برطانیہ سے عوامی جمہوریہ چین کو ہانگ کانگ کی واپسی یکم جولائی سن انیس سو ستانوے کو عمل میں آئی۔ اس کے بعد سے ہانگ کانگ میں’ایک ملک دو نظام‘ رائج ہے۔

ہانگ کانگ کی سرحد پر تقسیم ہو جانے والے خاندانوں کو امید تھی کہ چین حوالگی کے بعد وہ اپنے بچھڑے رشتہ داروں سے مل سکیں گے۔ تاہم اس ضمن میں یومیہ 150 چینیوں کا ہانگ کانگ میں بسنے کا کوٹا مختص کیا گیا اور بہت سے لوگ مایوس رہ گئے۔

رہائش کا یہ مسئلہ سن 2002 میں دوبارہ اُسوقت بڑھا جب ہانگ کانگ نے چار ہزار کے قریب اُن چینیوں کو ڈی پورٹ کرنا شروع کیا جو وہاں رہنے کی قانونی لڑائی ہار گئے تھے۔ تصویر میں نظر آنے والے ان پریشان حال خاندانوں کو اُس پارک سے نکال دیا گیا تھا جہاں وہ احتجاج کر رہے تھے۔

سن دو ہزار تین میں انتہائی متعدی مرض سارس ہانگ کانگ سے پھیلا تھا۔ اس وائرس سے فلو جیسی کیفیت والی بیماری کو عالمی ادارہ صحت نے ’وبا‘ قرار دے دیا تھا۔ ہانگ کانگ میں اس بیماری سے قریب تین سو افراد ہلاک ہوئے تھے۔

چین کی ’ایک ملک دو نظام‘ کی پالیسی سے وہاں صورت حال اکثر کشیدہ رہی ہے۔ ہانگ کانگ کی چین حوالگی کی ساتویں سالگرہ کے موقع پر ہزار ہا افراد نے ہانگ کانگ میں احتجاجی مظاہرہ کیا۔ یہ افراد سیاسی اصلاحات، جمہوریت اور ہانگ کانگ کے آئندہ لیڈر کے چناؤ کے لیے براہ راست انتخابات کا مطالبہ کر رہے تھے۔

ہانگ کانگ میں جائیداد کی بڑھتی ہوئی قیمتوں کے سبب گھروں کے کرائے بھی زیادہ ہو گئے۔ یہی وجہ ہے کہ بیشتر افراد کو نام نہاد’ کیج ہوم یا پنجرہ گھر‘ میں رہنا پڑتا تھا۔ سن دو ہزار آٹھ تک ایسا طرز رہائش ہانگ کانگ میں غیر معمولی بات نہیں تھی۔

تیانامن اسکوائر میں سفاکانہ حکومتی کریک ڈاؤن کی بیسویں سالگرہ کے موقع پر ہانگ کانگ کے وکٹوریہ پارک میں بڑی تعداد میں ہانگ کانگ کے باشندوں نے جمع ہو کر موم بتیاں روشن کیں۔

ستمبر سن دو ہزار چودہ میں مزید خودمختاری کے لیے کیے جانے والےمظاہروں نے دو ماہ تک ہانگ کانگ کو اپنی لپیٹ میں لیے رکھا۔ ان مظاہروں کو ’امبریلا ریوولوشَن‘ کا نام دیا گیا کیونکہ مظاہرین پولیس کی جانب سے مرچ کے اسپرے اور آنسو گیس سے بچنے کے لیے چھتریوں کا استعمال کرتے تھے۔

’امبریلا ریوولوشن‘ کے ایک سال سے بھی کم عرصے میں چینی فٹ بال ٹیم نے 17 نومبر سن دو ہزار پندرہ کو ایک فٹ بال ورلڈ کپ کوالیفائنگ میچ ہانگ کانگ کے خلاف کھیلا۔ تاہم ہانگ کانگ میں ان کا دوستانہ خیر مقدم نہیں کیا گیا۔ جب چین کا قومی ترانا بجایا جا رہا تھا تو تماش بینوں نے ایسے پوسٹر اٹھا رکھے تھے جن پر تحریر تھا،’’ ہانگ کانگ چین نہیں ہے‘‘ یہ میچ صفر، صفر پر ختم ہو گیا۔

