امریکی ادیب اور فلسفی ہنری ڈیوڈ تھوراؤ کے الفاظ ہیں کہ وہ دانستہ جنگل میں جا کر رہنے لگے تھے۔ انہوں نے سن 1845 سے 1847 کا عرصہ امریکی ریاست میساچوسٹس کے علاقے والڈن پونڈ کے جنگل میں واقع ایک چھوٹے سے کیبن میں تنہا گزارا۔ ایک صدی بعد ان کا طرزِ زندگی کئی افراد کو بھا گیا۔ اب دنیا بھر میں چھوٹے گھر کی تحریک مقبول ہو رہی ہے۔

چھوٹے گھروں میں رہنے کے نظریے کو مقبولیت امریکا میں سن 1970 کی دہائی میں ملنا شروع ہوئی۔ بعض لوگ گھر چھوٹے رکھتے ہوئے ماحول دوستی کی جانب راغب ہوئے۔ امریکا میں سن 2018 میں چھوٹے گھر کو انٹرنیشنل ریزیڈینشل کوڈ کے تحت ایک رہنے کا مکان قرار دے دیا گیا۔ ایسا مکان جو زیادہ سے زیادہ سینتیس مربع میٹر (400 مربع فٹ) پر بنا ہو۔

ایک چھوٹے مکان میں چھوٹا سا کچن اور بقیہ رہنے کا علاقہ ہوتا ہے۔ یہی جاگنے اور سونے کی جگہ ہے۔ مچان کی طرح کا اسٹور بھی احتیاط سے نصب کیا جاتا ہے۔ کئی چھوٹے گھر پہیوں پر کھڑے بھی ہوتے ہیں اور اس میں رہنے والا جب چاہے کسی اور جگہ منتقل ہو جائے۔ یہ کیمپر وین جیسے نہیں بلکہ ایک مکمل گھر ہوتا ہے۔

جرمنی میں بھی چھوٹے گھروں کو حالیہ برسوں میں مقبولیت ملی ہے۔ جنوبی جرمن جنگلات میں ہزاروں افراد چھوٹے گھروں کے رہائشی بن چکے ہیں۔ جرمنی میں سن 2017 میں پہلا چھوٹے گھروں کا گاؤں (Tiny House Village) قائم ہوا۔ یہ گاؤں باویریا کے ضلع مہل مائزل میں ہے۔ اس میں رہنے والے تیس افراد ایک چھوٹا سا ہوٹل (Tiny House Hotel) بھی چلاتے ہیں۔ اس ہوٹل میں مہمان سادہ زندگی کا لطف لے سکتے ہیں۔

کم سے کم ضروریات کے ساتھ اس طرزِ زندگی کو ماحول دوستی کا رویہ بھی قرار دیا گیا ہے۔ چھوٹے گھر ماحول پسندی کی ایک مثال بھی بن چکے ہیں۔ سن 2012 میں مغربی جرمنی کے ہامباخ جنگل میں کان کنی کا منصوبہ بنایا گیا۔ لوگوں نے اس کی مخالفت شروع کر دی اور جنگلاتی علاقے پر قبضہ کر کے رہائش اختیار کر لی۔ اس طرح وہ ہامباخ کے قدیمی قدرتی جنگلاتی ماحول کو بچانے میں کامیاب رہے۔

شہروں میں بھی چھوٹے گھر زندگی گزارنے کا متبادل بنتے جا رہے ہیں۔ اس طرح لوگ مہنگے کرایوں سے بچنے کے علاوہ ایک مکمل مکان کی نصف قیمت میں زندگی کی شروعات کر سکتے ہیں۔ برلن میں کچھ لوگ کشتیوں پر بنے چھوٹے گھروں میں رہائش اختیار کیے ہوئے ہیں۔ ان میں کاربن کا اخراج بھی کم اور ماحول دوست ٹوائلٹ بنائے گئے ہیں۔

