تیرین کا جنگلاتی علاقہ اتنا خشک ہے کہ ماچس کی ایک تیلی اسے جلا کر خاکستر کر سکتی ہے۔ اسپین میں بدترین جنگلاتی آگ دیکھی جا رہی ہے۔ ویلینسیا، ایلیکانتے اور مُرسیا میں مختلف ٹیمیں آگ کے خلاف مسلسل فعال ہیں۔ ہزاروں رہائشیوں اور سیاحوں کو متاثرہ علاقوں سے نکالا گیا ہے۔ سیاحتی علاقے اندلس اور کاتالونیا اس سے شدید متاثرہ خطے ہیں۔

فرانس میں بھی خشک سالی نے تاریخی شکل اختیار کر لی ہے۔ ملک کے کئی مقامات میں جنگلاتی آگ بھڑکی ہوئی ہے، جس میں بحراوقیانوس کے قریب واقع مشہور سیاحتی ساحل گیروند کا علاقہ بھی شامل ہے۔ اس علاقے سے ہزاروں سیاحوں کو نکالا جا چکا ہے، جب کہ قریبی ہائی ویز بند ہیں۔ ڈیون دے پیلا نامی ایک ہزار سال پرانا جنگل اس آگ کی نذر ہو چکا ہے۔

الگاروے ایک مشہور سیاحتی علاقہ ہے، جہاں آنے والے سیاحوں کو ہوٹل پولز اور لاتعداد شاورز کی سہولت دستیاب ہوتی ہے۔ پرتگال کی معیشت سیاحت پر انحصار کرتی ہے۔ مشکل معاملہ یہ ہے کہ شدید خشک سالی نے اس ملک میں پانی کی قلت پیدا کر دی ہے۔ الگاروے کے علاقے کے ہوٹلوں سے توقع کی جا رہی ہے کہ وہ پانی کا استعمال کم کریں۔ تاہم یہ ہو گا کیسے، کوئی نہیں جانتا۔

ویانا جہاں درجہ حرارت 39 ڈگری سینٹی گریڈ تک دیکھا گیا، وہاں سیاح پانی کی پھوار کے ذریعے گرمی کا مقابلہ کر رہے ہیں۔ ویانا یورپ کے سب سے سرسبز شہروں میں سے ایک ہے، تاہم اسے ماحولیاتی تبدیلیوں نے بدترین انداز سے نشانہ بنایا ہے۔ اسی تناظر میں اس شہر نے گرمی کا مقابلہ کرنے کے لیے پانی کے شاور جگہ جگہ نصب کر کے ’کولنگ زونز‘، پینے کے پانی کے فوارے بنائے ہیں جب کہ مزید درخت لگائے جا رہے ہیں۔

یونان میں شدید گرمی کا اثر جابہ جا ہے۔ دارالحکومت ایتھنز کے نواح میں، کریٹے اور لیسبوس جیسے جزائر پر بھی۔ لیسبوس جزیرے پر پھیلی جنگلاتی آگ جولائی کے آخر تک پھیلتے ہوئے وتیریا کے سیاحتی مقام تک پہنچ گئی تھی، جہاں سیاحوں کو پناہ ڈھونڈنا پڑی جب کہ کوسٹ گارڈز کی مدد سے ان افراد کو متاثرہ علاقوں سے نکالا گیا۔ یونان میں اب بھی کئی مقامات پر جنگلاتی آگ لگی ہوئی ہے۔

سیاح جنہوں نے ڈوبرووینِک کا انتخاب کیا، انہوں نے یہاں 43 ڈگری سینٹی گریڈ تک درجہ حرارت دیکھا۔ یورپ میں گرمی کی چھٹیوں کے موسم میں سیاحتی خدمات فراہم کرنے والی کمپنیاں سیاحوں کی خوش کرنے کی کوشش میں ہیں۔ ان کی کوشش ہے کہ سیاح گرمی پر توجہ نہ دیں اور سیاحت کا لطف لیں۔

