نین میں، لوگ برف کی چادر پر رہتے ہیں، جو آہستہ آہستہ پتلی ہوتی جا رہی ہے۔ کینیڈا کے شمال مشرقی ساحلی صوبے نیو فاؤنڈ لینڈ اور لیبراڈور میں بسنے والی ایک چھوٹی سی کمیونٹی کی سڑکیں برف کی موٹی تہوں سے ہوتی ہوئیں دور دراز جھونپڑیوں اور شکار کے میدانوں تک جاتی ہیں۔ جیسا کہ مقامی باشندے موسمیاتی تبدیلی کے اثرات سے ہم آہنگ ہونے میں کوشاں ہیں سو ان سڑکوں کی حفاظت ان کے لیے بہت ضروری ہے۔

خطے میں برف کے تہہ اور متعدد آئس ہائی ویز کی نگرانی کے لیے ریکس ہالویل نے پروگرام ”سمارٹ آئس“ کا استعمال کیا ہے۔ نئی ٹیکنالوجی کے ساتھ، اس کا مقصد نین میں زندگی کو محفوظ بنانا ہے۔ اگست میں شائع ہونے والے ایک تجزیے سے پتہ چلتا ہے کہ آرکٹِک خطہ 1979 اور 2021 کے درمیان عالمی اوسط کے مقابلے میں تقریباً چار گنا تیزی سے گرم ہوا ہے جو کہ ماہرین کے اندازوں سے کئی درجہ زیادہ تیز رو تبدیلی ہے۔

نین کے لوگ موسمیاتی تبدیلی کے اثرات اپنی آنکھوں سے دیکھ سکتے ہیں۔ ماضی میں جہاں برف کی تہہ دو میٹر تک ہوا کرتی تھی، آج، وہ صرف نوے سینٹی میٹر سے ایک سو بیس سینٹی تک پہنچ پاتی ہے۔ برف کی تہہ  پتلی اور کمزور  ہوتی جا رہی ہے، بہار کے مہینے گرم ہو رہے ہیں اور برف پر زندگی زیادہ خطرناک ہوتی جا رہی ہے۔ انویئٹ کے پاس اس کے سوا کوئی چارہ نہیں ہے کہ وہ نئے حالات کے مطابق اپنی زندگیاں ڈھال لیں۔

 کمزور برف کی تہہ اس سال خطے میں کم از کم پانچ خطرناک حادثات کا سبب بن چکی ہے۔ ہالویل بستی کے دوسرے لوگوں کو ٹیکنالوجی استعمال کرنے کی تعلیم دے رہا ہے۔ تیس سے زائد انیوئٹ برادریاں اب تک یہ نیا پروگرام استعمال کر رہی ہیں۔ ہالویل نے خبر رساں ادارے روئٹرز کو بتایا، ”ہمیں خود کو موسمیاتی تبدیلی کے مطابق ڈھالنا ہوگا۔ اور اس کے لیے ہمیں سمارٹ آئس جیسے مزید پروگراموں کی ضرورت ہوگی۔“

جدید سنو موبائلز نے طویل عرصے سے کتوں سے بندھی روایتی سلیج کی جگہ لے لی ہے۔ انویئٹ کمیونٹی کے لوگ عمومی طور پر اپنے طرز زندگی میں ہونے والی موسمیاتی تبدیلیوں کے حوالے سے ایک عملی نقطہ نظر رکھتے ہیں، لیکن بہت سے لوگ اب بھی پرانی روایات کو زندہ رکھنے پر مصر ہیں۔

نین کے زیادہ تر بچوں کی طرح، تیرہ سالہ ڈارسک نوح برف کے نیچے مچھلی پکڑنا سیکھ رہا ہے۔ بہت سے خاندان چاہتے ہیں کہ ان کے بچے برف پر زندگی گزارنے کے قابل ہوں، لیکن موسمیاتی تبدیلی رکنے کا نام نہیں لے رہی۔ ہولویل کا ماننا ہے، ”اس سے ثقافت کا نقصان ہو گا۔ بچوں کی شناخت تو انویئٹ کے طور پر جاری رہے گی، مگر ان کاتجربہ  اپنے والدین جیسا نہیں ہوگا۔‘‘

زندہ رہنے کے لیے زیادہ تر انویئٹ لوگوں کا انحصار ماہی گیری اور شکار پر ہوتا ہے۔ ایسا کرنے سے کینیڈا کے شمال مشرق میں واقع ان علاقوں میں زندگی گزارنے کی لاگت کم رہتی ہے۔ کیٹی ونٹرز ایک مقامی انویئٹ اپنی رسوئی میں خطے کی مخصوص خشک مچھلی“پسٹک“ بناتے ہوئے کہتی ہیں، ”میں چاہتی ہوں کہ سب کچھ پہلے کی طرح واپس آجائے لیکن مجھے نہیں لگتا کہ ہم  دوبارہ کبھی ویسا دیکھ پائیں گے۔‘‘