سن دو ہزار سولہ میں ہانگ کانگ کی پولیس کی سخت گیر حکمت عملی ایک بار پھر شہ سرخیوں کی زینت بنی۔ ہانگ کانگ حکام نے پڑوسی ملک کے غیر قانونی خوانچہ فروشوں کے خلاف آپریشن شروع کیا۔ انتظامیہ نے مظاہرین سے نمٹنے کے لیے پولیس کو بھیجا جس نے اُن پر ڈنڈوں اور مرچوں والے اسپرے کا استعمال کیا۔ مظاہرین اور پولیس کے درمیان ہونے والا یہ تصادم کم خونریز نہیں تھا۔

برطانوی نوآبادیاتی انتظامیہ نے 1904ء ہی میں ہانگ کانگ کے جزیرے پر اس طرح کی پہلی ٹرام کے لیے پٹری بچھا دی تھی۔ تب سے یہ دو منزلہ ٹرام اس شہر کی پہچان چلی آ رہی ہے۔ لوگ اسے عام طور پر ’ڈِنگ ڈِنگ‘ کہتے ہیں۔ اس کے ذریعے پورے شہر کی سیر سیاحوں کے پروگرام میں ضرور شامل ہوتی ہے۔

ٹریفک کے اژدہام کی وجہ سے ’ڈِنگ ڈِنگ‘ کی اوسط رفتار دَس کلومیٹر فی گھنٹہ تک ہی پہنچ پاتی ہے حالانکہ موزوں حالات میں یہ پچاس کلومیٹر فی گھنٹہ کی رفتار سے بھی سفر کر سکتی ہے۔ اب تک اس میں ایئر کنڈیشننگ کی بھی سہولت نہیں تھی۔ عنقریب ایئر کنڈیشنڈ ٹرام بھی سڑکوں پر آنے والی ہے۔

ایک مشاورتی کمپنی نے ہانگ کانگ کی حکومت کو مشورہ دیا کہ شہر کے مرکزی حصے میں اس ٹرام کے چلنے پر پابندی عائد کر دی جائے کیونکہ اس کے لیے مختص پٹریاں سڑکوں کے رقبے کا تیس فیصد گھیر لیتی ہیں اور یہ کہ لوگ اِس کی بجائے زیر زمین ریلوے کے ذریعے سفر کر سکتے ہیں۔ اس طرح کی تجاویز کو عام شہریوں نے پسند نہیں کیا۔

ڈی ڈبلیو سے باتیں کرتے ہوئے ہانگ کانگ کی سِٹی پلانر سسیلیا لوئیزے چُو نے بتایا کہ شہر کے وسط میں کم سے کم کاروں کو آنے سے روکنے کا یہی طریقہ ہے کہ پبلک ٹرانسپورٹ کی حوصلہ افزائی کی جائے۔ جہاں ایک کار میں زیادہ سے زیادہ سات لوگ بیٹھ سکتے ہیں، وہاں ’ڈِنگ ڈِنگ‘ میں 115 مسافر سفر کر سکتے ہیں۔

ہانگ کانگ کے بہت کم شہری کار خریدنے کے متحمل ہو سکتے ہیں۔ کار پارکنگ کا مسئلہ الگ ہے۔ اس ٹرام کے ساتھ یکطرفہ سفر کے ٹکٹ کی قیمت محض 0.26 یورو کے برابر ہوتی ہے۔ پچھلی طرف سے لوگ اس پر چڑھتے ہیں اور اگلی طرف سے اترتے ہیں۔ ادائیگی اترتے وقت کرنا ہوتی ہے، سکّوں یا پھر چِپ کارڈ کے ذریعے۔ ایک دِن میں ایک لاکھ اَسّی ہزار مسافر ’ڈِنگ ڈِنگ‘ کے ذریعے سفر کرتے ہیں۔

