لیونڈ سیمونووچ بنیاد پرستوں کی ’یونین آف آرتھوڈوکس فلیگ کیریئرز‘ کے سربراہ ہیں اور ان کا مطالبہ ہے کہ روسی مملکت کی سربراہی کسی زار کے ہاتھوں میں ہونا چاہیے۔ یہ گروہ اپنے اجتماعات اور مظاہروں کے ذریعے اپنی سوچ دوسروں تک پہنچاتا ہے۔

لیونڈ سیمونووچ کہتے ہیں، ’’ہم بالکل ویسی ہی ایک مستحکم سلطنت کے قیام کی کوششیں کر رہے ہیں، جیسی روسی زاروں کے دور میں تھی۔‘‘ ان کے بقول ایسا کرنا صرف کلیسا کی مدد سے ہی ممکن ہے، ’’لادینیت اس کے لیے موزوں نہیں کیونکہ اس سے آمریت جنم لیتی ہے۔‘‘

سترہ جولائی 1918ء کو زار نکولائی دوئم اور ان کے اہل خانہ کو قتل کر دیا گیا تھا۔ کہتے ہیں کہ انقلابی رہنما لینن کے کہنے پر انہیں یہ سزا دی گئی تھی۔ اس طرح روس میں تین سو سال پرانی رامانوف بادشاہت کا خاتمہ بھی ہو گیا تھا۔ زار خاندان کے قتل کے ایک سو سال پورے ہونے پر ’یونین آف آرتھوڈوکس فلیگ کیریئرز‘ نے ماسکو کے معروف اشپاسو اندرونیکوف راہب خانے کی طرف مارچ بھی کیا تھا۔

’یونین آف آرتھوڈوکس فلیگ کیریئرز‘ صرف مطلق العنان حکومت کی بحالی کا مطالبہ ہی نہیں کرتی بلکہ وہ روسی قوم پرستی کو دوبارہ زندہ کرنے کی بات بھی کرتی ہے۔ اس تنظیم کے ارکان سیاہ لباس اور سیاہ رنگ کے جوتے پہنتے ہیں۔ انہیں دیکھ کر روک موسیقی کے کسی کلب کا تصور ذہن میں آتا ہے۔ ان افراد کے پاس صلیب جیسی مسیحی مذہبی علامات بھی ہوتی ہیں۔

اس گروپ کے زیادہ تر لوگ آرائش کے لیے پرانی اور یادگار تصاویر دیواروں پر لگاتے ہیں۔ پال اس گروپ کے رکن ہیں اور ان کے کمرے کی دیواروں پر اُن تمام آرتھوڈوکس مسیحی خانقاہوں اور راہب خانوں کی تصاویر آویزاں ہیں، جن کے وہ دورے کر چکے ہیں۔ اس گروپ کے کچھ ارکان کی رائے میں معاشرتی تبدیلی کے لیے طاقت کے بل پر ایک انقلاب کی ضرورت ہے جبکہ دیگر ارکان زاروں کے شاہی دور کی واپسی کی کوششوں میں ہیں۔

سن 2000ء میں روسی آرتھوڈوکس کلیسا نے قتل کر دیے جانے والے زار روس نکولائی دوئم اور ان کے اہل خانہ کو سینٹ کا درجہ دے دیا تھا۔ تاہم آرتھوڈوکس کلیسا کے پیروکاروں کی ایک مختصر تعداد نے ہی زار خاندان کے ارکان کے لیے مذہبی تقدیس کے اعلان کے بعد منعقد کردہ کلیسائی تقریب کے سلسلے میں خوشیاں منائی تھیں۔

روسی شہریوں کی ایک بہت بڑی اکثریت مسیحیت کے آرتھوڈوکس عقیدے کی پیروکار ہے۔ اس کے باوجود ’یونین آف آرتھوڈوکس فلیگ کیریئرز‘ اس لیے اس عقیدے کے پرچار کی کوشش کرتی ہے کہ اس کے نزدیک اس مسیحی فرقے کو م‍زید پھیلنا چاہیے۔

رومیانسیوو: یہ زیر زمین میٹرو اسٹیشن ماسکو میں نئے تعمیر ہونے والے اسٹیشنز میں سے ایک ہے، اس کا ڈیزائن ولندیزی مصور پیٹ مونڈریاں کے فن سے ماخوذ ہے، جسے نیو پلاسٹسزم کا خالق کہا جاتا ہے۔ اس ڈیزائن میں مونڈریاں کے افقی اور عمودی خطوط کو چمکتے ہوئے فولاد اور پالش کیے گئے پتھروں سے ہم آہنگ کیا گیا ہے۔ یہ اسٹیشن ماسکو کے مرکز سے کچھ دور مضافاتی علاقے میں واقع ہے۔

2014ء میں بننے والے اس اسٹیشن کا نام ہے، ٹروپارئیووو، جس کا جدید ترین ڈیزائن آنکھوں کو خیرہ کر دیتا ہے۔ کسی درخت سے مشابہ قدر آور انسٹالیشنز کرومیم چڑھی دھات سے بنائی گئی ہیں اور فوٹوگرافر شوق سے یہاں تصویریں بنانے کے لیے آتے ہیں۔