ایمسٹرڈیم میں لوگ گرمی سے بچنے کے لیے سمندر کا رخ کر رہے ہیں۔ اسی طرح دریائے ایمسٹل کے کنارے بھی لوگوں کا غیرعمومی رش ہے۔ لیکن نیدرلینڈز میں خشک سالی دریاؤں کے لیے بھی مسئلہ بن رہی ہے۔ پانی کی سطح ہر جگہ گر رہی ہے اور نمکین پانی مختلف آبی راستوں میں داخل ہو رہا ہے۔ اس سے بھی بڑا مسئلہ سیلاب سے بچانے والا نظام بھی شدید گرمی اور خشکی کی وجہ سے خطرے کی زد میں ہے۔

شدید گرمی مناظر تبدیل کر رہی ہے۔ اٹلی کے شمال میں سیاحوں کی ایک اہم منزل یعنی جھیل گاردا میں پانی پندرہ برسوں کے کم ترین سطح پر پہنچ چکا ہے۔ جزیرہ نما سیمیونے میں چٹانیں دیکھی جا رہی ہے اور سیاح اب ان ساحلوں کو پہچان تک نہیں پا رہے ہیں۔ سیاحتی شعبے کے حکام کا تاہم اصرار ہے کہ اس جھیل پر چھٹیاں اب بھی منائی جا سکتی ہیں۔

موسم سرما میں یہاں پڑنے والی برف کے آس پاس حفاظتی شیٹس نصب کی گئی ہیں۔ تاہم دو ہزار برسوں میں پہلی بار تین ہزار میٹر اونچا گلیشیئر کول ڈے زنفلیورں کا ایک حصہ برف سے مکمل طور پر خالی ہو چکا ہے۔ ماہرین ارضیات کے مطابق ستمبر کے آخر تک یہاں فقط چٹانیں دکھائی دیں گی۔ ماہرین کے مطابق اس مقام پر سن 2012 میں پندرہ میٹر موٹی برف کی تہہ تھی۔

کیا یہ لندن ہے؟ یہاں سبز کی بجائے پارکس خشک اور پیلے ہیں۔ عام حالات میں ان پارکس میں ہجوم ہوتا تھا، مگر گرمی شدید ہے اور اب یہ ویران ہیں۔ جولائی میں لندن میں چالیس درجے سیٹی گریڈ تک درجہ حرارت ریکارڈ کیا گیا تھا۔ اسی تناظر میں برطانیہ میں موسمی ہنگامی حالت نافذ کر دی گئی ہیں۔ اگست میں بھی برطانیہ میں کئی مقامات پر بارشیں نہ ہونے سے متاثر ہوئے ہیں۔

بالائے وسطی وادیء رائن، اقوام متحدہ کے ادارہ برائے ثقافت یونیسکو کے تاریخی ورثے میں شامل ہے اور سیاحوں کے لیے ایک پرکشش مقام ہے۔ تاہم دریائے رائن میں یہاں بعض مقامات پر پانی کی سطح چالیس سینٹی میٹر تک گر چکی ہے۔ ایسی صورت میں سامان بردار کشتیاں کم سامان کے ساتھ ہی دریائے رائن کا استعمال کر سکتی ہیں جب کہ فیری سروس معطل کی جا چکی ہے۔

جنوبی فرانسیسی علاقے باؤڈو کے قریب دو مقامات پر لگی جنگلاتی آگ کو بجھانے کے لیے 12 سو فائرفائٹرز مصروف عمل ہیں، جنہیں پانی گرانے والے طیاروں کی مدد بھی حاصل ہے۔ حکام کی جانب سے جاری کردہ تصاویر میں دیکھا جا سکتا ہے کہ پائن کے درخت اس آگ کی لپیٹ میں ہیں۔ حکام کو شبہ ہے کہ شاید ان دو میں سے ایک آگ دانستہ طور پر لگائی گئی۔

