ہرنائی: کوئلے کی کان میں دھماکہ، 12 مزدور ہلاک
20 مارچ 2024
پاکستان کے صوبہ بلوچستان کے شہر ہرنائی میں کوئلے کی ایک کان گیس بھر جانے کے باعث منہدم ہوگئی۔ اس واقعے کے نتیجے میں 12 مزدور ہلاک اور متعدد زخمی ہو گئے۔ پاکستان دنیا بھر میں کان کنی کے حوالے سے غیر محفوظ ترین ممالک میں شمار ہوتا ہے جہاں اس طرح کے کئی واقعات ماضی میں بھی پیش آچکے ہیں۔
مقامی حکام کے مطابق یہ واقع منگل کی شب اس وقت پیش آیا، جب دو درجن سے زائد مزدور اس کان میں کئی میٹر کی گہرائی میں کام کر رہے تھے۔
صوبائی ریسکیو ڈیپارٹمنٹ سے منسلک محمد احمر کے مطابق امدادی کارکنوں نے کئی گھنٹوں کی جدوجہد کے بعد ملبے سے 12 افراد کو زندہ نکال لیا۔
صنعتی مزدوروں کی عالمی تنظیم انڈسٹری آل گلوبل یونین کے ڈیٹا کے مطابق پاکستان میں کوئلے کی کانوں کے اندر گیس کے دھماکے اور حادثات معمول کی بات ہیں۔ اسی لیے ان کانوں کو 'بلیک ڈیتھ ہولز' کے نام سے جانا جاتا ہے۔ ان حادثات میں ہر سال سینکڑوں مزدور اپنی جانیں گنوا دیتے ہیں۔
آل پاکستان مائنز ایسوسی ایشن کے مطابق کوئلے کی کان کنی انتہائی خطرناک حالات میں کسی حفاظتی سامان، مناسب تربیت، لائف انشورنس اور ریسکیو کے بغیر کی جارہی ہے، جو ان حادثات کا سبب بن رہی ہے۔
ر ب/ ش ر (ڈی پی اے)