کیمیاوی ہتھیاروں کے عالمی واچ ڈاگ کے تازہ ترین بیان میں کہا گیا ہے کہ بحران زدہ عرب ریاست شام میں جاری خون ریزی کیمیاوی ہتھیاروں کے خاتمے کے مشن کے لیے مسائل کا باعث بن رہی ہے۔ دی ہیگ میں صحافیوں سے بات چیت کرتے ہوئے ’آرگنائزیشن آف پروہیبیشن آف کیمیکل ویپنز‘ OPCW کے چیف ’احمت اُزومچو‘ نے کہا، ’’میں سمجھتا ہوں کہ اگر شام میں عارضی فائر بندی عمل میں لائی جائے تو وہاں اہداف حاصل کیے جا سکتے ہیں۔‘‘

اس عالمی ادارے کو ذمہ داری سونپی گئی ہے کہ وہ 2014 ء کے وسط تک شام کے تمام کیمیاوی ہتھیاروں اور تنصیبات کو ختم کرے۔ OPCW کو یہ احکامات رواں برس اگست میں شام میں ہونے والے زہریلی گیس سارین کے حملے کے بعد اقوام متحدہ کی سلامتی کونسل کی قرارداد کے ذریعے دیے گئے ہیں۔ ’احمت اُزومچو‘ نے ایک خصوصی بریفنگ کے دوران شام میں کیمیاوی ہتھیاروں کی تلفی کے لیے مختص کردہ وقت کو قلیل قرار دیتے ہوئے کہا کہ آئندہ چند ہفتوں کے اندر شام میں اس حوالے سے 20 مقامات کی چھان بین کی جانا ہے۔ تاہم انہوں نے کیمیاوی ہتھیار سازی کی تمام تنصیبات ختم کرنے کے لیے مختص یکم نومبر کی تاریخ کو غیر حقیقی قرار نہیں دیا۔ اُن کے بقول، ’’تمام عمل کا دار ومدار شام کی زمینی صورتحال پر ہوگا۔ اس لیے ہم نے شام کے بحران میں ملوث تمام فریقوں پر زور دیا ہے کہ وہ ہمارے ساتھ تعاون کا مظاہرہ کریں کیونکہ ہتھیاروں کی تلفی ہر کسی کے حق میں ہے۔‘‘

آرگنائزیشن آف پروہیبیشن آف کیمیکل ویپنز کی طرف سے منگل کو کہا گیا تھا کہ شام میں کیمیاوی ہتھیاروں کی تلفی کی ڈیڈ لائن حاصل کرنے کے لیے ماہرین کی ایک اور ٹیم شام بھیجی جا رہی ہے۔ OPCW کے چیف ’احمت اُزومچو‘ کے مطابق مزید 12 انسپکٹرز دمشق پہنچ چکے ہیں۔

یکم اکتوبر کو شام میں بین الاقوامی معائنہ کاروں کی سرگرمیاں شروع ہونے کے بعد سے دمشق کو بین الاقوامی برادری کی طرف سے غیر معمولی پذیرائی ملی ہے۔ انسپکٹرز شام کے ایک کیمیاوی تنصیب کے علاقے کا دورہ کر چُکے ہیں اور بُدھ کو انہوں نے ایک اور علاقے کا دورہ کیا ہے۔

دریں اثناء OPCW کے نگرانوں کی 30 رکنی ٹیم اور اقوام متحدہ کی لاجسٹکس اور سکیورٹی عملے کے اہلکار شامی سرزمین پر موجود ہیں اور انہوں نے کیمیاوی ہتھیار تباہ کرنے کا کام شروع کر دیا ہے۔ ان کے کاموں کی تفصیلات فوٹیج کی شکل میں شامی سرکاری ٹیلی وژن پر نشر کی جا رہی ہیں۔

دی ہیگ میں جس پریس کانفرنس سے OPCW کے چیف ’احمت اُزومچو‘ نے خطاب کیا اُسی کانفرنس میں موجود اُن کے ایک مشیر مالک الٰہی کا کہنا تھا، ’’اس وقت چند مخصوص مقامات ہیں جو خطرناک علاقوں میں واقع ہیں۔‘‘ مالک الٰہی نے مزید کہا کہ اس مرحلے میں جن مقامات کا معائنہ کیا جانا ہے اُن میں سے زیادہ تر دمشق حکومت کے کنٹرول میں ہیں۔