جنوبی فرانس میں دو مقامات پر لگی یہ آگ حالیہ دنوں میں نو ہزار چھ سو پچاس ہیکٹر علاقے کو خاکستر کر چکی ہے۔ بلند درجہ حرارت اور تیز ہواؤں کی وجہ سے آگ کو قابو میں کرنے کی سرگرمیاں مشکلات کا شکار ہیں۔ اسی تناظر میں چودہ ہزار افراد کو ان کے گھروں سے محفوظ مقامات پر متنقل کیا گیا ہے۔

بحرالکاہل کی جانب واقع فرانسیسی ساحلوں پر جنگلاتی آگ کا دھواں دکھائی دے رہا ہے۔ یہ آگ ایک ایسے موقع پر لگی ہے، جب فرانس میں گرمیوں کی چھٹیوں پر بہت سے افراد ساحلوں کی جانب رخ کر رہے ہیں۔

فرانس کے ہمسایہ ملک اسپین میں مسلح افواج کے ایمرجنسی بریگیڈ کے ہمراہ فائرفائٹرز تیس سے زائد مقامات پر لگی جنگلاتی آگ پر قابو پانے کی کوشش میں ہیں۔ کچھ مقامات ناہموار اور پتھریلے پہاڑی علاقے اس آگ سے متاثر ہیں، جہاں فائرفائٹرز کا زمینی راستوں سے پہنچنا مشکل ہے۔ اسپین میں ان دنوں غیرمعمولی طور پر 45.7 درجے سینٹی گریڈ تک درجہ حرارت نوٹ کیا گیا ہے۔

اسپین کے جنوبی اندلس کے علاقے میں لگی آگ پر قابو پانے کے لیے ہیلی کاپٹروں کی مدد بھی لی جا رہی ہے۔ مالاگا کے علاقے کے قریبی دیہات سے اب تک تین ہزار افراد کو نکالا جا چکا ہے۔ دریں اثناء مغربی اسپین کی جنگلاتی آگ سے مونفراگ نیشنل پارک خطرے میں ہے۔

اسپین کے وسطی کاسٹائل خطے کے علاوہ شمالی علاقے گالیسیا میں بھی تین ہزار پانچ سو ہیکٹر علاقے آگ سے تباہ ہو چکا ہے۔

پرتگال میں لگی جنگلاتی آگ پر قابو پانے کے لیے فائرفائٹرز کے ہم راہ عام شہری بھی مصروف عمل ہیں تاکہ اپنے گھروں کو اس آگ سے بچایا جا سکے۔ جمعرات کو پرتگال میں درجہ حرارت 47 درجہ سینٹی گریڈ ریکارڈ کیا گیا۔ بلند درجہ حرارت اس آگ کو مزید بڑھاوا دے رہا ہے۔

شمال مشرقی پرتگال میں فائرفائٹنگ میں مصروف ایک جہاز کو پیش آنے والے حادثے میں ایک پائلٹ ہلاک ہو گیا۔ یہاں آگ اب تک پندہ ہزار ہیکٹر کا علاقہ نگل چکی ہے۔

یورپ کے متعدد دیگر ممالک بہ شمول کروشیا، ہنگری اور یونان بھی مختلف مقامات پر جنگاتی آگ سے لڑائی میں مصروف ہیں۔ کروشیا کے ساحلی علاقے میں لگی آگ کو بجھانے کی کارروائیوں میں مدد کے لیے فوج کی خدمات لی جا چکی ہے۔ اطالوی علاقے وینس میں بھی ایک مقامات پر آتش زدگی کی اطلاعات ہیں۔

یونان میں بحیرہ روم میں واقع جزیرے کریٹ میں لگی آگ بجھانے کے لیے کارروائیاں جاری ہیں۔ حکومت اس سلسلے میں اوبوئیا، کریٹ، کیوس اور ساموس جزائر کے حوالے سے خطرے سے انتباہ کی سطح کو پانچ درجے تک بڑھا چکی ہے۔ رواں ہفتے ساموس میں آگ بجھانے کی کارروائی میں مصروف ایک ہیلی کاپٹر کے حادثے میں دو افراد مارے گئے۔