یہ ہوٹل سویڈن میں ایک متروکہ سلور کی کان میں بنایا گیا ہے، جہاں مہمانوں کو زمین سے ایک سو پچپن میٹر نیچے ٹھہرایا جاتا ہے۔ ہوٹل میں لفٹ کے ذریعے اپنے زیر زمین کمرے تک پہنچنے کے لیے پانچ منٹ لگتے ہیں۔

زمین کے نیچے درجہ حرارت سال بھر محض دو ڈگری سینٹی گریڈ ہوتا ہے۔ اس کے علاوہ تاریکی بھی بے پناہ ہوتی ہے۔ اگرچہ ہوٹل کے کمروں میں روشنی کے لیے لیمپ اور سردی سے بچاؤ کے لیے ہیٹر رکھے جاتے ہیں پھر بھی کمزور دل خواتین و حضرات کے لیے یہاں رکنا مناسب نہیں۔

قدیم اہلِ ٹرائے کو یونانیوں کی جانب سے پیش کیا گیا کاٹھ کا گھوڑا اگرچہ تاریخ کا حصہ ہے تاہم بیلجیم میں بالکل ٹرائے کے گھوڑے کی طرز کا ایک ہوٹل بنایا گیا ہے۔ یہاں آپ ساکن پہیوں والے نقلی ٹروجنی گھوڑے کی شکل کے ہوٹل میں رات گزار سکتے ہیں۔

نقلی ٹروجنی گھوڑے کے پیٹ میں چیزیں ویسی نہیں جیسا یونانی تاریخ بیان کرتی ہے۔ یہاں سپاہیوں کی جگہ پورے ایک خاندان کے لیے کمرہ موجود ہے۔ اس کمرے کے علاوہ نو کمرے اور بھی ہیں جو کسی دیو مالائی داستان کا حصہ لگتے ہیں۔

جنوبی انگلینڈ کے ساحل پر سمندر سے ذرا دور ایک سو چالیس سالہ پرانا سپٹ بنک فورٹ ہے۔ جہاں پہلے اسلحہ بارود اور توپیں رکھی جاتی تھیں، اب وہاں سیاحوں کو خوش آمدید کہا جاتا ہے۔

اس قلعے میں بندرگاہ کی حفاظت کے لیے فوجی تعینات کیے جاتے تھے۔ سن 2009 میں اس قلعے کی مرمت اور بحالی کے بعد بھی اس کی دیواریں قریب بیس میٹر موٹی ہیں۔ اس طرح فورٹ ہوٹل کا شمار دنیا کے محفوظ ترین ہوٹلوں میں ہوتا ہے۔

جرمنی میں بالٹک سمندر کے وارن موینڈے کے ساحلی مقام پر ایک جہاز کے کنٹینرز میں ہوٹل قائم کیا گیا ہے۔ مہمانوں کو بارہ مربع میٹر کے جہازی کنٹینروں میں رہائش کی دعوت دی جاتی ہے۔ اگر کسی کو یہ جگہ کم لگے تو بھی پریشانی کی بات نہیں۔ ہوٹل میں دو کنٹینرز پر بنے سوئٹ روم بھی ہیں۔

یہ ہوٹل رواں برس موسم بہار میں کھولا گیا تھا۔ ہوٹل انتظامیہ کی خصوصی توجہ کا مرکز نوجوان مہم جو افراد ہیں۔ یہاں کئی بستروں والے ایک کمرے میں شب بسری کی قیمت انیس یورو تک ہو سکتی ہے۔

اگر آپ کو بلندی سے خوف آتا ہے تو پھر ایمسٹرڈم میں واقع یہ ہوٹل آپ کے لیے نہیں۔ کرین ہوٹل ’فارالڈا‘ کے تین سوئٹ رومز زمین سے پچاس میٹر کی بلندی پر بنائے گئے ہیں۔

کرین کے اندر مہمانوں کو وہاں ٹھہرایا اور سلایا جاتا ہے جہاں پہلے کرین آپریٹر کام کرتا تھا۔ یہاں زیادہ ایڈونچر خراب موسم میں رکنے میں ہے۔ جب ہوا تیز چلتی ہے تو کرین میں ملنے والے جھولے لوری کا کام دیتے ہیں۔

ہر کمرہ منفرد ہے۔ ایک کمرے میں آپ تابوت میں سو سکتے ہیں تو دوسرے میں فرنیچر چھت سے لٹکا ہوا ہے۔ سب سے خاص کئی کونوں والا وہ کمرہ ہے، جس میں ہر طرف شیشے لگے ہوئے ہیں۔ برلن کا پروپیلر آئی لینڈ نامی یہ ہوٹل ہر حوالے سے آرٹ کا نمونہ ہے، جسے لارس سٹروشن نے ڈیزائن کیا ہے۔ انہوں نے ہر کمرے کے لیے خاص پس منظر موسیقی بھی ترتیب دی ہے۔

برلن سے ساٹھ کلومیٹر دور یُوئٹربوگ میں آپ کئی روز تک ٹرانس سائبیریئن ایکسپریس میں سفر کیے بغیر اس میں سو سکتے ہیں۔ اس ’سلیپنگ کار ہوٹل‘ میں پچیس مہمانوں کے لیے شب بسری کی گنجائش ہے۔ ہر حصے میں ایک ڈبل بیڈ ہے اور ساتھ ہی ایک ڈرائنگ روم، جس کے ساتھ ایک باتھ روم بھی ہے۔

