میڈیا رپورٹوں کے مطابق اس ملاقات میں نوری المالکی نے جان کیری کو بتایا کہ سنی عسکریت پسندوں کی پیش قدمی نہ صرف عراق بلکہ پورے خطے اور دنیا کے لیے خطرہ ہے۔

اس ملاقات کے بعد عراقی وزیر اعظم کے دفتر سے جاری کردہ ایک بیان میں کہا گیا کہ مالکی نے امریکی وزیر خارجہ کو بتایا، ’’یہ بحران عراق ہی نہیں بلکہ علاقائی اور بین الاقوامی امن کے لیے بھی بڑا خطرہ ہے۔‘‘

جان کیری آج پیر کے روز اس مشن کے ساتھ بغداد پہنچے تھے کہ عراق میں قومی اتحاد پر زور دیتے ہوئے داخلی استحکام کے لیے مالکی حکومت پر دباؤ ڈال سکیں۔ یہ سفارتی کوشش اس لیے ناگزیر ہو گئی تھی کہ عراق میں آئی ایس آئی ایل کے سنی عسکریت پسند بڑی کامیابیاں حاصل کرتے ہوئے کئی شہروں پر قبضہ کر چکے ہیں۔ انہوں نے شام اور اردن کے ساتھ تین سرحدی گزرگاہوں پر بھی کنٹرول حاصل کر لیا ہے۔ یہ پیش رفت عراقی ریاست کی تقسیم کے خطرے کی وجہ بن چکی ہے۔

اسلامی ریاست عراق و شام نامی عسکریت پسند تنظیم اور چند دیگر شدت پسند گروپوں کی پیش قدمی کے نتیجے میں بغداد سے شمال اور مغرب کی طرف پانچ عراقی صوبوں کے وسیع تر علاقے عسکریت پسندوں کے کنٹرول میں آ چکے ہیں۔ ان حالات میں عراقی سکیورٹی فورسز کے لیے زمین پر اپنے قدم جمائے رکھنا مشکل ثابت ہو رہا ہے۔ امریکا ان عسکریت پسندوں کی بغاوت پر قابو پانے کے لیے بغداد حکومت کی مدد کی کوشش کر رہا ہے۔

صدر اوباما نے تین سو امریکی فوجی مشیروں کو عراق بھیجنے کی حامی بھری ہے لیکن وہ شدت پسندوں کے خلاف فضائی حملوں پر تیار نہیں اور عراق میں امریکی زمینی دستوں کی دوبارہ تعیناتی کو خارج از امکان قرار دے چکے ہیں۔

واشنگٹن کو تشویش ہے کہ المالکی کی شیعہ قیادت والی حکومت عراق میں مسلح بغاوت کو شدید تر بنانے کی ذمہ دار ہے۔ اس کا سبب اعتدال پسند سُنیوں کو حکومت میں شامل کرنے کی بجائے الگ تھلگ کرنا ہے۔ امریکا کھل کر نہیں کہنا چاہتا کہ المالکی کو اقتدار سے علیحدہ ہو جانا چاہیے۔ لیکن واشنگٹن کا یہ مطالبہ بہت واضح ہے کہ بغداد حکومت میں زیادہ سے زیادہ مذہبی اور نسلی گروپوں کو نمائندگی ملنی چاہیے۔

جان کیری کا دورہ بغداد ان کے موجودہ دورہ مشرق وسطیٰ کے دوران قاہرہ اور عمان کے بعد خطے میں ان کی تیسری منزل ہے۔ اس دوران انہوں نے مصر اور اردن میں بھی اسی بات پر زور دیا تھا کہ عراق میں عسکریت پسندوں کی بڑھتی ہوئی طاقت خطے کے لیے کتنا بڑا خطرہ ہے۔