ہزاروں سال پرانے تابوت سے سکندر اعظم نکلا نہ قدیمی ‘بد دعا‘
20 جولائی 2018
مصری بندرگاہی شہر اسکندریہ سے ملنے والے دو ہزار سال پرانے ایک تابوت سے مقامی افراد کو امید تھی کہ غالباﹰ اس میں سکندر اعظم کی باقیات ہوں گی۔ لیکن ماہرین آثار قدیمہ نے اس تابوت میں تین ممیاں دریافت کی ہیں۔
تصویر: Reuters/M. Abd El Ghany
اشتہار
یہ سر بہ مُہر دو ہزار سال پرانا سیاہ سنگ مرمر کا تابوت مقامی مزدوروں کو بُحیرہ روم پر واقع یونان کے تاریخی بندرگاہی شہر اسکندریہ میں رواں ماہ ایک عمارت کی تعمیر کے دوران ملا تھا۔ اسکندریہ میں ملنے والا یہ تیس ٹن وزنی سیاہ تابوت اب تک ایسا سب سے بڑا تابوت ہے۔
اس تابوت کے ملنے کی خبر عام ہونے کے بعد سے مقامی اور عالمی میڈیا میں ایسی قیاس آرائیاں ہونے لگی تھیں کہ اس میں یونان کے فاتح سکندر اعظم کی باقیات ہو سکتی ہیں۔
اسکندریہ شہر کی بنیاد سکندر اعظم یا ’الیگزینڈر دی گریٹ‘ نے 331 قبل از مسیح میں رکھی تھی اور یہ شہر آج تک اسی کے نام پر آباد ہے۔
تاہم مصر کی وزارتِ آثار قدیمہ نے اس تابوت میں سکندر اعظم کی باقیات ہونے کے امکانات کو سختی سے مسترد کر دیا ہے۔
یہ تابوت مقامی مزدوروں کو اسکندریہ میں رواں ماہ ایک عمارت کی تعمیر کے دوران ملا تھاتصویر: Reuters/M. Abd El Ghany
مصر میں آثار قدیمہ کی سپریم کونسل کے سیکریٹری جنرل مصطفی وزیری نے تابوت ملنے کے مقام پر صحافیوں سے بات کرتے ہوئے کہا،’’ ہمیں تابوت میں تین افراد کی باقیات ملی ہیں اور ایسا لگتا ہے کہ اس میں ایک ہی خاندان کو دفن کیا گیا تھا۔ بد قسمتی سے ممیوں کی صرف ہڈیاں ہی باقی بچی ہیں اور جسم کے باقی حصے بہت خراب حالت میں ہیں۔‘‘
وزیری کا کہنا تھا کہ ممیوں کی کچھ باقیات تابوت میں موجود ایک چھوٹے سے سوراخ سے نکاسی کا گندا پانی جانے کے سبب بالکل شکستہ ہو گئی ہیں۔
اس طویل سر بہ مہر تابوت کے کھلنے سے قبل مصرکے میڈیا میں ایسی افواہیں گردش کرنے لگی تھیں کہ تابوت میں سے ہزار سال پرانی ’بد دعا‘ باہر نکل آئے گی۔ اس حوالے سے وزیری نے تبصرہ کرتے ہوئے کہا،’’ ہم نے تابوت کھول لیا ے اور اللہ کا شکر ہے کہ اس سے دنیا میں کوئی قیامت نہیں آ گئی۔‘‘
تصویر: Reuters/M. Abd El Ghany
323 قبل مسیح میں قدیمی شہر بابل میں مرنے والے سکندر اعظم کی قبر یا باقیات کہاں ہیں، یہ آج تک ایک راز ہے۔
ابھی حال ہی میں عجائبات عالم میں شمار ہونے والے اہرام مصر کے قریب سے زمانہ قدیم کے فرعونوں اور امراء کی لاشوں کو حنوط کرنے کی ایک ڈھائی ہزار سال پرانی ورکشاپ بھی دریافت ہوئی تھی۔
ص ح / ع ح / روئٹرز
صحراؤں میں سے راستہ بناتا دریائے نیل
گوئٹے انسٹیٹیوٹ سوڈان کی تیار کردہ ایک نمائش آج کل جرمن شہر ڈاساؤ کے وفاقی دفتر ماحولیات میں دکھائی جا رہی ہے۔ تین ابھرتے ہوئے فوٹوگرافرز نے کیمرے سے اتری ہوئی اپنی ان تصاویر میں نیل کے ساتھ ساتھ آباد بستیاں دکھائی ہیں۔
تصویر: Brook Zerai Mengistu
’رشید‘ نامی شہر میں آباد ایک خاندان
یہ فوٹوگرافرز سیاسی تنازعات کی نہیں بلکہ عام انسانوں کی روزمرہ زندگی کی تصویر کشی کرنا چاہتے تھے۔ محمود یاقوت نے ’رشید‘ میں بسنے والے انسانوں کو موضوع بنایا ہے، جہاں زیادہ تر خاندان زراعت پیشہ ہیں۔ نیل ڈیلٹا کی زرخیز زمینیں ان انسانوں کے لیے بہت بڑی نعمت ہیں۔
تصویر: Mahmoud Yakut
نیل پر مچھلی کے فارم
مصری شہر ’رشید‘ کے پاس دنیا کا یہ طویل ترین دریا بحیرہٴ روم میں جا کر گرتا ہے۔ اس علاقے میں بہت سے انسانوں کا روزگار ماہی گیری سے وابستہ ہے۔ لکڑی سے بنائے گئے فِش فارم پانی پر تیرتے دکھائی دیتے ہیں، جن پر چھوٹی چھوٹی جھگیاں بنی ہوتی ہیں۔ ہر جھگی میں ایک بستر اور ایک چھوٹے سے کچن کی جگہ ہوتی ہے۔ خاندان کا ایک فرد اس متحرک فارم کی نگرانی کرتا ہے۔
