کراچی ایکسپو سینٹر میں ہونے والی اس سالانہ نمائش میں رواں برس 20 ممالک شریک ہیں۔ ملکی اور غیر ملکی مندوبین کی جانب سے 400 سے زائد اسٹالز لگائے گئے ہیں۔

خدمات کے موضوع پر انتہائی اہم کانفرنس بھی اس نمائش کا حصہ رہی جس میں سندھ کے صوبائی وزیر سیاحت سید سردار علی شاہ کے علاوہ آواری، سرینا اور ہاشو گروپس کے سربراہان بطور پینلسٹ نے اس انڈسٹری کے حوالے سے اپنے خیالات کا اظہار کیا۔

نمائش میں معتدد غیر ملکی ائیرلائنز بھی اپنے نمائندگان کے ساتھ شریک ہیں۔ کئی غیر ملکی ائیر لائنز نے پاکستان سے دیگر ممالک کے لیے نئی پروازوں کا اعلان بھی کیا۔

اس برس ملائشیا کی جانب سے بھر پور شرکت کی جا رہی ہے۔ اس ملک سے ٹریول ایجنٹس، سیاحت کی خدمات فراہم کرنے والے اداروں سمیت ہوٹلز اور سیاحت کے شعبہ میں خدمات فراہم کرنے والے 23 ادارے شرکت کر رہے ہیں۔

دو سے چار ستمبر تک جاری رہنے والی ٹریول مارٹ 2018ء میں ملک کے تمام صوبوں کی نمائندگی کی گئی ہے اور مختلف ثقافتی رنگوں کو بھی اجاگر کیا جا رہا ہے۔

مشکلات کا شکار پاکستان کی قومی فضائی کمپنی پی آئی اے بھی ٹریول مارٹ 2018ء میں اپنی پروازوں اور خدمات کے حوالے سے نئی حکمت عملی کے ساتھ سیاحوں کے لیے پُر کشش پیکجز کے ساتھ پُر عزم نظر آئی۔

کراچی کے ایکسپو سنٹر میں سیاحت کے فروغ کے لیے منعقد ہونے والی اس نمائش میں شریک عوام کی بڑی تعداد نہ صرف ملکی بلکہ بیرون ممالک سیاحت سے متعلق بھی معلومات حاصل کرنے میں دلچسپی کا مظاہرہ کرتی نظر آئی۔

پاکستان کے سیاحتی مقامات کی جانب توجہ مبذول کروانے کے لیے سیاحت کے صوبائی محکموں کی جانب سے نہ صرف سیاحتی اسٹالز لگائے گئے ہیں بلکہ نمائش میں صوبائی سیاحت پر بنائی گئی خصوصی ڈاکومنٹریز بھی دکھائی جا رہی ہیں۔

ٹریول مارٹ 2018 میں چین، سعودی عرب، تھائی لینڈ، ملیشیا، سری لنکا، ترکی، آذربائیجان، متحدہ عرب امارات، بنگلادیش، ویتنام، ایران، کویت، قطر اور بحرین سمیت کئی دیگر ممالک کے سفارت کار اپنے ٹورازم بورڈز اور ٹورازم کمپنیوں کے ساتھ شریک ہیں۔

ملک میں سیاحت کو فروغ دینے کے لیے پاکستان ٹریول مارٹ نامی بین الاقوامی نمائش کا آغاز گزشتہ برس کیا گیا تھا۔ اس سلسلے کی اولین نمائش یعنی ٹریول مارٹ 2017 میں دس ممالک سے تعلق رکھنے والی 145 کمپنیاں شریک ہوئی تھیں۔ جبکہ اس سال 20 ممالک کی 200 سے زائد کمپنیاں اس مارٹ میں شریک ہیں۔

ٹریول مارٹ 2018ء کے دوران مختلف صوبائی اور علاقائی رقص بھی پیش کیے گئے۔ اس تصویر میں شیدی افراد اپنا روایتی رقص پیش کر رہے ہیں۔ کہا جاتا ہے شیدی قبائل افریقہ سے تعلق رکھتے ہیں۔