اگر آپ چاہیں تو اسے دنیا کا سب سے چھوٹا ہوٹل بھی کہہ سکتے ہیں۔ اس کا نام کوفٹیل ہے، جو کَیمنِٹس کے قریب لُنسیناؤ میں واقع ہے۔ 2004ء میں قائم کیا گیا یہ ہوٹل ایک سلیپنگ کیبن ہے، جو ایک سوٹ کیس کی شکل کا ہے۔ اس کی چوڑائی ڈیڑھ میٹر، لمبائی تین میٹر اور موٹائی دو میٹر ہے۔ اس سوٹ کیس میں اپنے ذاتی سلیپنگ بیگ میں رات بسر کرنے کی قیمت 15 یورو ہے۔

اگر آپ کسی ’ہَوبِٹ‘ کی سرنگ میں رات گزارنا چاہتے ہیں تو اس کے لیے نہ تو ’مڈل ارتھ‘ تک سفر کی ضرورت ہے اور نہ ہی نیوزی لینڈ میں کسی فلم کے سیٹ پر جانے کی۔ یہ ہوٹل تھیورنگیا کے جنگلات میں ’آؤاَین لینڈ‘ کے تعطیلاتی گاؤں میں واقع ہے۔ اس ہوٹل میں مہمانوں کو ایسے اپارٹمنٹس دستیاب ہیں، جن میں خواب گاہ، نشست گاہ اور غسل خانہ سب شامل ہوتے ہیں۔

شام کا وقت، بھیڑیوں کی آوازیں اور کسی دوسرے انسان کا دور دور تک کوئی پتہ نہیں۔ اتنی مہم جوئی کے ساتھ شب بسری آپ بریمن کے نردیک Tree Inn میں کر سکتے ہیں۔ یہ ’ٹری ہاؤس ہوٹل‘ ایک ایسے علاقے میں ہے، جو ’بھیڑیوں کا مرکز‘ کہلاتا ہے۔ آپ پانچ میٹر کی بلندی سے شیشے کی دیواروں میں سے بھیڑیوں کا بڑا صاف نظارہ کر سکتے ہیں۔

بظاہر یہ پائپ نکاسیٴ آب کے پائپ جیسا ہے لیکن اس میں سے گندا پانی نہیں گزرتا۔ رُوہر کی وادی کے قصبے بوٹروپ کے پارک ہوٹل میں مہمان بڑے بڑے ڈرین پائپوں میں بنے کمروں میں سو سکتے ہیں۔ یہاں شب بسری کی کوئی مقررہ قیمت نہیں، جتنا کرایہ چاہیں، ادا کریں۔ یہ پائپ تین تین میٹر طویل ہیں اور ان میں سے ہر ایک کا وزن ساڑھے گیارہ ٹن اور قطر ڈھائی میٹر ہے۔ ہر پائپ میں ایک ڈبل بیڈ اور ایک چھوٹی میز کی جگہ موجود ہے۔

یہاں مجرم قید کاٹتے تھے۔ اب سلاخوں کے پیچھے باہمت مہمان شب بشری کرتے ہیں۔ جرمن شہر کائزرزلاؤٹرن کی سابقہ جیل میں اب ’الکٹراس ایڈونچر ہو‌ٹل‘ قائم ہے۔ ہوٹل کی بار بھی فولادی سلاخوں کے پیچھے ہے لیکن مہمانوں کو ان کی مرضی کے مطابق گھومنے پھرنے کی اجازت ہوتی ہے۔

اس ہوٹل میں آپ وہاں سو سکتے ہیں، جہاں کبھی وائن تیار کی جاتی تھی۔ دریائے رائن کے کنارے رُیوڈس ہائم کے اپنی وائن کے لیے مشہور شہر میں ’لِنڈن وِرٹ‘ نامی ہوٹل کے صحن میں چھ بڑے وائن بیرل کمروں کا کام دیتے ہیں۔ جن میں فی کس چھ ہزار لٹر وائن تیار ہوتی تھی، ان میں سے ہر ایک بیرل میں دو مہمانوں کے سونے کی گنجائش ہے، اور ساتھ ہی ایک چھوٹا سا ڈرائنگ روم اور باتھ روم بھی۔

جھیل کونسٹانس کے قریب آرٹُس ہوٹل میں قیام دراصل ماضی کا سفر ہوتا ہے۔ وہاں کمرے قرون وسطٰی کی سراؤں کی طرح کے ہیں۔ شہسواروں کے تہہ خانے میں قائم ریستوراں میں کنگ آرتھر کے زمانے کی سی ضیافتوں کا اہتمام کیا جاتا ہے۔ رات کے کھانے کے دوران ایک چوبدار تاریخی انداز میں آپ کی خدمت اور رہنمائی کے لیے موجود رہتا ہے۔

اس اِگلُو لاج کی بار میں مشروبات بھی یخ بستہ ہوتے ہیں۔ اوبرسٹ ڈورف کے نواح میں ’ماؤنٹ نیبل ہارن‘ کی چوٹی پر یہ برفیلا ہوٹل صرف دسمبر سے اپریل کے وسط تک کھلا ہوتا ہے۔ اس ہوٹل کے اِگلُوز یا برفانی گھروں میں سے ہر ایک میں دو یا چار مہمان ٹھہر سکتے ہیں۔ وہاں کُل چالیس مہمانوں کے لیے شب بسری کی گنجائش ہے۔ دو ہزار میٹر کی بلندی پر قائم اس ہوٹل سے ایلپس کے سلسلے کی پہاڑی چوٹیوں کے نظارے کیے جا سکتے ہیں۔