تصویر: Mahmoud Yakut
شہر کی زندگی
’رشید‘ میں ماضی اور حال آپس میں ملتے ہیں۔ قرونِ وُسطیٰ سے اس بندرگاہی شہر کو ایک اہم تجارتی مرکز کی حیثیت حاصل رہی ہے۔ یہاں تاریخ اور کاروبار ساتھ ساتھ چلتے ہیں۔ لوگوں کی زندگی بہت سادہ ہے۔ مصری شہر ’رشید‘ اپنے باسیوں کی خوش اخلاقی اور فراخ دلی کے لیے مشہور ہے۔
تصویر: Mahmoud Yakut
خواتین کا کردار
’رشید‘ میں خواتین عام طور پر گھر پر رہتی ہیں، امورِ خانہ داری انجام دیتی ہیں اور بچوں کی دیکھ بھال کرتی ہیں۔ وہ روایتی تندوروں میں روٹی بھی بناتی ہیں۔ یہ خواتین بازار میں سبزیاں اور گھر میں تیار کیا گیا پنیر بھی فروخت کرتی ہیں۔ غربت کے باوجود یہاں کے باسی بہت مہمان نواز ہیں۔ بانٹنا اُن کی زندگی کے فلسفے میں شامل ہے۔
تصویر: Mahmoud Yakut
تخلیق کی لیبارٹری
ان فوٹوگرافرز کو 2013ء کے موسمِ گرما میں ایک ورکشاپ کے لیے گوئٹے انسٹیٹیوٹ آنے کی دعوت دی گئی تھی۔ اب یہ نمائش پہلی مرتبہ جرمن سرزمین پر دکھائی جا رہی ہے۔ سوڈان کے الصادق محمد کو برتن بنانے کے فن سے بہت دلچسپی ہے۔ نیل کے ساتھ ساتھ مٹی سے برتن بنانے کی روایت قدیم زمانے سے چلی آ رہی ہے۔ الصادق کے خیال میں اس فن میں فنکار اور اُس کی تخلیق میں بہت گہرا ربط ہوتا ہے۔
تصویر: Elsadig Mohamed Ahmed
زندہ دریائے نیل
دریائے نیل کے ساتھ ساتھ صدیوں سے برتن بنانے کی روایت چلی آ رہی ہے۔ اسوان ڈیم بننے تک یہ حال تھا کہ دریا میں آنے والا سیلاب اپنے ساتھ زرخیز مٹی لاتا تھا۔ خاص طور پر آج کل کے حالات میں پانی بہت ہی قیمتی چیز بن چکا ہے۔ یہ دریا مصری سرزمین کے لیے حیات بخش عنصر کی حیثیت رکھتا ہے اور مسلسل تبدیلی کی بھی علامت ہے۔ لوگ آبی وسیلے کے ساتھ ساتھ نقل و حمل اور توانائی کے لیے بھی نیل پر انحصار کرتے ہیں۔
تصویر: Elsadig Mohamed Ahmed
انتہائی قدیم روایات
مٹی سے بنے برتن کارآمد بھی ہوتے ہیں اور خوبصورت بھی۔ صدیوں کے سفر میں اس فن میں نئی نئی اشکال وجود میں آئی ہیں۔ آج کل نُوبیا کے علاقے میں بننے والے برتن دنیا بھر کے عجائب گھروں اور نمائشوں کی زینت بنتے ہیں اور سوڈان کے اس علاقے کی ثقافت اور تاریخ کی وہ داستانیں سناتے ہیں، جن پر نیل کی بہت گہری چھاپ موجود ہے۔
تصویر: Elsadig Mohamed Ahmed
نیلے دریا کے کنارے عاجزی کے سبق
بروک زیرائی مینگستُو کے ہمراہ ہم نیل کے اس سفر میں ایتھوپیا میں داخل ہو جاتے ہیں۔ ایتھوپیا میں جنم لینے والے اس نیلے دریا کے ساتھ ساتھ انتہائی ابتدائی دور کی مسیحیت سے جڑی انجیل کے طالب علموں کی ایک کمیونٹی ملتی ہے۔ روحانی مرتبہ حاصل کرنے اور لوگوں کے مسیحا بننے کے لیے یہ طلبہ معاشرے سے کٹ کر زندگی گزارتے ہیں۔ یہ طلبہ اپنی تنہائی کا راستہ خود چنتے ہیں اور ان کی تعلیم چَودہ برسوں میں مکمل ہوتی ہے۔
تصویر: Brook Zerai Mengistu
انجیل کے طالب علم
وقتاً فوقتاً یہ طالب علم اپنی تنہائی سے نکل کر قریبی دیہات کا رخ کرتے ہیں تاکہ اپنے لیے خوراک مانگ کر لا سکیں۔ گداگری اُنہیں عاجزی سکھاتی ہے۔ اِن طالب علموں کا عقیدہ ہے کہ عاجزی روحانی قوت کا سرچشمہ بنتی ہے۔
تصویر: Brook Zerai Mengistu
یکتائی اور ابدیت
دریائے نیل کا ایتھوپیا میں واقع حصہ یکتائی اور ابدیت کی علامت ہے۔ شہروں سے دور یہ نیلا دریا وسعت اور سکون کا احساس دیتا ہے۔ گوئٹے انسٹیٹیوٹ خرطوم کی ورکشاپ کے شرکاء اپنے اپنے ملکوں کے سفر پر گئے، جن میں بہت سے آج کل جنگوں اور تنازعات کی زَد میں ہیں۔ متاثر کن تصاویر کی یہ نمائش ستائیس مئی تک جاری رہے گی۔