گلگت شہر میں میں انتخابات کے موقع پر سکیورٹی کے انتہائی سخت انتظامات کیے گئے تھے۔ فوج، رینجرز اور پولیس کے علاوہ گلگت بلتستان کے ایک ہزار اہلکاروں نے الیکشن کے دوران سکیورٹی کی ڈیوٹی سنبھالے رکھی۔

چیف الیکشن کمشنر گلگت بلتستان کی درخواست پر انتخابات کے پرامن انعقاد کے لیے گلگت بلتستان کے ساتوں اضلاع میں فوج تعینات کی گئی تھی۔ انتخابات کے لیے کل 1,143 پولنگ اسٹیشن قائم کیے گئے تھے۔ ان میں سے 282 کو انتہائی حساس جبکہ 269 پولنگ سٹیشنوں کو حساس قرار دیا گیا تھا۔

پولنگ صبح آٹھ بجے سے شام چار بجے تک بلا تعطل جاری رہی۔ تاہم بعض مقامات پر پولنگ سست روی کا شکار رہی۔ سیاسی جماعتوں کے کارکنوں نے اس کا ذمہ دار الیکشن کمیشن کے مبینہ طور پر غیر تربیت یافتہ عملے کو قرار دیا۔ تاہم الیکشن کمیشن کے حکام کا کہنا ہے کہ ٹرن آؤٹ گزشتہ انتخابات سے زیادہ رہنے کی توقع ہے۔

گلگت بلتستان میں ماضی میں ہونے والے فرقہ وارانہ فسادات اور سیاسی تشدد کو سامنے رکھتے ہوئے فوج کو بلایا گیا تھا۔ اس موقع پر فوجی جوان گلگت بلتستان کے انتظامی ہیڈ کوارٹر گلگت شہر میں گشت کرتے ہوئے بھی دیکھے گئے۔ پولنگ کے دوران بعض مقامات سے لڑائی جھگڑے کی اطلاعات تو موصول ہوئیں لیکن مجموعی طور پر پولنگ کا عمل پر امن رہا۔

گلگت میں کونو داس کے مقام سے فوج کی زیر نگرانی تمام سات اضلاع میں انتخابی مواد کی ترسیل کی گئی اس کے ساتھ ساتھ بعض مقامات پر پولنگ کے عملے کو بھی فوجی سکیورٹی میں ہی پہنچایا گیا۔

ایک پولنگ اسٹیشن پر پولنگ کا عملہ انتخابی کمیشن کی طرف سے ملنے والا سامان پولنگ سے ایک روز قبل لے کر روانہ ہو رہا ہے۔

گلگت بلتستان میں کل رجسٹرڈ ووٹروں کی تعدا چھ لاکھ 18 ہزار ہے۔ جن میں دو لاکھ نواسی ہزارمرد جبکہ دو لاکھ انتیس ہزار خواتین ووٹرز شامل ہیں۔ پیر کو پولنگ کے موقع پر ضلع نگر کے ایک پولنگ سٹیشن کے باہر ووٹرز قطار بنائے کھڑے ہیں۔

ضلع ہنزہ کے ایک پولنگ اسٹیشن کے باہر خواتین ووٹرز سخت دھوپ کے باوجود حق رائے دہی کے لیے قطار میں کھڑی ہیں۔ بعض بزرگ ووٹرز طویل قطار کی وجہ سے ووٹ ڈالنے کے انتظار میں زمین پر بیٹھ گئیں لیکن انہوں نے اپنے ووٹ کا حق استعمال کیا۔

ہنزہ کی ایک بزرگ خاتون اپنے روایتی لباس میں حق رائے دہی کے استعمال کے لیے قومی شناختی کارڈ کے ہمراہ پولنگ اسٹیشن کے باہر موجود ہیں۔

بعض مقامات پر خواتین کے پولنگ اسٹیشنوں پر پولیس کے ہمراہ رینجرز کے اہلکاروں نے بھی سکیورٹی کے فرائض انجام دیے۔

گلگت بلتستان میں ابتدائی انتخابی نتائج کے مطابق وفاق میں حکمران مسلم لیگ نوں کے امیدوارں کو برتری حاصل ہے۔ پاکستان کے زیر انتظام کشمیر کی طرح گلگت بلتستان میں بھی انتخِابات میں عام طور پر وہی جماعت حکومت بناتی ہے جس کی حکومت اسلام آباد میں ہو۔