امریکی ریاست کیلیفورنیا کے شمالی جنگلات میں لگی آگ بے قابو ہونے کے بعد بدھ کے روز 25 ہزار سے زیادہ لوگوں کو نقل مکانی کا حکم دے دیا گیا۔ ریاستی دارالحکومت سیکرامنٹو کے قریب واقع اوروِل کے مضافات میں یہ آگ منگل کو لگی اور اس سے 12سو ہیکٹر (3,000 ایکڑ) رقبے پر پھیلا جنگلاتی علاقہ متاثر ہوا ہے۔

کیلیفورنیا ڈیپارٹمنٹ آف فاریسٹری اینڈ فائر پروٹیکشن کے مطابق اس وقت کم از کم ایک درجن مختلف مقامات پر آگ لگی ہوئی ہے۔

فائر ڈیپارٹمنٹ کے سربراہ گیریٹ یولینڈ نے صحافیوں کو بتایا، ''اگر گزشتہ دو برسوں سے موازنہ کیا جائے تو اس موسم گرما میں ہماری کاؤنٹی کے حالات بہت مختلف ہیں۔‘‘

ان کا مزید کہنا تھا، ''آگ جنگلوں کے گھنے حصوں میں لگی ہے، خشک جھاڑیاں بہت زیادہ ہیں اور تیز ہواؤں کی وجہ سے یہ آگ بہت جلد پھیلنے کا خطرہ ہے۔‘‘

فائر فائٹرز بدھ کی سہ پہر تک اوروِل کے کچھ علاقوں میں آگ پر قابو پانے میں کامیاب رہے لیکن وہ شمال میں جھاڑیاں اور گھاس کاٹتے ہوئے لائنیں بنانے کی کوششیں جاری رکھے ہوئے ہیں تاکہ یہ آگ مزید نہ پھیلے۔

کیلیفورنیا میں گرمی کی 'تاریخی اور طویل‘ لہر

ماحولیاتی سائنس دانوں کا کہنا ہے کہ امریکہ کا مغربی ساحل کئی دہائیوں سے خشکی کی مسلسل لہر سے گزر رہا ہے، جو جزوی طور پر انسانوں کی طرف سے پیدا کردہ ماحولیاتی تبدیلیوں کا نتیجہ ہے۔

کیلیفورنیا گزشتہ 20 برسوں سے خشک سالی کا سامنا کر رہا ہے۔

خشک سالی کے حوالے سے کیلیفورنیا میں گزشتہ دو برس نسبتاً ہلکے تھے لیکن رواں سال یعنی سن 2024 میں موسم زیادہ گرم اور خشک شکل اختیار کر رہا ہے، جس سے جنگلاتی آگ کے لیے مزید ایندھن پیدا ہو رہا ہے کیونکہ پودے سوکھ کر مر جاتے ہیں۔

امریکہ کی قومی موسمیاتی سروس نے سوشل میڈیا پر لکھا ہے، ''ایک غیر معمولی اور خطرناک صورتحال جاری ہے کیونکہ ہم ممکنہ طور پر مہلک، تاریخی اور طویل گرمی کی لہر میں داخل ہو رہے ہیں۔‘‘

اس ادارے نے آئندہ دنوں میں کچھ مقامات پر 46 ڈگری سینٹی گریڈ (115 فارن ہائیٹ) تک درجہ حرارت کی پیش گوئی کی ہے۔

ا ا / م م (اے پی، اے ایف پی)