ہنگری کے ایک وزیر نے متنبہ کیا ہے کہ ان کی حکومت تارکین وطن اور پناہ کے متلاشی افراد کو برسلز تک کا یک طرفہ سفر کا ٹکٹ مفت دینے کے لیے تیار ہے۔

ہنگری کے وزیر اعظم وکٹر اوربان کے چیف آف اسٹاف گیرگیلی گولیاش کا یہ بیان یورپی عدالت برائے انصاف کی جانب سے ہنگری پر اس کی سخت اسائلم پالیسیوں کی وجہ سے عائد جرمانوں کے ردعمل میں سامنے آیا ہے۔

جمعرات کو ایک پریس کانفرنس سے خطاب کرتے ہوئے گیرگیلی گولیاش نے اس عدالتی فیصلے کو تنقید کا نشانہ بنایا، جس کے تحت یورپی یونین کے اسائلم سے متعلق قواعد کی مسلسل خلاف ورزی پر ہنگری پر 200 ملین یورو کا جرمانہ عائد کیا گیا ہے۔ اس کے علاوہ عدالتی فیصلے میں کہا گیا ہے کہ جب تک ہنگری اپنی اسائلم کی پالیسیوں کو یورپی یونین کے قانون کے موافق نہیں بنا دیتا، تب تک وہ روزانہ ایک ملین یورو کی رقم جرمانے کے طور پر ادا کرے۔

گیرگیلی گولیاش کا کہنا تھا، ''برسلز کسی بھی قیمت پر ہمیں تارکین وطن کو ہنگری آنے دینے پر مجبور کرنا چاہتا ہے۔‘‘ انہوں نے کہا کہ اگر یورپی یونین ہنگری کو ایسے ضوابط کی پابندی پر مجبور کرتا رہا جن سے ''تارکین وطن کو بارڈر پر روکنا ممکن نہیں ہوگا‘‘، تو ان کی حکومت ہر تارک وطن کو مفت میں برسلز تک سفر کرنے کی سہولیات فراہم کرے گی۔

گیرگیلی گولیاش نے کہا، ''ہنگری روزانہ کی بنیاد پر غیر معینہ مدت کے لیے کوئی جرمانہ ادا نہیں کرنا چاہتا۔ تو ہم ہنگری آنے کے خواہاں لوگوں کو ملک میں داخل ہونے دیں گے اور پھر انہیں برسلز تک کے یک طرفہ ٹکٹ کی پیشکش کریں گے۔ اگر برسلز تارکین وطن کا خواہاں ہے، تو وہ انہیں رکھ سکتا ہے۔‘‘

ہنگری کی موجودہ حکومت کی پالیسیاں مہاجرت کے خلاف رہی ہیں اور اس حوالے سے اس نے سخت رویہ اختیار کیا ہوا ہے۔ ہنگری نے سربیا اور کروشیا کے ساتھ اپنی سرحدوں پر باڑ تعمیر کر کے اس پر خار دار تار بھی لگائی ہوئی ہے۔

ان سخت پالیسیوں سے اختلاف کرتے ہوئے یورپی یونین نے ستائیس رکنی بلاک کی اعلیٰ ترین عدالت سے درخواست کی تھی کہ سربیا اور یوکرین میں پناہ کے متلاشی افراد کو ہنگری کے سفارت خانوں سے ٹریول پرمٹ لینے پر مجبور کیے جانے پر بوڈاپیست پر جرمانہ عائد کیا جائے۔

یورپی یونین میں شامل تمام ممالک ایک تعین کردہ یکساں طریقہ کار کے تحت پناہ کے متلاشی افراد کی درخواستیں منظور یا نامنظور کرنے کے پابند ہیں اور ہنگری کی جانب سے یہ اقدام اس بلاک کے قواعد کی خلاف ورزی ہے۔

م ا ⁄ ش ر (اے پی)