سمندری طوفان میتھیو کے نتیجے میں ہونے والی تباہی کے بعد ہیٹی کے شہر جیریمی کا ایک منظر۔ امدادی اداروں کا کہنا ہے کہ اس شہر میں لوگوں کو فوری مدد درکار ہے۔ اس شہر کی تعمیر نو اور بحالی میں ابھی کافی وقت لگے گا۔

میتھیو نامی اس سمندری طوفان نے کیوبا میں بھی کافی تباہی مچائی۔ ایک فوجی ہیلی کاپٹر کیوبا کے شہر بارہ کُوآ میں تباہی کا جائزہ لیتے ہوئے۔

میتھیو کی تباہ کاری کے بعد ہیٹی کے متاثرین نے اپنے تباہ شدہ مکانات کی تعمیر کا کام بھی شروع کر دیا ہے۔ ہیٹی کے جنوب مغربی شہر جیریمی میں بھی اس قدرتی آفت نے سینکڑوں افراد کی جان لے لی۔

اس قدرتی آفت کی لپیٹ میں دیگر ممالک کی طرح کیوبا بھی آیا۔ امدادی اداروں کے مطابق کئی علاقوں میں صورتحال کافی خراب ہے اور وہاں لوگوں کو پانی کی کمی کا بھی سامنا ہے۔

اس طوفان کی وجہ سے ہیٹی میں سب سے زیادہ نقصان ہوا۔ وہاں چار اکتوبر کو آنے والے اس طوفان کی تباہ کاری کی وجہ سے اب تک کم ازکم آٹھ سو ساٹھ سے زائد افراد ہلاک ہو چکے ہیں۔ ہیٹی کے شہر شانتل میں سنون نامی خاتون اپنے تباہ شدہ گھر کے کچن میں کھانا بناتے ہوئے۔

امریکی ریاست فلوریڈا کے سینٹ آگسٹین نامی شہر میں سیلاب کی صورتحال۔ اس شہر میں اس طوفان نے بڑے پیمانے پر مالی نقصان پہنچایا ہے۔

چودہ سالہ کیلی بلیک (دائیں) اور امبر اوسلین فلوریڈا کے کوکوآ بیچ پر تیز ہواؤں اور سمندری لہروں سے بچنے کی کوشش کرتے ہوئے۔ یہ دونوں طوفان کو دیکھنے کی خاطر وہاں پہنچی تھیں کہ اچانک تیز ہواؤں اور سمندری لہروں کی زد میں آ گئیں۔

میامی بیچ پر گیوَن کوہان (دائیں) اور آڈا کوہان اس طوفان کی آمد سے قبل تصاویر بناتے ہوئے۔ اس طوفان کے پیش نظر امریکیوں کو حفاظتی انتظامات اختیار کرنے کی ہدایات جاری کر دی گئی تھیں۔

ریاست فلوریڈا کے کئی شہروں میں لوگوں کو محفوظ مقامات پر منتقل کیا جا چکا ہے۔ ان عارضی شیلٹر ہاؤسز میں ان لوگوں کو تمام امداد فراہم کی جا رہی ہے۔

میتھیو نامی اس طوفان کا درجہ گرا کر اب تین کر دیا گیا ہے، یعنی اب اس کی شدت میں کمی آتی جا رہی ہے۔ تاہم اختتام ہفتہ تک فلوریڈا میں اس طوفان کے ساتھ ایک سو بیس کلو میٹر فی گھنٹہ کی رفتار سے تیز ہوائیں بھی چلتی رہیں۔ ڈیٹونو بیچ میں ایک کار ایک گرتے ہوئے درخت کی زد میں بھی آ گئی۔

امریکی ریاست فلوریڈا کے شہر نیو سمیانا بیچ میں بھی اس طوفان نے تباہی مچائی، جہاں سڑکوں پر پانی کھڑا دیکھا جا سکتا ہے۔ فلوریڈا ریاست میں اس طوفان کی وجہ سے گیارہ افراد کے ہلاک ہونے کی تصدیق کر دی گئی ہے۔

اس طوفان کے ساتھ تیز ہواؤں نے درختوں کو جڑوں سے اکھاڑ پھینکا۔ تباہی کے یہ مناظر امریکی ریاست فلوریڈا کے شہر ڈیٹونو بیچ میں بھی دیکھے جا سکتے ہیں۔

امریکی ریاست فلوریڈا میں بھی سمندری طوفان ’میتھیو‘ نے تباہی مچا دی۔ ڈیٹونو بیچ نامی شہر میں کونر گیلٹ ایک سڑک کو بھاگتے ہوئے عبور کرنے کی کوشش میں پھسل گئے۔ اس قدرتی آفت کی وجہ سے فلوریڈا کے ساحلی علاقوں میں زندگی مفلوج ہو کر رہ گئی۔