برلن کے اس چڑیا گھر میں اس تازہ ترین اضافے کو پہلی بار ہفتہ سولہ مارچ کو وہاں جانے والے شائقین کو دکھایا گیا۔ اس ’بے بی پولر بیئر‘ کا ابھی کوئی نام نہیں رکھا گیا۔ اس کی ماں کا نام ٹونیا ہے، جس کی عمر نو سال ہے۔ بچے نے جب پہلی بار اپنے ارد گرد کی دنیا کو دیکھا، تو اس کی ماں اس ’مقابلتاﹰ نومولود‘ کی حفاظت کے لیے مسلسل اس پر نگاہ رکھے ہوئے تھی۔

اس بچے نے اپنی زندگی کے ابتدائی چند ماہ صرف اپنی ماں کے ساتھ تاریکی میں گزارے۔ اس لیے کہ کسی بھی قطبی ریچھ کے نومولود بچے اپنی پیدائش کے وقت بہرے اور نابینا ہوتے ہیں اور ان کی سننے اور دیکھنے کی صلاحیتیں وقت کے ساتھ ساتھ نمو پاتی ہیں۔ اسی لیے شروع کے چند ماہ کے دوران انہیں ماں کی مسلسل قربت اور انتہائی حد تک نگہداشت کی ضرورت ہوتی ہے۔ اس ’بے بی بیئر‘ کا نام آئندہ چند دنوں میں رکھ دیا جائے گا۔

یہ بچہ ایک مادہ ریچھ ہے۔ برلن کے ٹیئرپارک نامی چڑیا گھر میں قطبی ریچھوں کی دیکھ بھال کرنے والے کارکن فلوریان زِکس کے مطابق ماں اور بچے کا رشتہ بڑا گہرا ہے۔ اس لیے بھی کہ ٹونیا ایک بہت اچھی ماں ہے اور اب اپنے ارد گرد کی دنیا سے مانوس ہوتی جا رہی اس کی بیٹی بھی خود کو اپنی ماں کی قربت میں بڑا محفوظ محسوس کرتی ہے۔ فلوریان زِکس نے کہا، ’’ہم اس بچی اور اس کی ماں دونوں کی وجہ سے بہت خوش ہیں۔‘‘

ٹونیا کی بیٹی کو جب پہلی بار چڑیا گھر کے سیربینوں کے سامنے لایا گیا، تو سینکڑوں کی تعداد میں بچے، بوڑھے اور جوان دیکھتے ہی دیکھتے اس کے مداح بن گئے۔ اس ’بے بی بیئر‘ کے اس کے ارد گرد کی دنیا کے ساتھ اولین تعارف کو کیمرے کی آنکھ سے ریکارڈ کرنے کے لیے بہت سے فوٹوگرافر بھی وہاں موجود تھے، جن میں سے ہر کوئی خوش تھا۔ اس ’ننھی سی برفانی لڑکی‘ نے فوٹوگرافروں کو بہت اچھی تصاویر بنانے کے کئی موقع فراہم کیے۔

برفانی ریچھ کی اس چھوٹی سے بچی نے شاید محسوس کر لیا تھا کہ سارے کیمرے اور فوٹوگرافر تو اسی کے لیے وہاں موجود تھے۔ اس نے زمین پر قلابازیاں بھی لگائیں، خود کو اپنے نئے ماحول سے تھوڑا سا مانوس کیا اور پھر فوراﹰ ہی ٹھنڈے پانی میں اتر کر اپنے تیراکی کے فن کا مظاہرہ بھی کیا۔

ٹونیا کے گزشتہ دو برسوں میں پیدا ہونے والے تین بچے مر گئے تھے۔ قطبی ریچھوں کے بچوں میں زندگی کے شروع کے مہینوں میں شرح اموات بہت اونچی ہوتی ہے۔ قطبی ریچھوں کے خاندان میں باپ نومولود بچوں کی زندگی میں زیادہ اہم کردار ادا نہیں کرتا۔ اس بچی کا ’پاپا بیئر‘ وولودیا ہالینڈ کے ایک چڑیا گھر میں رہتا ہے۔ لیکن ٹونیا اپنی بیٹی کے ساتھ کھیلتے ہوئے بہت خوش تھی، جیسے بیٹی ماں سے کہہ رہی ہو، ’’آئی لو یو، ممی!‘‘