نیوز ایجنسی اے ایف پی نے عینی شاہدین کے حوالے سے بتایا ہے کہ جمعے کی دوپہر کے وقت فائرنگ کی آوازیں سنائی دیں جس کے بعد پولیس نے ایمسٹرڈیم کے انتہائی مصروف ریلوے اسٹیشن کو خالی کرا لیا۔ اس وقت وہاں ہزاروں مسافر اور سیاح موجود تھے۔

ڈچ پولیس نے ایک ٹوئٹ میں لکھا، ’’ایمسٹرڈیم مرکزی اسٹیشن پر خنجر سے حملہ کیے جانے کے واقعے کے بعد پولیس نے مشتبہ شخص پر گولی چلائی۔‘‘

اب تک یہ واضح نہیں ہے کہ کیا یہ منظم دہشت گردی کا واقعہ ہے، تاہم مقامی میڈیا نے پولیس ذرائع کے حوالے سے بتایا ہے کہ واقعے کی تفتیش میں تمام پہلوؤں کو پیش نظر رکھا جا رہا ہے۔

پولیس نے اب تک دو افراد کے زخمی ہونے کی تصدیق کی ہے۔ یہ دونوں افراد چاقو لگنے سے زخمی ہوئے ہیں۔ پولیس کے مطابق مشتبہ حملہ آور سمیت تینوں افراد کو ہسپتال منتقل کر دیا گیا ہے۔

یہ امر بھی اہم ہے کہ حالیہ برسوں کے دوران ہالینڈ کے پڑوسی ممالک میں تو دہشت گردی کے کئی واقعات رونما ہوتے رہے ہیں لیکن اس دوران ہالینڈ میں ایسا کوئی بڑا واقعہ پیش نہیں آیا۔

تاہم ایسی رپورٹیں سامنے آنے کے بعد کہ پڑوسی یورپی ممالک میں دہشت گردانہ کارروائیوں میں ملوث افراد ممکنہ طور پر ہالینڈ میں بھی داخل ہوئے تھے، ڈچ سکیورٹی ادارے اس یورپی ملک میں بھی دہشت گردانہ حملوں کے خطرے پر زور دیتے رہے ہیں۔

ش ح / ع ب /  خبر رساں ادارے