چھوٹے گھر ماحول دوست ہونے کے ساتھ ساتھ شہروں میں مکانوں کی ضروریات کا متبادل بھی بن سکتے ہیں۔ کئی مغربی ممالک میں بے گھری کے مسئلے کو ان کی تعمیر سے حل کرنے کی کوشش کی جا رہی ہے۔ امریکا میں ایک سو سے زائد چھوٹے گھروں کے دیہات قائم ہیں۔ ان میں ضرورت مند عارضی رہائش بھی اختیار کر سکتے ہیں۔ ناقدین کا کہنا ہے کہ بے گھر افراد کو ان مکانات میں آباد کرنا انسانی وقار کے منافی ہے۔

کئی چھوٹے گھر مدد یا سہارے سے بے نیاز ہیں۔ ان میں شمسی توانائی سے بجلی پیدا کرنے والے پینل بھی لگے ہوئے ہیں۔ اس طرح صاف انرجی بھی چھوٹے گھروں میں دستیاب ہو سکتی ہے۔ کورونا وبا میں شہری زندگی کی دھکا پیل سے ایسے مکانوں میں منتقلی کو مقبولیت ملی۔ سن 2020 کے ایک سروے کے مطابق نصف امریکی آبادی ایسے مکانوں میں رہنے پر غور کر رہی ہے۔

دنیا میں صرف چیک جمہوریہ کے لوگ ہی جرمنوں سے زیادہ بیئر پیتے ہیں۔ ایسا نہیں ہے کہ ہر جرمن کو ہی بیئر اچھی لگتی ہے، مگر سماجی طور پر ایسا ہی مشہور ہے۔ اگر ایک بزرگ خاتون دوپہر کے وقت نصف لٹر بیئر پی رہی ہوں تو انہیں شرابی تصور نہیں کیا جائے گا۔ اور بیئر کے ایک جرمن شوقین کے پاس بوتل کھولنے والی چابی کے بغیر بوتل کھولنے کے کئی تخلیقی طریقے موجود ہوتے ہیں۔

کاغذوں کو ایک ساتھ رکھنے والا ’بائنڈر‘ جرمن ایجاد ہے اور یہ اس بات کی بھی دلیل ہے کہ جرمن باشندے ریکارڈ رکھنے کے کس قدر شوقین ہیں۔ یہاں تک کہ کوئی انتہائی غیر منظم شخص بھی کسی سرکاری کام کے لیے ضروری کاغذ فوراﹰ ڈھونڈ لے گا۔ اصل میں جرمنی میں کاغذات کی ضرورت بھی آپ کے خیال سے بڑھ کر ہی پڑتی ہے۔ ڈیجیٹل ریکارڈز کے باوجود جرمن بیوروکریسی حیران کُن طور پر کاغذی ریکارڈ رکھنے کا سلسلہ جاری رکھے ہوئے ہے۔

جرمنی ایک ایسا ملک ہے جہاں کم داموں پر اشیاء فروخت کرنے والے اسٹور اکثر معاشرے کے تمام طبقوں کے لیے سپر مارکیٹ بن جاتے ہیں۔ ایسے لوگ جو ہمیشہ بہترین قیمتوں پر اشیاء ضرورت کی خریداری کی تلاش میں رہتے ہیں، انہیں جرمن زبان میں ’شنَیپشن ژےگر‘‘ یعنی کم قیمتوں کے شکاریوں کا نام دیا جاتا ہے۔ یہ سوچ اس قدر پختہ ہے کہ جرمنی میں ایڈورٹائزنگ کا ایک نعرہ ’گائز اِسٹ گائل‘ یعنی ’بچت سیکسی ہے‘ انتہائی مقبول ہے۔

اگر آپ کسی سیاحتی مقام مثلاﹰ مشرق وُسطیٰ وغیرہ میں ایسے سیاحوں سے ملتے ہیں جو ہائیکنگ کے لیے جدید اشیاء سے لیس ہوں، تو بہت ممکن ہے کہ وہ درمیانی عمر کے جرمن ہی ہوں گے۔ سفر کے شوقین جرمن ہر جگہ آپ کو ملیں گے۔ تاہم ان میں سے زیادہ تر طے شدہ عادات کے حامل ہوں گے۔ جرمنوں کی ایک پسندیدہ سیاحتی منزل اسپین کے کیناری جزائر ہیں۔

