۔ اسے خلاء کے لیے وضع کیا گیا تھا لیکن اب یہ کھڑکیاں صاف کرنے جیسے عام روزمرہ کام بھی انجام دے سکتا ہے۔

توریت کی پوری عبارت کو تحریر کرنے کے لیے ایک ماہر کاتب کو ایک سال درکار ہوتا ہے۔ ’بائیوس‘ نامی اس روبوٹ نے یہ سارا متن دَس ہفتوں میں لکھ ڈالا۔ ایک قلم اور روشنائی سے مسلح اس روبوٹ نے کاغذ کے ایک اَسّی میٹر بڑے رول پر مجموعی طور پر تین لاکھ چار ہزار آٹھ سو پانچ الفاظ لکھے۔

میکانی آلات بنانے میں چین بھی بہت آگے ہے۔ بہت سے چینی ریستورانوں میں آپ کو اس طرح کے روبوٹس نظر آئیں گے، جو گاہک کی میز پر جا کر آرڈر لینے کی ذمے داری سرانجام دیتے ہیں۔

اور ہاں، یہ چھوٹے چھوٹے انسان نما روبوٹس کھانا پیش کرنے کی بھی اہلیت رکھتے ہیں۔ روبوٹس نہ تھکتے ہیں اور نہ ہی شکایت کرتے ہیں۔

روبوٹس باورچی خانے میں بھی خدمات انجام دینے کے قابل ہو چکے ہیں، یہ اور بات ہے کہ وہاں ان کا کردار کافی محدود ہوتا ہے مثلاً پہلے سے تیار شُدہ کھانوں کو گرم کرنا۔ اصل کھانا اُن کے انسانی ساتھی ہی پکاتے ہیں۔

اس گیلری میں دکھائے گئے زیادہ تر روبوٹس کے برعکس ایسے روبوٹس بھی ہوتے ہیں، جو انسان نما نہیں ہوتے بلکہ ایک مشین ہی کی طرح نظر آتے ہیں۔ مثلاً اس تصویر میں نظر آنے والے روبوٹ کا نہ کوئی سر ہے، نہ بازو اور نہ ہی ٹانگیں لیکن چونکہ یہ گاہکوں کے سامنے کام نہیں کر رہا، اس لیے اِس کی شکل و صورت کا معاملہ ثانوی ہے۔

یہ تصویر چینی شہر شنگھائی کے قریب ایک روبوٹ ریستوراں کی ہے۔ یہاں روبوٹ محض تفریح کے مقصد کو پورا کرتے ہیں۔ انٹرنیٹ پر پوسٹ کیے جانے والے پیغامات سے پتہ چلتا ہے کہ یہ تفریح لوگوں کو پسند آتی ہے۔ ایک پیغام میں لکھا تھا:’’تجربہ شاندار رہا، خوراک خوف ناک تھی۔‘‘

مرسیڈیز بینز کا یہ پروٹوٹائپ، F015 دیکھ کر پتہ چلتا ہے کہ ایک خودکار گاڑی دیکھنے میں کس طرح کی ہو گی۔ اس میں ڈرائیور کی کوئی سیٹ ہو گی ہی نہیں اور مسافروں کا رُخ ایک دوسرے کی جانب ہے۔ یہ پروٹوٹائپ بھی سیلیکان ویلی میں ہی تیار کیا گیا ہے۔ یہ کار زیادہ سے زیادہ 125 میل فی گھنٹہ کی رفتار سے سفر کر سکتی ہے۔

اس آؤڈی سیون میں بے شمار سینسرز لگے ہیں۔ رواں برس کے آغاز میں اس کار نے سیلیکان ویلی سے لاس ویگاس تک کا سفر کیا جہاں یہ CES ٹریڈ فیئر میں شریک ہوئی۔ 600 میل کے اس سفر میں ایک ڈرائیور تمام وقت اسٹیئرنگ کے پیچھے موجود رہا تاکہ کسی ایمرجنسی کی صورت میں وہ کنٹرول سنبھال سکے۔ تاہم اس سفر میں یہ سب کچھ درست رہا۔

گوگل اپنی تیار کردہ روبوٹک گاڑی کو کافی عرصے تک پہاڑی علاقوں میں بھی آزماتا رہا ہے۔ تاہم اب تک ایسی گاڑی میں ایک ڈرائیور ہر وقت موجود رہتا ہے تاکہ ضرورت پڑنے پر وہ کنٹرول سنبھال سکے۔