ٹرام دوست حلقوں کا موقف یہ ہے کہ شہر کے مرکزی حصے میں ٹریفک غلط جگہوں پر کاریں پارک کرنے والوں کی وجہ سے بلاک ہوتی ہے۔ وہ کہتے ہیں کہ کاریں ریل کی پٹری پر بھی چلائی جا سکتی ہیں۔ ہانگ کانگ میں اس طرح کی ٹراموں کی تعداد تقریباً ایک سو ہے جبکہ کاروں کی تقریباً چار لاکھ۔

دریں اثناء شہری انتظامیہ نے مشاورتی فرم کی تجویز سے لاتعلقی اختیار کر لی ہے گو ابھی سرکاری طور پر اسے رَد نہیں کیا۔ ٹرام دوست حلقے جانتے ہیں کہ اُنہیں چوکس رہنا ہو گا ورنہ ’ترقی‘ کے نام پر اس طرح کی مقامی روایات کو قربان ہوتے دیر نہیں لگتی۔

ہانگ کانگ میں کئی ایسے اپارٹمنٹس ہیں جہاں کھانا پکانے کے لیے جگہ عین ٹوائلٹ کے ساتھ ہی موجود ہے۔ کئی لوگ اس طرح کے حالات کو غیر انسانی تو سمجھتے ہیں لیکن ان میں رہنے پر مجبور بھی ہیں۔

کینیڈین فوٹوگرافر بینی لام نے ’ٹریپ ‘ یعنیٰ پھنسے ہوئے ‘ کے عنوان سے اپنی تصاویری سیریز کے ذریعے ہانگ کانگ کی پوشیدہ کمیونٹی کی زندگی کے احوال کو عکس بند کیا ہے۔ ان کی یہ سیریز ایک ایسی غیر سرکاری تنظیم کے تعاون سے بنائی گئی ہے جو غربت کے خاتمے اور شہری حقوق کے لیے کام کرتی ہے۔

تقریبا 7.5 ملین آبادی اور ترقیاتی کاموں کے لیے ہانگ کانگ میں زمین کی غیر موجودگی کے باعث اس شہر میں رہائشی اپارٹمنٹس اور گھروں کی قیمتیں آسمان کو چھو رہی ہیں اور اب یہاں رہائش اختیار کرنا دنیا کے کسی بھی ملک میں رہنے سے زیادہ مہنگا ہے۔

سرکاری اعداد وشمار کے مطابق اس شہر میں اسی طرح کے 88 ہزار اپارٹمنٹس میں تقریباﹰ 2 لاکھ سے زائد افراد رہنے پر مجبور ہیں۔ رہائشیوں کو اس محدود جگہ میں اپنے روز مرہ کی ضروری سرگرمیاں انجام دینا پڑتی ہیں۔

سرکاری اعداد وشمار کے مطابق صرف 2007 سے 2008ء کے درمیانی عرصے میں گھروں کی قیمتیں دگنی ہو گئیں۔ ان چھوٹے سے گھروں کے اکثر باسیوں کے لیے گھر لوٹنے کی سوچ ہی انتہائی پریشان کن ہوتی ہے۔ کئی گھروں کے رہائشی تازہ ہوا میں سانس لینے کو بھی ترستے ہیں۔

ان گھروں میں رہنے والوں کا تعلق کم تنخواہ دار طبقے سے ہے جو یہاں رہنے پر مجبور ہیں۔ کئی کمرے تو ایسے ہیں جس میں وہ نہ تو مکمل طور پر سیدھا کھڑے ہو پاتے ہیں اور نہ ہی پاوں پسار سکتے ہیں۔ یہاں لال بیگ (کاکروچ) اور کھٹمل ان کے ساتھی ہیں۔

دو سال تک اپنی تصاویری سیریز پر کام کرنے والے لام نے کوشش کی ہے کہ یہاں غریبی اور امیری کے درمیان گہری ہوتی خلیج کی عکاسی کی جائے۔ ’پنجرہ ‘ یا ’ تابوت‘ کا نام دیے گئے ان گھروں کی تصاویر ان حالات کو نہایت قریب سے دیکھنے کا موقع دیتی ہے۔

اقوام متحدہ کی جانب سے ان حالات کو عزت نفس کی تذلیل قرار دیا جاتا ہے۔ تاہم ان میں کچھ بہتری کی امید کی جا رہی ہے اور اس کے لیے حکومت نے 2027ء تک 280,000 نئے گھروں کی تعمیر کا عندیہ دیا ہے جہاں زندگی کی کوالٹی کو مد نظر رکھا جائے گا۔

