کیا یوکرینی جنگ بعض ریاستوں کی غیر جانبداری ختم کر دے گی؟
1 مئی 2022![Ukriane-Krieg Kiew | Feuerwehrleute löschen Feuer nach Explosion](https://static.dw.com/image/61633120_800.webp)
نیٹو سیکرٹری جنرل ژینس اسٹولٹن برگ کا کہنا ہے کہ اگر فن لینڈ اورسویڈن نے اس دفاعی اتحاد میں شامل ہونے کی درخواست دی، تو نیٹو انہیں خوش آمدید کہے گا۔ مغربی دفاعی اتحاد کے سربراہ نے یہ بات جمعرات اٹھائیس اپریل کو کہی۔
یہ دونوں ممالک برسوں سے خود کو غیر جانبدار قرار دیتے ہیں لیکن یوکرین پر روسی فوجی حملے کے بعد سے ان کی سوچ میں تبدیلی محسوس کی جا رہی ہے اور یہ مغربی دفاعی اتحاد کی صفوں میں شمولیت کا ارادہ بنا رہی ہیں۔
ان ریاستوں کی ممکنہ رکنیت کے حوالے سے بنیادی سوالات کی ضرورت نہیں ہو گی کیونکہ روس کے یوکرین پر حملے کے بعد خطرے کی کیفیت تو موجود ہے۔
ایران کے خلاف پابندیاں، کارروائی: پاکستان غیرجانبدار رہے گا؟
سوئٹزرلینڈ، پابندیوں کا حصہ بنتے ہوئے
سوئٹزرلینڈ کو غیرجانبداری کی علامت قرار دیا جاتا ہے۔ سن 1815 میں سوئس حکومتی نمائندوں نے فیصلہ کیا تھا کہ وہ تنازعات سے دور رہیں گے اور کسی ملک کو پیشہ ور فوجی فراہم نہیں کریں گے۔
یورپی طاقتیں بھی یقین دہانی کرا چکی ہیں کہ اس ملک کو تنازعات سے دور ہی رکھا جائے گا۔ ہلڈس ہائم یونیورسٹی کے پروفیسر مشیل گیہلر کا کہنا ہے کہ یہ ایک بین الاقوامی ضمانت ہے اور یہ ملک مضبوط غیرجانبداری کی علامت ہے۔ یوکرین پر روسی حملے کے بعد بھی سوئٹزرلینڈ کے موقف میں لچک نہیں دیکھی گئی۔ اس نے ہتھیار اور جرمن ٹینکوں کے لیے بارود فراہم نہیں کیا۔
پروفیسر مشیل گیہلر کا کہنا ہے اب صورت حال تبدیل ہو گئی ہے اور روسی فیڈریشن پر عائد پابندیوں کا حصہ بنتے ہوئے اس ملک نے بھی صدر پوٹن اور وزیر خارجہ لاوروف پر پابندیاں عائد کر دی ہیں۔ پروفیسر گیہلر کے مطابق پہلے سوئٹزرلینڈ نے ایسا کبھی نہیں کیا تھا۔
آسٹریا، آئرلینڈ اور فن لینڈ
سن 1955 میں آسٹریا نے مستقل غیر جانبداری برقرار رکھنے کا اعلان کیا تھا۔ یہ دوسری عالمی جنگ کے بعد اتحادی افواج کے انخلا کا نتیجہ تھا۔ بعد میں اس فیصلے میں نرمی لاتے ہوئے ویانا حکومت نے نیٹو کے رکن ملکوں کی فوجی مشقوں میں شرکت بھی کی تھی۔ اب یوکرینی جنگ نے آسٹرین غیرجانبداری پر بھی گہرے اثرات مرتب کیے ہیں۔