جرمنی میں چھوٹے چھوٹے باغوں پر مشتمل کالونیاں بہت معروف ہیں۔ ملک بھر میں 1.4 ملین ’شریبر گارٹن‘ موجود ہیں۔ یہ دراصل ایسی چھوٹی کالونیاں ہوتی ہیں، جن میں لوگ باغبانی کے لیے چھوٹے چھوٹے پلاٹ کرائے پر لے لیتے ہیں۔ یہاں لوگ پھول اور پودے اگا سکتے ہیں، بار بی کیو کر سکتے ہیں اور ایسے باغیچوں کو اپنے ذاتی باغوں کی طرح سجا سکتے ہیں۔ تاہم یہ باغیچے کرائے پر لینے کے قوانین کافی سخت ہیں۔

ایک بالغ شخص کے طور پر آپ یہ خطرہ مول لے سکتے ہیں کہ جب سڑک پر کوئی کار نہ ہو تو آپ ٹریفک کے سُرخ سگنل پر بھی سڑک پار کر لیں۔ لیکن جرمنی میں اگر آپ ایسا کریں تو حیران مت ہوں، جب کوئی چیخ کر آپ کو کہے کہ ’ابھی سگنل سُرخ ہے‘۔ عام طور پر سائیکل سوار، پیدل چلنے والے، کار ڈرائیور اور باقی تمام لوگ بھی اسے اپنی ذمہ داری سمجھتے ہیں کہ وہ کسی بھی سڑک پر موجود دیگر لوگوں کی تربیت کریں۔

جرمن سماجی روایت ’شٹَم ٹِش‘ کا کوئی لغوی ترجمہ اگر ہو سکتا ہے، تو وہ ’گروہی میز‘ ہے۔ شٹَم ٹِش ابتدا میں پب یا کسی کلب میں صارفین کے لیے کسی میز کو مختص کرنے کو کہا جاتا تھا، جہاں وہ بیٹھ کر کارڈ گیمز کھیلتے یا گپ شپ اور بحث و مباحثے کرتے۔ یہ بحث تاہم زیادہ وسیع نہیں ہوتی تھی۔ شٹَم ٹِش اب مختلف گروپوں کی طرف سے باقاعدہ ملاقاتیں منظم کرنے کو بھی کہا جاتا ہے۔

ہر اتوار کی شام قریب 10 ملین جرمن، ٹیلی وژن پر ’ٹاٹ اَورٹ‘ نامی ٹی وی سیریز دیکھتے ہیں۔ ٹاٹ اَورٹ کا جرمن زبان میں مطلب ہے ’جائے وقوعہ‘۔ یہ سیریز 1970ء سے مسلسل جاری ہے۔ علاقائی پبلک براڈکاسٹر باری باری اس سیریز کی مختلف قسطیں تیار کرتے ہیں، لہٰذا مختلف جرائم کی تفتیش کا عمل ہر بار کسی الگ شہر میں دکھایا جاتا ہے۔ کئی پب بھی اس سیریز کو دکھانے کا اہتمام کرتے ہیں۔

’کافے اُنڈ کُوخن‘ یعنی ’کافی اور کیک‘ نامی روایت کے تحت جرمن باشندے ہر سہ پہر کیک کھا سکتے ہیں۔ اب زیادہ تر اختتام ہفتہ پر ہی اس روایت پر عمل کیا جاتا ہے۔ اگر آپ کی سالگرہ ہے، تو پھر آپ سے توقع کی جاتی ہے کہ آپ اپنے کام کی جگہ پر بھی کیک لے کر جائیں۔ بچے کبھی کبھی ناشتے کا آغاز بھی کیک سے ہی کرتے ہیں اور اسکول میں کھانے کے لیے بھی اپنے ساتھ کیک ہی لے جاتے ہیں۔