دنیا کا نواں مہنگا ترین شہر چینی دارالحکومت بیجنگ ہے، جہاں مکانات کی قیمتیں اور کرائے مسلسل بڑھ رہے ہیں۔ بیجنگ کے انٹرنیشنل اسکول بھی اپنی فیس میں مسلسل اضافے کا سلسلہ جاری رکھے ہوئے ہیں۔ چینی کرنسی یوان کی قدر میں استحکام سے چینی شہروں میں زنگی بسر کرنا مشکل تر ہو گیا ہے۔

چین کی مرکزی سرزمین پر سب سے مہنگا ترین شہر شنگھائی ہے۔ چینی بندرگاہی شہر دنیا کا ساتواں مہنگا ترین شہر ہے۔ شنگھائی میں پچاسی مربع میٹر اپارٹمنٹ کا کرایہ 1800 سو سے 2170 امریکی ڈالر ( 1030 یورو سے 1800 یورو) تک ہے۔ اس شہر میں ہر چیز کی خرید و فروخت کا تعلق کرنسی کے اتار چڑھاؤ سے منسلک ہے اور نئے آباد ہونے والوں کے لیے پریشانی کا باعث ہے۔

جنوبی کوریا کا دارالحکومت سیئول غیر ملکی آبادکاروں کے لیے پانچواں مہنگا ترین شہر ہے۔ غیر ملکیوں کے ساتھ سیئول کے باسی بھی اس پر متفق ہیں کہ ایک کافی کا کپ بھی اس شہر میں بہت مہنگا ہے اور یہ دس امریکی ڈالر ( 8.60 یورو) کا ہے۔ ایک جینز کی پینٹ کی اوسط قیمت ڈیڑھ سو امریکی ڈالر ہے۔ مجموعی طور پر سیئول میں زندگی گزارنا خاصا مشکل کام ہے۔

اس شہری ریاست کو جنوبی ایشیائی مالیاتی مرکز خیال کیا جاتا ہے۔ یہ غیرملکی افراد کے لیے دنیا کا چوتھا مہنگا ترین شہر سمجھا جاتا ہے۔ سنگا پور میں جینز پینٹ کی اوسط قیمت ایک سو امریکی ڈالر سے شروع ہوتی ہے۔ یہ قیمت امریکی شہر نیویارک کے مقابلے میں دوگنا ہے۔ سنگا پور میں گاڑیوں کے لیے پیٹرول بھی بہت مہنگا ہے، اور فی لیٹر قیمت دو امریکی ڈالر سے زائد ہے۔

جاپانی دارالحکومت ٹوکیو کی آبادی نوے لاکھ سے زائد ہے اور یہ اقوام عالم میں دوسرا مہنگا ترین شہر ہے۔ ماہرین کے مطابق جاپانی شہروں میں زندگی بسر کرنے میں قدرے آسانی کی وجہ جاپانی ین کی قدر کا امریکی ڈالر کے مقابلے میں عدم استحکام ہے۔ ٹوکیو میں پچاسی مربع میٹر کے فرنشڈ اپارٹمنٹ کا کرایہ 2700 سے 3500 امریکی ڈالر ( 2300 سے 3000 یورو) تک ہو سکتا ہے۔

سن 2018 میں ہانگ کانگ کو دنیا بھر میں سب سے مہنگے شہر کا درجہ حاصل ہوا ہے۔ اس شہر میں کرائے دنیا میں سب سے زیادہ ہیں اور یہ نئے غیر ملکیوں کے لیے انتہائی پریشانی کا سبب ہے۔ ہانگ کانگ میں کافی کے ایک کپ کی قیمت اور فی لیٹر پٹرول بھی دنیا بھر میں سب سے مہنگا ہے۔ غیر ایشیائی شہروں میں سوئٹزرلینڈ کے بیرن اور زیورچ، چاڈ کا اینجمینا کے علاوہ انگولا کا لوانڈا بھی انتہائی مہنگے شہروں میں شمار کیے جاتے ہے۔