بدھ کی شب سِسٹین چیپل کی چمنی سے جیسے ہی سفید رنگ کا دھواں برآمد ہوا تو یہ واضح ہو گیا کہ کیتھولک مسیحیوں کے نئے روحانی پیشوا کو چن لیا گیا ہے۔ برگولیو  266 ویں پوپ منتخب کیے گئے ہیں جبکہ لاطینی امریکی ممالک سے تعلق رکھنے والے وہ پہلے پوپ ہیں۔ یہ امر بھی اہم ہے کہ ایک ہزار برس سے زائد عرصے کے بعد کسی غیر یورپی کارڈنیل کو اس انتہائی اہم عہدے کے لیے چنا گیا ہے۔

ویٹی کن نے بتایا ہے کہ برگولیو انیس مارچ کو سابق پوپ بینیڈکٹ شانز دہم کی جگہ باقاعدہ طور پر اپنی ذمہ داریاں سنبھال لیں گے۔ اپنے انتخاب کے بعد جب برگولیو پہلی مرتبہ پوپ کا مخصوص لباس زیب تن کیے ہوئے سینٹ پیٹرز اسکوائر کی بالکونی میں آئے تو انہوں نے کہا کہ دیندار لوگ ان کے لیے دعا کرتے رہیں۔ اس موقع پر سینٹ پیٹرز اسکوائر پر موجود ہزارہا کیتھولک مسیحی نئے پوپ کا پہلا دیدار کرتے ہی خوشی سے جھوم اٹھے۔ برگولیو کے انتخاب پر ارجنٹائن کے دارالحکومت بیونس آئرس میں بھی خوشی کا سماں برقرار رہا۔

خبر رساں ادارے اے ایف پی نے ویٹی کن کے ذرائع سے بتایا ہے کہ نئے پوپ کا انتخاب رائے شماری کے پانچ ادوار کے بعد ممکن ہوا۔ 115 کارڈنیلز کی اس رائے شماری کے بعد بروز بدھ مقامی وقت کے مطابق شام چھ بجکر آٹھ منٹ پر سِسٹین چیپل کی چمنی سے سفید رنگ کا دھواں برآمد ہوا۔ یہ اس بات کا اعلان تھا کہ نیا پوپ منتخب کر لیا گیا ہے۔

اس عمل کے ایک گھنٹے بعد نئے پوپ کا نام عام کیا گیا۔ اس دوران سینٹ پیٹرز اسکوائر پر موجود لوگوں کی ایک بڑی تعداد بارش اور خراب موسم کے باوجود وہیں موجود رہی تاکہ وہ اپنے نئے روحانی پیشوا کا پہلا دیدار کر سکیں۔

بطور کارڈنیل اپنا تمام تر کیرئر ارجنٹائن میں ہی گزارنے والے برگولیو اپنی سیاسی بصیرت اور عاجزی کی وجہ سے مشہور ہیں۔ لاطینی امریکا میں سب سے زیادہ قدامت پسند سمجھے جانے والے ملک ارجنٹائن میں کلیساء کو ’مارڈنائز‘ بنانے میں ان کا اہم کردار ہے۔ برگولیو اپنی سادہ مزاجی کی وجہ سے بھی انتہائی مقبول ہیں۔ نہ صرف وہ اپنا کھانا خود پکاتے ہیں بلکہ وہ پبلک ٹرانسپورٹ استعمال کرنے میں بھی کوئی عار محسوس نہیں کرتے۔

امریکی صدر باراک اوباما نے نئے پوپ کے لیے اپنے عوام کی طرف سے نیک خواہشات ارسال کی ہیں جبکہ برطانوی وزیر اعظم ڈیوڈ کیمرون نے بھی تہنیتی پیغام بھیجا ہے۔ ادھر اقوام متحدہ کے سیکرٹری جنرل بان کی مون نے اپنے ایک پیغام میں کہا ہے کہ وہ پوپ فرانسس اول کی ’دانشمندانہ قیادت‘ سے تعاون کے متمنی ہیں۔