خودکار طریقے سے سفر کرنے والی کاریں انتہائی محفوظ ہیں۔ اگر سڑک پر صورتحال درست نہیں ہے تو اس کی رفتار کم ہو جاتی ہے۔ یہ اپنے سے آگے والی کار سے ایک محفوظ فاصلہ برقرار رکھتی ہے اور سامنے والی کار کے ساتھ بالکل جُڑ کر نہیں چلتی۔

یہ دو خودکار گاڑیاں جرمن شہر میونخ میں واقع ’یونیورسٹی آف بنڈس ویئر‘ کی طرف سے تیار کی گئی ہیں اور یہ ’میولے سنیریو‘ میں سفر کر رہی ہیں جس میں پیچھے والی کار ہمیشہ اپنے سے آگے والی کار کی پیروی کرتی ہے۔ یہ کاریں دراصل ملٹری روبوٹک مقابلے میں شریک ہیں جس میں انہوں نے ناہموار راستوں پر سفر کرنا تھا، جس میں یہ کامیاب رہیں۔

زیادہ تر حادثات محدود نظارے کی وجہ سے پیش آتے ہیں مثال کے طور پر دھند جیسی صورتحال وغیرہ۔ ایسے میں تیز رفتاری سے سفر کرنے والے مناسب فاصلہ قائم نہیں رکھ پاتے۔ تاہم مصنوعی ذہانت رکھنے والی روبوٹک گاڑیاں ایسی غلطی نہیں کرتیں۔ مستقبل میں کاریں آپس میں بھی معلومات کا تبادلہ کریں گی اور آگے والی کار پیچھے آنے والی کاروں کو ٹریفک جام وغیرہ کے بارے میں آگاہ کر دے گی۔

خودکار طریقے سے سفر کرنے والی یہ گاڑیاں اپنے ارد گِرد کی دنیا کو مختلف آنکھوں سے دیکھتی ہیں۔ گوگل کار ایک لیزر سینسر استعمال کرتی ہے جو اپنے ارد گرد ماحول کا سہہ جہتی یا تھری ڈی اسکین کرتا ہے۔

بنڈس ویئر یونیورسٹی کی کار غیر ہموار راستے پر سفر کر رہی ہے۔ لیزر ارد گرد کی چیزوں کو اسکین کرتی ہیں اور کمپیوٹر اس اسکین کی مدد سے ایک تھری ڈی نقشہ تیار کرتا ہے۔

یہ روبوٹک گاڑیاں دیگر سینسرز کی مدد بھی حاصل کرتی ہیں۔ جرمنی کے فرانھوفر انسٹیٹیوٹ فار کمیونیکیشن اینڈ انفارمیشن FKIE کی تیار کردہ یہ گاڑی ایک یو ایس بی کیمرہ استعمال کرتی ہے جو اس کے لیے نظر کا کام کرتا ہے۔ ایک چھوٹا راڈار اور GPS سینسرز کے ذریعے یہ نقشے پر اپنی بالکل پوزیشن کو برقرار رکھتی ہے۔

جرمن کمپنی ڈائملر میں بھی ریسرچرز خودکار کاروں کے لیے آپٹیکل کیمرے کا استعمال کر رہے ہیں۔ وِنڈ اسکرین کے پیچھے لگے کیمرے دیکھتے ہیں کہ سڑک پر کیا ہو رہا ہے اور پھر اس کے مطابق کار کا کمپیوٹر فیصلہ کرتا ہے۔ ڈائملر کا تیار کردہ یہ حفاظتی نظام 2011ء میں جرمنی کے انوویشن ایوارڈ کے لیے بھی نامزد کیا گیا تھا۔

کار میں لگے سینسرز مختلف چیزوں کے بارے میں معلومات چھوٹے چھوٹے نقاط یا پکسلز کی صورت میں جمع کرتے ہیں۔ کمپیوٹر اس بات کا ادراک کرتا ہے کہ پکسلز کی مدد سے بننے والی تصویر میں سے کون سے حصے کس رفتار سے حرکت کر رہے ہیں۔ اس طرح کمپیوٹر کو معلوم ہوتا ہے کہ کار کے ارد گرد کیا ہو رہا ہے۔

روبوٹک کار کا کمپیوٹر یہ فیصلہ کرتا ہے کہ سامنے آنے والا کوئی فرد یا چیز کس طرح حرکت کرے گی اور پھر اس کے مطابق عمل کرتا ہے۔ اس تصویر میں سڑک پر آنے والے شخص کو نارنجی رنگ سے ظاہر کیا گیا ہے جو خطرے کی علامت ہے جبکہ بائیں جانب ٹریفک سبز ہے مطلب اس طرف سے کوئی خطرہ نہیں۔