توانائی کو ایک قسم سے دوسری قسم میں باآسانی تبدیل کیا جا سکتا ہے۔ تیزی سے چلتی ہوئی ہوا بڑے بڑے پنکھوں پر ٹکرا کر انہیں حرکت دیتی ہے اور اس طرح یہ پنکھوں سے حاصل ہونے والی حرکی توانائی کو برقی توانائی میں تبدیل کر لیا جاتا ہے۔

قابل تجدید توانائی کے ذرائع میں ہوا ئی قوت یا ونڈ پاور ایک اہم اور موثر طریقہ کار ہے۔ ہوا کا بنیادی محرک سورج کی کرنوں کا سطح زمین سے ٹکرانا ہے جس کے باعث مختلف خطوں پر تبدیل ہوتا درجہ حرارت ہوا کی پیدائش کا موجب بنتا ہے۔ یہ ایک نہ ختم ہونے والا سلسلہ ہے سو سائنسدانوں اور ماہرین کی رائے میں اس طریقہ توانائی سے نہ صرف آلودگی کا احتمال نہیں بلکہ یہ ایک انتہائی سستا ذریعہ بھی ہے۔

ہوائی قوت سے بجلی کے حصول کے لئے بڑے بڑے، کم مزاحمتی گردشی پنکھے ہوا کے مقابل لگائے جاتے ہیں۔ کارکردگی کے لحاظ سے ونڈ پاور کے لئے اوسط علاقہ ایسے علاقے کو کہتے ہیں جہاں کم از کم بارہ میل فی گھنٹہ کی رفتار سے ہوا چلتی ہو۔

حرکی توانائی سے برقی توانائی کا حصول گھروں میں بجلی کی موٹر جیسا مگر بالکل الٹ ہوتا ہے یعنی موٹر کو بجلی فراہم کی جاتی ہے تو یہ گھومنے لگتی ہے۔ بالکل اسی طرح اس طریقہ میں ہوا کی مدد سے پنکھوں اور پنکھوں سے چرخیوں کو گھومایا جاتا ہے اور بجلی پیدا ہوتی ہے۔

اس وقت ونڈ پاور کی بہترین سائٹ کی تعمیر پر تقریبا وہی لاگت آتی ہے جو کوئلے سے بجلی کے حصول کے کارخانے پر آتی ہے مگر بعد میں نہ تو اس کے لئے کسی مزید خام مال کی ضرورت ہوتی ہے اور نہ ہی بہت زیادہ عملے کی۔

اس طریقہ کار کےانتہائی ماحول دوست کہلانے کی وجہ یہ ہے کہ اس طریقہ توانائی میں ایک طرف تو فضائی آلودگی پیدا نہیں ہوتی اور دوسری جانب کسی قسم کے خام مال کی ضرورت بھی نہیں پڑتی۔

تاہم اس طریقہ توانائی سے عمومی طور پر دو مسائل پیدا ہو تےہیں یعنی پرانے طرز کے ٹربائن سے شور کا پیدا ہونا جسے نئے ڈیزائینوں میں کم تر تو کیا گیا ہے تاہم اب تک مکمل طور پر ختم نہیں کیا جا سکا اور ماحول پر اس کا دوسرا اثر بڑی تعداد میں پرندوں کی ہلاکت ہے۔ جدید ٹیکنالوجی سے تیار کردہ نئے ہوائی پنکھوں میں اس نقص کو انتہائی کم کر دیا گیا ہے تاہم اب تک ختم نہیں کیا جا سکا۔ جب ہوا بہت تیزی سے چلتی ہے اور یہ پنکھے تیز رفتاری سے گھومتے ہیں تو بڑی تعداد میں پرندے ان پنکھوں کی زد میں آ جاتے ہیں۔

ماہرین کا کہنا ہے کہ اس ٹیکنالوجی پر جس رفتار سے کام کیا جا رہا ہے اس سے امید ہے کہ سن دوہزار بیس تک ونڈ پاور، توانائی کے حصول کا سب سے سستا ذریعہ ہو گا۔