برطانیہ سے سن 1921 میں آزادی حاصل کرنے کے بعد سے آئرلینڈ غیر جانبدارانہ پوزیشن اختیار کیے ہوئے ہے۔ اس کا اظہار دوسری عالمی جنگ میں بھی دیکھا گیا۔ آئرش آبادی کی اکثریت نیٹو مخالف ہے۔ اس وقت آئرلینڈ میں غیر جانبداری برقرار رکھنے پر سیاسی اور عوامی حلقے بحث جاری رکھے ہوئے ہیں۔ یوکرین کی اخلاقی اور سیاسی حمایت کرتے ہوئے بھی آئرش وزیر اعظم کا کہنا ہے کہ ان کا ملک عسکری اعتبار سے نیوٹرل ہے۔
فن لینڈ کے سابق وزیر اعظم الیکسانڈر اسٹوب نے رواں برس مارچ کے اختتام پر کہا تھا کہ ان کا ملک نیٹو کا رکن نہیں لیکن جلد ہی رکنیت کی درخواست دے سکتا ہے اور اب یہ بات ہفتوں یا مہینوں میں طے پا جائے گی۔ ان کا کہنا ہے کہ فن لینڈ کی نیٹو میں شمولیت کے حوالے سے عوامی حمایت بتدریج بڑھ رہی ہے۔ فن لینڈ کا روس کے ساتھ تیرہ سو کلومیٹر طویل بارڈر ہے۔
وینزویلا کا بحران: جرمنی غیرجانبدار نہیں، جرمن وزیر خارجہ
سویڈن، قبرص اور مالٹا
سویڈن کی غیر جانبدارانہ پوزیشن اس ملک کے دستور میں موجود ہے۔ انیسویں صدی کے بعد سے یہ ملک کسی تنازعے میں شامل نہیں رہا۔ یورپی یونین کا رکن بننے کے بعد بھی سویڈن نے خود کو غیرجانبدار قرار دیے رکھا۔ اب یوکرین کی وجہ سے سویڈش حکومت کا موقف تبدیل ہوا ہے اور اس نے ٹینک شکن میزائل کییف کو فراہم کیے ہیں۔
ابتدا میں قبرص کو روس کے یوکرین پر حملے کی مذمت میں مشکل کا سامنا تھا کیونکہ ہزاروں روسی اس ملک میں آباد ہیں اور ان میں کئی امیر کبیر بھی ہیں۔ ان روسی امراء نے قبرص میں اربوں ڈالر کی سرمایہ کاری کر رکھی ہے۔ اب قبرصی حکومت نے یورپی یونین کی پابندیوں کے تناظر میں سخت موقف اپنایا ہے اور کئی روسی امراء سے خاص رعایتیں واپس لے لی ہیں۔
’شمالی کوریا امریکا پر پہلے حملہ کرے، تو چین غیرجانبدار رہے‘
یوکرینی جنگ کے تناظر میں یورپی یونین کی رکن ریاست مالٹا میں بھی نیوٹرل رہنے کی بحث شدید ہو چکی ہے۔ مالٹا حکومت نے روسی امیر کبیر اشرافیہ کو گولڈن پاسپورٹ دینے کا سلسلہ معطل کر دیا ہے۔
سن 1994 میں سابقہ سوویت یونین سے آزادی حاصل کرنے والے ملک جمہوریہ مالدووا کی دستوری طور پر غیر جانبدار رہنے کے پوزیشن شدید خطرے میں ہے۔ اس ملک میں عوام اور حکومت کو یقین ہے کہ روس ان کے ملک کی جغرافیائی حدود میں داخل نہیں ہو گا۔ اس ملک کا ایک علاقہ ٹرانس نِسٹریا روس نواز علیحدگی پسندوں کے کنٹرول میں ہے۔
روسی اتحادی ملک سربیا بھی شش و پنج میں مبتلا ہو چکا ہے۔ ایک طرف اس نے یورپی یونین میں شمولیت کی درخواست دے رکھی ہے تو دوسری جانب وہ روایتی طور روس کا کھلا حلیف بھی ہے۔ مبصرین کے مطابق مستقبل قریب میں بھی روس کے بارے میں سربیا کا موقف تبدیل ہوتا دکھائی نہیں دیتا۔