جس وقت سوویت یونین ٹوٹ رہا تھا اور سیاسی منظر نامہ ابتری کا شکار تھا، اُس دور میں بھی نئے اسٹیشنز کی تعمیر کا کام جاری رہا۔ یہ اور بات ہے کہ اِس دور میں خوبصورتی اور آرائش سے زیادہ مقصدیت کو پیشِ نظر رکھا گیا۔ ستّر کے عشرے میں سادہ فن تعمیر کو جدید خیال کیا جاتا تھا۔ یہ تصویر کزنیٹسکی موست نامی اسٹیشن کی ہے، جس کا افتتاح 1975ء میں ہوا تھا۔

ماسکو میٹرو کے شاندار اسٹیشن سٹالن کے دور میں تعمیر ہوئے۔ تب ڈیزائن میں آرائش و زیبائش اور مصورانہ شاہکاروں کو بنیادی اہمیت دی گئی۔ ایسے موضوعات نمایاں ہیں، جن میں سوشلزم کے نظریے کی وضاحت کی گئی ہے۔ تصاویر میں زیادہ تر فوجی، مزدور اور کسان نظر آتے ہیں۔ یہ تصویر کییف سکایا اسٹیشن کی ہے، جس میں یوکرائن کے دیہات کے روزمرہ معموملات دکھائے گئے ہیں۔

کییف سکایا اسٹیشن کے ایک اور حصے کو روس اور یوکرائن کی دوستی کے نام کیا گیا ہے۔ بڑے بڑے آرائشی فریمز کے اندر ایسے مناظر اور ایسی شخصیات کی تصاویر ہیں، جو دونوں ملکوں کی دوستی میں مرکزی اہمیت رکھتی ہیں۔ اس اسٹیشن کا افتتاح 1950ء کے عشرے کے اوائل میں ہوا تھا۔ تب کوئی سوچ بھی نہیں سکتا تھا کہ کبھی یہی بردار قومیں ایک دوسرے کے خلاف ہتھیار بھی اٹھا لیں گی۔

نووسلوبوڈسکایا ماسکو کے بہت سے شہریوں کا پسندیدہ ترین اسٹیشن ہے۔ اس کا ڈیزائن دوسرے اسٹیشنوں کی طرح بہت شاہانہ بھی نہیں ہے اور یہ اُن سے چھوٹا بھی ہے لیکن اس کی خاص بات اس کی رنگا رنگ شیشوں سے مزین وہ روشن کھڑکیاں ہیں، جو کسی گرجا گھر کی یاد دلاتی ہیں۔ اس اسٹیشن میں روشنی اور رنگ دیکھ کر ایسے لگتا ہے، جیسے اوپر نیچے ہر طرف پانی ہی پانی ہو۔

ماسکو میٹرو کے سارے ہی اسٹیشن زیر زمین نہیں ہیں۔ زمین کی سطح پر بنے کئی اسٹیشن بھی بہت خوبصورت ہیں، جیسے کہ 1950ء سے چلا آ رہا ’پارک کلٹوری‘ اسٹیشن۔ اس طرح کے گنبدوں والے اسٹیشن زیادہ تر ماسکو کے مرکزی حصے میں ہیں۔ اس اسٹیشن پر عموماً بہت رَش ہوتا ہے اور یہاں سے لوگ دوسری سمتوں کو جانے کے لیے اپنی ٹرینیں بدلتے ہیں۔

ماسکو کی میٹرو لوگوں کو جلد از جلد ایک سے دوسرے مقام تک ہی نہیں پہنچاتی بلکہ یہاں لوگوں کو ایک دوسرے سے میل ملاقات کے مواقع بھی میسر آتے ہیں۔ اکثر یہاں جوڑے، پرانے دوست یا کاروباری پارٹنر اردگرد سے بے نیاز اپنی گفتگو میں گم نظر آتے ہیں۔ 1938ء میں تعمیر ہونے والے مایا کووسکایا نامی اس قدیم اسٹیشن کو عالمی جنگ کے دوران فضائی حملوں سے بچاؤ کے لیے تہ خانے کے طور پر استعمال کیا جاتا رہا۔

پلوش چاڈ ریوولیوسٹسی: یہ اسٹیشن بھی 1938ء میں تعمیر ہوا تھا۔ یہاں کانسی کے بڑے بڑے مجسمے ہیں، جن میں سوشلسٹ ہیرو بھی ہیں لیکن اُن کے ساتھ ساتھ کسی مرغ یا کتے کے بھی مجسمے ہیں۔ پاس سے گزرنے والے مرغی کی کلغی کو یا پھر کتے کے منہ کو ہاتھوں سے چھُو لیتے ہیں۔ سمجھا یہ جاتا ہے کہ ایسا کرنا خوش قسمتی کا باعث بنتا ہے۔

سرخ رنگ میں چمکنے والا ایم کا یہ نشان ماسکو کی میٹرو کا علامتی نشان ہے اور لوگ اسے شوق سے دیکھتے ہیں۔ ماسکو میں زیر زمین میٹرو کے یہ اسٹیشن کبھی کبھی ایک دوسرے سے کئی کئی کلومیٹر کے فاصلے پر ہوتے ہیں۔ ماسکو کی میٹرو کو ہر روز آٹھ ملین انسان استعمال کرتے ہیں۔ یہ تعداد جرمن شہروں برلن، میونخ، ہیمبرگ اور کولون کی مجموعی آبادی سے بھی زیادہ بنتی ہے۔